យុវជន គង់ រ៉ៃយ៉ា ដែលជាប់ចោទទាក់ទងនឹងការប៉ុនប៉ងធ្វើ «បដិវត្តពណ៌» នោះបានមានសេរីភាពវិញហើយនៅថ្ងៃពុធនេះ បន្ទាប់ពីអនុវត្តទោសជាប់ពន្ធនាគាអស់រយៈពេល១៨ខែរួចមក។
និយាយដោយរំភើបចិត្ត ថែមទាំងរលីងរលោងទឹកភែ្នកផង គង់ រ៉ៃយ៉ា និយាយថា លោកអរគុណដែលរដ្ឋាភិបាលចាប់ខ្លួនដាក់ពន្ធធនាគារ ដែលធ្វើឲ្យលោកស្ទើរតែផ្លាស់ប្តូរទាំងស្រុង។
រ៉ៃយ៉ា បន្តថា នៅក្នុងពន្ធធនាគារមួយឆ្នាំកន្លះ លោកស្វែងយល់បានច្រើននិងទទួលបានបទពិសោធន៍ទាំងជូរចត់ផង។
រ៉ៃយ៉ា បន្ថែមថា លោកសោកស្តាយដែលអស់លោកធំៗក្នុងរដ្ឋាភិបាល តុលាការ ដែលលោកថា ចង់បំផ្លាញទឹកចិត្តយុវជន។ ប៉ុន្តែលោកនឹងបន្តសកម្មភាព មិនរាថយឡើយ។
យុវជន គង់ រ៉ៃយ៉ា គឺជានិស្សិតផ្នែកវិទ្យាសាស្ត្រនយោបាយឆ្នាំទី១ នៃសាកលវិទ្យាល័យខេមរៈ ត្រូវបានចាប់ខ្លួនកាលពីថ្ងៃទី២០ ខែសីហា ឆ្នាំ២០១៥ ក្រោយពីយុវជនរូបនោះ បានបង្ហោះសារបដិវត្តពណ៌នៅក្នុងគណនេយ្យហ្វេសប៊ុករបស់ខ្លួន។
ក្រោយមកសាលាដំបូងរាជធានីភ្នំពេញ សម្រេចផ្ដន្ទាទោស គង់ រ៉ៃយ៉ា ឱ្យជាប់ពន្ធនាគារ១៨ខែ ចោទពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ រំខានដល់សន្តិសុខសង្គម ។
ប៉ុន្តែមានការលើកឡើងថាអ្វីដែលយុវជន គង់ រ៉ៃយ៉ា បានផ្សាយលើ Facebook នោះ គឺជាការបញ្ចេញមតិតែប៉ុណ្ណោះ៕