បទ​យកការណ៍៖ ពលរដ្ឋចាញ់បោកក្រុមហ៊ុន EBC សង្ឃឹមទទួលបានយុត្តិធម៌បើលោក ហ៊ុន សែន ជួយអន្តរាគមន៍

ដោយ លោក ឃុត សុគន្ធ​​ | ថ្ងៃព្រហស្បតិ៍ ទី២២ ខែកុម្ភៈ ឆ្នាំ២០១៨​ ម៉ោង 2:46 PM | បទយកការណ៍ | 0 | 1267 ពលរដ្ឋចាញ់បោកក្រុមហ៊ុន EBC

«បញ្ហាប្រឈមរបស់ខ្ញុំ គឺត្រូវជំពាក់បំណុលធនគារ​បន្ត​។ ពេលដែលគេ[ក្រុមហ៊ុន EBC]ឃោសនាថា ឲ្យទៅយកលុយពីស្ថាបនា មក ដល់ពេលយើងបានការប្រាក់មកយកទៅសងគេវិញ។ ដល់ពេលបោកអញ្ចឹង ខ្ញុំបានលក់ដីអស់ ៤ប្លង់សង់ធនាគារ អត់គ្រប់ទៀត នៅសល់ ៨ពាន់ដុល្លារទៀតបានរួច។ បើប្អូនខ្ញុំមានជំងឺឈឺដោយសារខូចចិត្តរឿងជំពាក់បំណុលគេហ្នឹងរហូតស្លាប់ដោយ សាររកលុយសង់ធនាគារគេអត់បាន»

នេះជាការរៀបរបស់បុរសម្នាក់អំពីផលលំបាក និងបញ្ហាប្រឈមរបស់គាត់ ក្រោយចាញ់បោកលុយ​ក្រុមហ៊ុនវិនិយោគ​ហិរញ្ញវត្ថុ​មួយ ដែលគាត់អះអាងថា ក្រុមហ៊ុនដែលមករកស៊ីបោកប្រាស់នោះ បានចុះបញ្ជីទទួលស្គាល់ដោយរដ្ឋាភិបាល។

ប្រាប់វីអូឌីពេលឡើងមករកកិច្ចអន្តរាគមន៍ពីលោកនាយករដ្ឋមន្រ្តី ហ៊ុន សែន ជាមួយក្រុមពលរដ្ឋផ្សេងទៀត កាលពីថ្ងៃទី១៩កុម្ភៈ លោក ស រ៉េត រៀបរាប់ថា គ្រួសាររបស់គាត់បានខ្ចីលុយពីធនាគារចំនួន ១ម៉ឺន ៨ពាន់ដុល្លារ ដើម្បីយកទៅចង់ការប្រាក់បន្តជាមួយក្រុមហ៊ុន EBC ដែលប្រកាសផ្តល់ការប្រាក់ខ្ពស់រហូតទៅដល់១០ភាគរយ ដោយលោករំពឹងថា នឹងយកការប្រាក់នោះបង់រំលោះសង់ធនាគារវិញ។

លោកបន្ថែមថា៖ «ក្រុមហ៊ុនពេលទៅឃោសនាគេថា មានច្បាប់អនុញ្ញាត្តិពីក្រសួងមហាផ្ទៃ ​ខាងហិរញ្ញវត្ថុ គេថា មានច្បាប់អស់ហើយ។ គេចាក់ស្លាយឲ្យយើងមើលពេលសិក្ខាសាលាទៀត អញ្ចឹង ពួកខ្ញុំប្រជាពលរដ្ឋអ្នកល្ងង់ ពេលឃើញគេ​បង្ហាញតាមស្លាយអញ្ចឹង ចេះតែ​ជឿគេស្លុប។ អញ្ចឹងពួកខ្ញុំល្ងឹតល្ងង់ ចេះតែតាមគេតាមឯងទៅ»។

ដោយ​អះ​អាង​ថា​​មកពី​ខេត្តឧត្តមានជ័យ លោក ស រ៉េត និយាយថា ក្រោយក្រុមហ៊ុន EBC បោក​ប្រាស់​ គ្រួសារគាត់​ត្រូវទទួលបន្ទុករកលុយយ៉ាងច្រើនក្នុង ១ខែៗដើម្បីបង់រំលោះសង់បំណុលធនាគារវិញ។

លោកបន្ថែមថា៖ «ខ្ញុំចាញ់បោកអស់ ១ម៉ឺន ៨ពាន់ដុល្លា ខ្ញុំទៅចងការប្រាក់ពីស្ថាបនាបន្ត ដោយកាលហ្នឹង ខ្ញុំរំពឹងថា បានការប្រាក់មកយកទៅសង់គេវិញ។ ខ្ញុំអស់ដី ៤ប្លង់ និងគោមួយនឹមលក់សងគេ នៅសល់ ៨ពាន់ទៀតបានសង់គេអស់»។

បុរសវ័យ៥៤ឆ្នាំរូបនេះឲ្យដឹងថា ដោយសារតែបញ្ហាចាញ់បោកគេ និងគ្មានលុយសង់ធនគារ គ្រួសារត្រូវបង្ខំចិត្តលក់ទ្រព្យមួយចំនួនសងបំណុលស្ថាប័នមេក្រូហិរញ្ញវត្ថុវិញ ហើយថា ក្មួយប្រុសរបស់គាត់ម្នាក់បានពិបាកចិត្តរហូតឈឺស្លាប់។

