ក្រុមហ៊ុនអាកាសចរណ៍អេមមឺរ៉េត (Emirates Airlines) នឹងធ្វើការហោះហើរមកភ្នំពេញ ចាប់ពីខែកក្កដាក្នុងឆ្នាំនេះ ដោយប្រើប្រភេទយន្តហោះប៊ូអ៊ីង៧៧៧ (Boeing 777-300ER)។ នេះបើតាមព័ត៌មាន Emirates News។
បើតាមព័ត៌មានដដែលនេះ ផ្សាយពីម្សិលមិញថា ជើងហោះហើរក្រៅស្រុក នឹងធ្វើដំណើរ ពីទីក្រុងឌូបៃប្រទេសអារ៉ាប់រួម មកចុះចតនៅទីក្រុងយ៉ាងហ្គូនប្រទេសភូមា ទើបបន្តដំណើរ មកដល់ភ្នំពេញនៅពេលយប់ ហើយពេលត្រឡប់ទៅវិញ គឺនៅវេលាយប់ដដែល។
ព័ត៌មានរំលឹកថា ទីក្រុងភ្នំពេញ ដែលស្ថិតនៅចំណុចកណ្តាលភាគខាងត្បូងនៃប្រទេសកម្ពុជា មានប្រជាជនរស់នៅច្រើនជាងគេ ហើយជាច្រកចូលសំខាន់ទៅកាន់ប្រាសាទអង្គរវត្ត។
ភ្នំពេញ ជាទិសដៅនៃវិស័យទេសចរណ៍និងសេដ្ឋកិច្ច។ ឆ្នាំ២០១៥ មានភ្ញៀវទេសចរមកដល់ កម្ពុជាជិត៥លាននាក់និងមានការព្យាករណ៍ទុកថានៅមុនឆ្នាំ២០២០ នឹងកើនដល់ទៅ ៨លាននាក់។
កាលពីឆ្នាំមុន ក្រុមហ៊ុនដឹកជញ្ជូនទំនិញ Emirates Skycargo របស់ក្រុមហ៊ុនអាកាសចរណ៍មួយនេះ ក៏បានផ្តើមសេវាដឹកជញ្ជូនទំនិញក្នុងមួយសប្តាហ៍ក្នុងមួយជើង រងាវងទីក្រុងឌូបៃ និងទីក្រុងភ្នំពេញ៕