រដ្ឋមន្ត្រីការបរទេសហ្វីលីពីន លោក Perfecto Yasay នៅថ្ងៃនេះ បានបង្ហាញមន្ទិលសង្ស័យថា ជម្លោះអធិបតេយ្យភាពដែនទឹកជាមួយប្រទេសចិន មិនអាចនឹងដោះស្រាយបានជារៀងរហូត ប៉ុន្តែ លោកថា វាជាការប្រសើរបើចាត់ទុកបញ្ហានេះមួយដុំ ចូលរួមជាមួយក្រុងប៉េកាំង និងបញ្ចៀសការប្រឈមមុខដាក់គ្នាដោយអាវុធ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ដោយការពារសេចក្ដីសម្រេចចិត្តរបស់ប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ ថាមិនបង្ខំចិនឲ្យគោរពតាមសេចក្ដីសម្រេចរបស់តុលាការអន្តរជាតិកាលពីឆ្នាំមុននោះ ប្រមុខការទូតហ្វីលីពីន លោក Perfecto Yasay បាននិយាយថា ភាគីទាំងពីរបានឈានដល់ចំណុចជាប់គាំង ដែលមិនអាចបំបែកបាន ហេតុនេះ យកល្អ គេត្រូវតែទាញយកប្រយោជន៍ឲ្យបានច្រើនជាអតិបរមាពីក្រុងប៉េកាំងទៅវិញ។
អំឡុងពេលឆ្លើយបំភ្លឺព្រឹទ្ធសភា លោក Yasay បាននិយាយថា ជំហរ និងគោលបំណងជាយុទ្ធសាស្ត្ររបស់ចិននៅតំបន់សមុទ្រចិនខាងត្បូង បានបង្ហាញថា គ្មានដំណោះស្រាយអាចកើតឡើងនោះឡើយ។
លោក ឌូទើតេ បានផ្លាស់ប្ដូរគោលនយោបាយការបរទេសរបស់ហ្វីលីពីនទាំងស្រុង ដោយបានងាកទៅរកចិនវិញដើម្បីជំរុញវិស័យពាណិជ្ជកម្ម ទេសចរណ៍ និងការវិនិយោគលើវិស័យហេដ្ឋារចនាសម្ព័ន្ធរវាងប្រទេសទាំងពីរ។ លោក Yasay និយាយថា វិធីសាស្ត្រថ្មីនេះ គឺដើម្បីទាញយកប្រយោជន៍សម្រាប់ប្រទេសហ្វីលីពីន។
លោក Yasay បានលើកឡើងបែបនេះ តែមួយថ្ងៃក្រោយពីលោកបានធ្វើជាប្រធាននៃកិច្ចប្រជុំរដ្ឋមន្ត្រីការបរទេសអាស៊ាន ដែលបានបង្ហាញក្ដីបារម្ភខ្លាំងក្លា ទៅលើប្រទេសចិន ដែលបានកសាងប្រព័ន្ធសព្វាវុធនៅលើបណ្ដាប្រជុំកោះស្ថិតនៅសមុទ្រចិនខាងត្បូង។
បើតាមក្រុមមន្ត្រីអាមេរិក បានអះអាងថា ចិនស្ទើតែសម្រេចបានទាំងស្រុងទៅហើយចំពោះការកសាងរចនាសម្ព័ន្ធនៅលើប្រជុំកោះនានា ដែលហាក់ដូចជាត្រូវបានចិនរៀបចំឡើងសម្រាប់បំពាក់មីស៊ីលរយៈចម្ងាយឆ្ងាយ៕
