តួលេខអ្នកស្លាប់ដោយសារទឹកជំនន់ បានកើនឡើងលើស ៧០០នាក់ហើយកាលពីថ្ងៃម្សិលមិញនេះ ហើយមនុស្សជាង ១លាននាក់ ត្រូវបានជម្លៀសចេញពីផ្ទះសម្បែងរបស់ពួកគេ ខណៈតំបន់ជាច្រើននៅតំបន់អាស៊ីខាងត្បូង ស្ថិតក្រោមទឹកជំនន់នៅរដូវវស្សា។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីរបស់មន្ត្រី។
AFP បានផ្សាយបន្តថា យ៉ាងហោចណាស់មនុស្ស ១០០នាក់ ត្រូវបានគេរាយការណ៍ថា បានស្លាប់កាលពីថ្ងៃអាទិត្យនៅទូទាំងប្រទេសឥណ្ឌា និងបង់ក្លាដែស ក្រោយពីទឹកជំនន់ដ៏ធំធេងចាប់តាំងពីថ្ងៃទី១០ ខែសីហា ខណៈដែលទឹកភ្លៀងរដូវវស្សាបានវាយប្រហារភាគខាងជើង និងភាគខាងកើតតំបន់នេះ។
មន្ត្រីគ្រប់គ្រងមហន្តរាយនៅរដ្ឋប៊ីហាភាគខាងកើតឥណ្ឌា បាននិយាយថា សព ៥៣នាក់ ត្រូវបានគេស្រង់បាន ខណៈកម្រិតទឹកជំនន់បានចាប់ផ្ដើមថមថយមនៅតំបន់ខ្លះ ដែលនាំឲ្យចំនួនអ្នកស្លាប់សរុបនៅក្នុងរដ្ឋនេះ បានកើនឡើងដល់ ២០៥នាក់។
មនុស្សជិត ៤សែន កំពុងស្នាក់នៅក្នុងជម្រកបណ្ដោះអាសន្ន ខណៈដែលប្រជាជនប្រហែល ១០លាននាក់ បានរងផលប៉ះពាល់ពីទឹកជំនន់៕