ក្រសួងពាណិជ្ជកម្មដាក់កំហិតឲ្យម្ចាស់ធនាគារនិងគ្រឹះស្ថានមីក្រូហិរញ្ញវត្ថុឯកជនទាំងអស់ ដែលបានប្រើប្រាស់ម៉ាកពាណិជ្ជកម្មរបស់ខ្លួនមានលក្ខណៈស្រដៀងនិមិត្តសញ្ញាក្រសួងសេដ្ឋកិច្ចនិងហិរញ្ញវត្តឬធនាគារជាតិ ត្រូវកែរូបសញ្ញានោះទៅតាមបញ្ជារបស់លោកនាយករដ្ឋមន្រ្តី។
ការប្រកាសរបស់ក្រសួងបែបនេះធ្វើឡើងភ្លាមៗ ក្រោយពី លោក ហ៊ុន សែន នៅព្រឹកនេះ បានរិះគន់មន្រ្តីរដ្ឋាភិបាលរបស់លោកថាធ្វើការ «ស្ទក់» ក្នុងការផ្សព្វផ្សាយកុំឲ្យពលរដ្ឋយល់ច្រឡំរឿងជំពាក់បំណុលឯកជនទៅនឹងបំណុលរបស់រដ្ឋ។
នៅក្នុងសេចក្ដីប្រកាសព័ត៌មានរបស់ក្រសួងពាណិជ្ជកម្មចេញផ្សាយ នាថ្ងៃទី២២ ខែកុម្ភៈនេះ ក្រសួងបានតម្រូវឲ្យ ធនាគារពាណិជ្ជ ធនាគារឯកជន ធនាគារឯកទេស និងគ្រឹះស្ថានមីក្រូហិរញ្ញវត្ថុឯកជន ដែលបានប្រើប្រាស់ម៉ាកពាណិជ្ជកម្មរបស់ខ្លួន មានលក្ខណៈស្រដៀងនឹងនិមិត្តសញ្ញាក្រសួងសេដ្ឋកិច្ចនិងហិរញ្ញវត្ត ឬធនាគារជាតិ ត្រូវធ្វើការកែតម្រូវម៉ាកពាណិជ្ជកម្មរបស់ខ្លួន ឲ្យបានមុនថ្ងៃទី១០ ខែមីនា ឆ្នាំ២០១៧។
លោក ហ៊ុន សែន ក៏បានបញ្ជាឲ្យស្ថាប័នមីក្រូហិរញ្ញវត្ថុ «ប្រាសាក់» ដែលមាននិមិត្តសញ្ញាអក្សរ «រររ» នោះត្រូវប្តូរស្លាកនេះចេញ បន្ទាប់ពីធនាគារ អេស៊ីលីដា បានប្តូររូបហង្សចេញពីនិមិត្តសញ្ញារបស់ខ្លួនរួចហើយ៕