មនុស្សវ័យចាស់ ត្រូវបានគណបក្សកាន់អំណាចដាក់បញ្ចូលទៅក្នុងគោលនយោបាយថ្មីរបស់ខ្លួន ខណៈការបោះឆ្នោតថ្នាក់ជាតិកាន់តែខិតចូលមកដល់ បន្ទាប់ពីគណបក្សពីរ បានលើកយកបញ្ហានេះដាក់ចូលក្នុងគោលនយោបាយរបស់ខ្លួនរួចមកនោះ។
ឯកសារនៃមហាសន្និបាតវិសាមញ្ញរបស់គណបក្សប្រជាជនកម្ពុជាចាប់ពីថ្ងៃទី១៩ ដល់ថ្ងៃទី២១ ខែមករា បានបង្ហាញថា គណបក្សកាន់អំណាចមួយនេះ បានដាក់បញ្ចូលគោលនយោបាយមនុស្សវ័យចាស់ទៅក្នុងកម្មវិធីនយោបាយរបស់ខ្លួនសម្រាប់ឆ្នាំ២០១៨ដល់ឆ្នាំ២០២៣។
គណបក្សកាន់អំណាចបានសម្រេចបែបនេះ តែប៉ុន្មានថ្ងៃប៉ុណ្ណោះបន្ទាប់ពីលោកនាយករដ្ឋមន្ត្រី ហ៊ុន សែន បានប្រកាសជាសាធារណៈអំពីគោលនយោបាយជាតិស្ដីពីមនុស្សវ័យចាស់ ២០១៧-២០៣០ ដោយលោកផ្ទាល់ធ្វើជាប្រធានមូលនិធិមនុស្សវ័យចាស់។
លោក ហ៊ុន សែន ថ្លែងថា៖ «ជាកាពិត គោលនយោបាយជាតិស្តីពីមនុស្សចាស់ ២០១៧ ដល់ ២០៣០នេះ គឺជាការបើកទំព័រប្រវត្តិសាស្ត្រថ្មីនៃប្រព័ន្ធគាំពារសង្គមមួយ ដោយផ្តោតលើការការពារមនុស្សចាស់នៅកម្ពុជា ដែលឆ្លើយតបទៅនឹងតម្រូវការជាក់ស្តែងរបស់ពួកគាត់ ក្នុងបរិក្ខានៃការផ្លាស់ប្តូរយ៉ាងឆាប់រហ័សនៃប្រជាសាស្ត្រ និងដំណើរការអភិវឌ្ឍសង្គម និងសេដ្ឋកិច្ចជាតិ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា គណបក្សនេះបានសម្រេចឲ្យមានកម្មវិធីនយោបាយគាំពារដល់មនុស្សវ័យចាស់ដែលគ្មានទីពឹង តាមរយៈការបង្កើតមជ្ឈមណ្ឌលប្រមូលផ្ដុំ និងផ្ដល់ការថែទាំងផ្នែកសុខភាព និងសុវត្ថិភាពដល់ពួកគាត់។
បើតាមអ្នកនាំពាក្យរូបនេះ មនុស្សវ័យចាស់ដែលនឹងស្ថិតនៅក្រោមកម្មវិធីនយោបាយថ្មីនេះ ត្រូវបានសំដៅទៅដល់ក្រុមមនុស្សចាស់គ្មានទីពឹង ប៉ុន្តែ គណបក្សនេះមិនបានកំណត់ចំនួនថវិកាជាក់លាក់សម្រាប់ផ្ដល់ជូនដល់មនុស្សវ័យចាស់ ដែលនឹងត្រូវទទួលបានការគាំពារនោះឡើយ
លោកថា៖ «អត់ទីពឹងបានន័យថា អត់មានប្រភពចំណូល អត់មានកូនចៅថែរក្សា កូនចៅខ្វះលទ្ធភាព ឬមួយក៏គាត់តែលតោលឯកកាទៅ។ អ្នកខ្លះគាត់ថា រៀបស្លាប់គ្រាន់តែបានឃើញក្តារមឈូស ឬមួយរៀបស្លាប់គ្រាន់តែបានសម្លការីមួយចាន គាត់វាអស់ចិត្តនោះណា ដែលយើងជួបប្រទះនៅក្នុងសង្គមជាក់ស្តែងរបស់យើងនេះ។ អញ្ចឹង យើងដោះស្រាយបញ្ហាហ្នឹង កុំឲ្យគាត់មានអារម្មណ៍រវើរវាយ អណ្តែតអណ្តូងទៅផ្សេងៗកាន់តែអស់សង្ឃឹមទៅ វាធ្វើឲ្យសុខភាពកាន់តែទ្រុឌទ្រោមថែមទៀត»។
ទោះជាយ៉ាងណា ការសម្រេចបែបនេះរបស់បក្សកាន់អំណាច ត្រូវបានធ្វើឡើង បន្ទាប់ពីគណបក្សនយោបាយ២ទៀត បានលើកយកបញ្ហានេះ ដាក់ចូលក្នុងកម្មវិធីនយោបាយរបស់ខ្លួនរួចមកហើយនោះ។
