គណៈកម្មការផ្សារអូឡាំពិកបានឲ្យដឹងថា ក្មេងប្រុសម្នាក់បានគៀបជើងក្នុងជណ្តើរយន្ត ដោយថាករណីនេះជាការធ្វេសប្រហែសរបស់អាណាព្យាបាល ខណៈពេលកំពុងឡើងជណ្តើរយន្ត។
លោក ចាន់ ដាវុធ ប្រធានគណៈកម្មការផ្សារអូឡាំពិកបានប្រាប់VODនៅព្រឹកថ្ងៃពុធ ទី២១ ខែធ្នូនេះថា ក្មេងប្រុសម្នាក់អាយុ៤ឆ្នំា បានយកជើងឈូសជញ្ជាំងជណ្តើរយន្តបណ្តាលឲ្យគៀបស្បែកជើងចូលក្នុងជណ្តើរបណ្តាលឲ្យរងរបួសជើង។ លោកថា ករណីនេះជាការធ្វេសប្រហែសរបស់អាណាព្យាបាល មិនបានមើលកូនឲ្យបានដិតដល់អំឡុងពេលឡើងជណ្តើរយន្ត៖ «វាដូចមិនធ្ងន់ធ្ងរទេ របៀបដូចក្មេងវាឈូសជញ្ជាំងជណ្តើរយន្តលេង វាកាន់ដៃអាណាព្យាបាលឈូសលេង វាចូលស្បែកជើង គៀបទាញយកទៅ»។
យ៉ាងណាក៏ដោយលោក ចាន់ ដាវុធ បញ្ជាក់ថា ក្មេងប្រុសរូបនោះត្រូវបានក្រុមហ៊ុនមនុស្សធម៌នៅក្នុងផ្សារបានយកក្មេងនោះទៅព្យាបាល បន្ទាប់ពីរងគ្រោះ៕