មនុស្សជាង ៧៥០នាក់ បានស្លាប់នៅក្នុងទឹកជំនន់នៅទូទាំងតំបន់អាស៊ីខាងត្បូង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP ដោយបានដកស្រង់សម្ដីក្រុមមន្ត្រី។
AFP បានចុះផ្សាយបន្តថា ភ្លៀងរដូវវស្សា ក៏កំពុងតែបង្កឲ្យសត្វស្លាប់រាប់រយក្បាលផងដែរ ក្នុងនោះមានទាំងសត្វរមាស និងខ្លាផងដែរ។
ចំនួនអ្នកស្លាប់កំពុងកើនឡើងយ៉ាងលឿននៅឥណ្ឌា នេប៉ាល់ និងបង់ក្លាដែស បន្ទាប់ពីទឹកជំនន់ជាបន្តបន្ទាប់ ចាប់តាំងពីថ្ងៃទី១០ ខែសីហានេះ ខណៈភ្លៀងរដូវវស្សាកំពុងវាយប្រហារផ្នែកភាគខាងជើង និងភាគខាងកើតនៃតំបន់នេះ។
មន្ត្រីគ្រប់គ្រងគ្រោះមហន្តរាយនៅរដ្ឋប៊ីហារបស់ឥណ្ឌា បានឲ្យដឹងថា សពជិត ៥០នាក់ត្រូវបានគេរកឃើញនៅក្នុងរដ្ឋប៊ីហា នៅភាគខាងកើតប្រទេសឥណ្ឌា ដែលនាំឲ្យអ្នកស្លាប់នៅក្នុងរដ្ឋនេះ កើនឡើងដល់ចំនួន ២៥៣នាក់។
នៅឯប្រទេសនេប៉ាល់ មនុស្ស ១៤៣នាក់បានស្លាប់ ហើយ ៣០នាក់ទៀតកំពុងបាត់ខ្លួននៅឡើយ បន្ទាប់ពីទឹកជំនន់បានបំផ្លាញផ្ទះសម្បែងដល់ទៅជិត ៨ម៉ឺនកន្លែង។
ភ្លៀងខ្លាំងខ្លាំងក្លាក៏បានសម្លាប់ជីវិតសត្វព្រៃរបស់ឥណ្ឌាកាន់តែច្រើនផងដែរ ដោយក្រុមជួយសង្គ្រោះកំពុងទាញយកសត្វព្រៃទាំងនោះចេញពីទឹកជំនន់ នៅឧទ្យានជាតិខាស៊ីរ៉ានកា។
មន្ត្រីគ្រប់គ្រងឧទ្យានជាតិនេះ បានឲ្យដឹងថា សត្វព្រៃ ២២៥ក្បាល ត្រូវបានគេរកឃើញថាស្លាប់ចាប់តាំងពីថ្ងៃទី១២ ខែសីហា ក្នុងនោះមានទាំងរមាស ១៥ក្បាលផងដែរ។
ក្ដាន់ជិត ២០០ក្បាល ដំរី ៤ក្បាល ខ្លាឃ្មុំព្រៃ ៤ក្បាល ក្របីព្រៃ ២ក្បាល និងកាំប្រម៉ាមួយក្បាល ក៏ស្ថិតក្នុងចំណោមសត្វព្រៃដែលស្លាប់នៅក្នុងឧទ្យានជាតិនេះផងដែរ។
នៅទូទាំងរដ្ឋអាសាម និងបេងកាល់ខាងលិច មនុស្ស ១២២នាក់ បានស្លាប់ ខណៈដែលមនុស្ស ៦៩នាក់ បានស្លាប់នៅឯរដ្ឋឧត្ដរប្រាដែស៕
ភ្លៀងធ្លាក់ដ៏ខ្លាំងក៏បានបង្កជាការរអិលបាក់ដី លេបត្របាក់រថយន្តក្រុង ២គ្រឿង ដែលបានសម្លាប់មនុស្ស ៥៤នាក់ នៅភាគពាយព្យនៃប្រទេសឥណ្ឌា។
នៅឯប្រទេសបង់ក្លាដែសឯណោះវិញ មនុស្ស ១១៥នាក់ បានស្លាប់ ហើយ ៥.៧លាននាក់ទៀត បានរងផលប៉ះពាល់ដោយសារភ្លៀងធ្លាក់ដ៏ជោគជាំនេះ៕