នៅក្នុងគោលនយោបាយ ៧ចំណុចរបស់ខ្លួនអំឡុងយុទ្ធនាការឃោសនាបោះឆ្នោតជាតិឆ្នាំ២០១៣ គណបក្សសង្គ្រោះជាតិ បានសន្យាផ្ដល់ប្រាក់ឧបត្ថម្ភ ៤ម៉ឺនរៀលក្នុងមួយខែសម្រាប់មនុស្សវ័យចាស់ ប្រសិនបើគណបក្សនេះឈ្នះការបោះឆ្នោត និងដឹកនាំរដ្ឋាភិបាលនោះ។
គណបក្សប្រជាធិបតេយ្យមូលដ្ឋាន ដែលទើបតែត្រូវបានបង្កើតឡើងកាលពីជាង ២ឆ្នាំមុននោះដោយក្រុមបញ្ញាវ័ន្តមួយក្រុមនោះ ក៏បានដាក់បញ្ចូលបញ្ហានេះក្នុងកម្មវិធីនយោបាយរបស់ខ្លួនផងដែរ ដោយសន្យាផ្ដល់ប្រាក់ឧបត្ថម្ភចំនួន ១៥ម៉ឺនរៀលក្នុងមួយខែ ដល់មនុស្សវ័យចាប់ពី ៦៥ឆ្នាំឡើង។
អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ីន បានឲ្យវីអូឌីដឹងថា គោលនយោបាយសម្រាប់មនុស្សចាស់របស់គណបក្ស គឺដើម្បីជួយសម្រួលដល់ការរស់នៅរបស់ពួកគាត់ ដោយថា ចំនួនថវិការក្នុងទំហំប៉ុននេះ គឺមិនចោទជាបញ្ហាសម្រាប់រដ្ឋាភិបាលនោះទេ។
លោកថា៖ «ក្នុងវិស័យបួនមានវិស័យសង្គមកិច្ចដែលយើងយកចិត្តទុកដាក់ជួយដល់ស្ត្រីឆ្លងទន្លេ យកចិត្តទុកដាក់ដល់មនុស្សចាស់ ជួយដល់កម្មករពេលអត់ការងារធ្វើជាដើមហ្នឹង។ អញ្ចឹង យើងគិតគូរពីការចំណាយទៅលើវិស័យអាទិភាពបួនហ្នឹង ដែលចំណាយប្រមាណតែ ២៥ភាគរយនៃថវិកាប្រមាណ ៦ពាន់លានដុល្លារទេ។ អញ្ចឹងយើងគិតថា រឿងនេះមិនមែនជារឿងលំបាកក្នុងកាអនុវត្តជាក់ស្តែងទេ ហើយម្យ៉ាងទៀតគោលនយោបាយរបស់គណបក្សប្រជាធបតេយ្យមូលដ្ឋាន យើងនឹងជំរុញឲ្យមានការអភិវឌ្ឍសេដ្ឋកិច្ចជាតិឲ្យកាន់តែឡើងខ្លាំងជាបច្ចុប្បន្ន»។
អ្នកវិភាគវ័យក្មេង លោក ហង្ស វិទូ យល់ថា តាមរយៈការដាក់ចេញនូវគោលនយោបាយនេះ បានបង្ហាញថា អ្នកនយោបាយកំពុងផ្តោតលើមនុស្សចាស់ ដើម្បីទាញយកប្រជាប្រិយភាព និងការគាំទ្រពីប្រជាពលរដ្ឋនាពេលជិតបោះឆ្នោត។
លោកថា៖«ដូចខ្ញុំបានបញ្ជាក់ហើយ សម្រាប់គោលនយោបាយគាំពារមនុស្សចាស់(របស់បក្សប្រជាជន)នេះ មានយូរហើយ ប៉ុន្តែ គ្រាន់តែរដ្ឋាភិបាលហាក់បីដូចជាអនុវត្តន៍បានតិចតួចបំផុត! ដូច្នេះហើយ បើសិនជាអាចមានប្រជាប្រិយភាពមានតែ ខ្ញុំគិតថា សម្រាប់គណបក្សនយោបាយថ្មីវិញដូចជាគណបក្សប្រជាធិបតេយ្យមូលដ្ឋាន ខ្ញុំគិតថា ពួកគាត់ហាក់ដូចជាមានប្រជាប្រិយភាពជាងគណបក្សប្រជាជនកម្ពុជាដែលមានតែការផ្សព្វផ្សាយចាស់ដែលការអនុវត្តគ្មានប្រសិទ្ធភាព»។
របាយការណ៍ក្រសួងសង្គមកិច្ច អតីតយុទ្ធជន និងយុវនីតិសម្បទា បានឲ្យដឹងថា មនុស្សវ័យចាស់មានអាយុពី ៦០ឆ្នាំឡើងក្នុងឆ្នាំ២០១៣ មានប្រមាណ ៨% ឬស្មើនឹង ១ លាន ២សែននាក់នៃប្រជាជនកម្ពុជាសរុប ១៥លាននាក់។
ចំនួនមនុស្សចាស់ ត្រូវបានព្យាករថា នឹងកើនដល់ ២លាននាក់ ឬស្នើនឹង ១១%នៃប្រជាជនសរុបប្រមាណ ១៨លាននាក់នៅឆ្នាំ២០៣០៕
