នាយកប្រតិបត្តិនៃអង្គការតម្លាភាពកម្ពុជា បានលើកឡើងថា ភាពលោភលន់ និងអាត្មានិយម ជាអ្វីដែលធ្វើឲ្យតម្លៃនៃភាពទៀងត្រង់ធ្លាក់ចុះ និងធ្វើឲ្យមនុស្សហ៊ានប្រព្រឹត្តិអំពើពុករលួយមិនខ្មាស់ខ្លួនឯង។
ថ្លែងក្នុងពិធីជិះកង់ដើម្បីជំរុញប្រជាជនចូលរួមប្រឆាំងអំពើពុករលួយនៅថ្ងៃនេះ នាយកប្រតិបត្តិអង្គការតម្លាភាពកម្ពុជា លោក ព្រាប កុល មានប្រសាសន៍ប្រាប់អ្នកយកព័ត៌មានវីអូឌីថា មូលហេតុដែលអង្គការរបស់លោករៀបចំឲ្យមានពិធីនេះឡើង ក៏ព្រោះតែចង់ជម្រុញឲ្យប្រជាជនងាកមកចាប់អារម្មណ៍ទៅលើតម្លៃនៃភាពទៀងត្រង់របស់ខ្លួន ដែលលោកថា ជាចំណុចចាប់ផ្តើមនៃការកាត់បន្ថយអំពើពុករលួយ។
លោកថា៖ «យើងឃើញថា មានការធ្លាក់ចុះច្រើនមែនទែននៅក្នុងសង្គម។ កម្ពុជាយើងក៏រងផលប៉ះពាល់នូវការធ្លាក់ចុះនៃគុណធម៌ និងសុចរិតភាពនេះដែរ ព្រោះមនុស្សចាប់ផ្តើមនាំគ្នាឲ្យតម្លៃទៅលើសម្ភារៈ ទៅលើទ្រព្យសម្បតិ្តទៅលើលុយខ្លាំងពេក ដែលធ្វើឲ្យគាត់បានមើលរំលងតម្លៃស្នូលរបស់មនុស្ស តម្លៃស្នូលដែលយើងគិតថា ជាស្នូលនៃព្រះពុទ្ធសាសនា ស្នូលនៃមនុស្សជាតិហ្នឹងផង គឺសុចរិតភាព និងគុណធម៌ហ្នឹង»។
លោកបន្ថែមថា ដោយសារតែកម្សោយនៃភាពទៀងត្រង់នេះហើយ បានជាបណ្តាលឲ្យប្រជាជនកម្ពុជាមួយចំនួនហ៊ានប្រព្រឹត្តិអំពើពុករលួយដោយមិនខ្មាសខ្លួនឯង។
របាយការណ៍ឆ្នាំ២០១៥របស់អង្គការតម្លាភាពកម្ពុជាស្តីពីអំពើពុករលួយ បង្ហាញថា ប្រទេសកម្ពុជានៅតែស្ថិតនៅក្នុងចំណោមបណ្តាប្រទេសដែលមានស្ថានភាពអំពើពុករលួយធ្ងន់ធ្ងរ ដោយសារតែប្រព័ន្ធយុត្តិធម៌ និងនីតិរដ្ឋកម្ពុជានៅទន់ខ្សោយ។ បើតាមរបាយការណ៍នោះ ក្នុងចំណោមប្រទេស១៦៨ កម្ពុជាស្ថិតនៅចំណាត់ថ្នាក់ទី១៥០ ដោយទទួលបានពិន្ទុ ២១ លើ ១០០ ដែលយោងតាមសន្ទស្សន៍នៃការសិក្សាមានន័យថា កម្ពុជានៅតែស្ថិតក្នុងក្រុមប្រទេសដែលមានអំពើពុករលួយធ្ងន់ធ្ងរ៕