លោកបន្ថែមថា៖ «ជួបផលលំបាកមួយទៀត ក្មួយរបស់ខ្ញុំម្នាក់មានជំងឺឈឺ​ខូចចិត្តដោយសាររឿងចាញ់បោកគេ អត់ដឹងរឿងហ្នឹងក៏​ស្លាប់តែម្តង វារកលុយសងធនាគារអត់បានអញ្ចឹងហាស»។

កំពុងអង្គុយជុំគ្នាជាមួយពលរដ្ឋផ្សេងទៀតពេលឡើងមកតវ៉ានៅភ្នំពេញដែរនោះ អ្នកស្រី លាស់ រុំ ដែលអះអាងថា​មកពីខេត្តពោធិ៍សាត់ បាននិយាយថា ក្រោយពីមានការឃោសពីបណ្តាញរបស់ក្រុមហ៊ុនដែលចុះផ្សព្វផ្សាយតាមខេត្តដោយសន្យាផ្តល់ការប្រាក់ខ្ពស់ គ្រួសារគាត់បានលក់ដីស្រែ និងលក់គោរួមទាំងខ្ទីប្រាក់គេបន្ថែមសរុបប្រមាណជិត ១ម៉ឺនដុល្លារ យកទៅដាក់បញ្ញើជាមួយក្រុមហ៊ុន EBC នោះ។

អ្នកស្រីបន្ថែមថា៖ «រាល់ថ្ងៃពិបាកណាស់ខ្ញុំ យករបស់គេ ដោះស្រាយឲ្យគេមិនចេញ អស់ទាំងស្រែ អស់ទាំងគោ កាលណោះហ្នឹង នឹកឃើញថា យកលុយទៅដាក់ វាបានការច្រើនដែរ វាគ្រាន់ស៊ី រួចហើយក៏យកទៅជាមួយគេទៅ»។

ស្រ្តីមេម៉ាយវ័យ៦៦ឆ្នាំរូបនេះ ឲ្យដឹងថា ក្រោយអស់ដីស្រែ អស់គោ និងគ្មានលុយសង់បំណុលគេផង បានធ្វើឲ្យកូនតែមួយរបស់ គាត់សម្រេចចិត្តចំណាកស្រុកចោលគាត់ ទៅធ្វើការងារសំណង់នៅប្រទេសថៃដើម្បីរកប្រាក់ដោះបំណុលគេ។

អ្នកស្រីបន្ថែមថា៖ «កូនទៅធ្វើសំណង់ជាមួយគេនៅថៃទៅ បើមានតែផ្ទះទទេហ្នឹង មិនមានអី បើវាអស់ហើយ។ រាល់ថ្ងៃ ខ្វះទាំងហូប តាំង​ពីចាយ ខ្វះទាំងអស់ហ្នឹង អត់មានអី​តទៅមុខទៀតទេ បើខែបុណ្យទានគ្រាន់ជូនខ្លះ ហើយខែច្រូតទៅស៊ី​ឈ្នួលគេបានខ្លះទៅទុកហូប»។

ជាអ្នកភូមិមកពីខេត្តព្រៃវែងដែលអះអាងថា បានចេញបោកប្រាក់ក្រុមហ៊ុន EBC អស់ ១ម៉ឺន ២ពាន់ដុល្លារ លោក សម វុទ្ធី និយាយថា ពលរដ្ឋមានការទុកចិត្ត និងហ៊ានយកប្រាក់រាប់ម៉ឺនដុល្លារទៅដាក់បញ្ញើជាមួយក្រុមនោះ ដោយសារពេលដែលក្រុមហ៊ុនចុះ​ទៅ​ឃោលសនាផ្សព្វផ្សាយ គឺមានការទទួលស្គាល់ពីអាជ្ញាធរថ្នាក់មូលដ្ឋានរហូតដល់ថ្នាក់ជាតិ។

លោកបន្ថែមថា៖ «ពីព្រោះក្រុមហ៊ុនហ្នឹងមករកស៊ីក្នុងស្រុកខ្មែរ ហើយមានចំណារយល់ព្រមបោះត្រាស៊ីញ៉េពីក្រសួងមហាផ្ទៃ ពីក្រសួងសេដ្ឋកិច្ចហិរញ្ញវត្ថុ មូលប័ត្រកម្ពុជា និងបានធ្វើបទបង្ហាញទៅតាមបណ្តាសណ្ឋាគារ និងទីរួមខេត្តមួយចំនួន គឺធ្វើនៅសាលាខេត្តតែម្តង។ សួរថា ធ្វើឲ្យប្រជាជនភ័យអីទៀត? អញ្ចឹង បងប្អូន មិនត្រឹមតែរាស្រ្តសាមញ្ញទេ មន្រ្តីធំនៅភ្នំពេញ ក៏មានចាញ់បោកក្រុមហ៊ុននេះដែរ»។

កំពុងឈរលើកបដាជាមួយក្រុមពលរដ្ឋមកពីបណ្តាខេត្តផ្សេងៗទៀត ពេលដាក់ញត្តិនៅខុទ្ទកាល័យនាយករដ្ឋមន្រ្តីកាលដើមពីសប្តាហ៍នេះ បុរសវ័យ ៦៨​ឆ្នាំ លោក សម វុទ្ធី ឲ្យដឹងថា រឿងឆបោកនោះបានផ្ទុះឡើងតាំងពីឆ្នាំ២០១៥មកម៉្លេះ ហើយពួកគាត់បានឡើងមកកិច្ចអន្តរាគមន៍​ពីអាជ្ញាធរថ្នាក់ជាតិមិនតិចជាង ៥ដងឡើយ ដូចជាក្រសួងមហាផ្ទៃ ក្រសួងយុត្តិធម៌ រដ្ឋសភា និងខុទ្ទកាល័យនាយករដ្ឋមន្រ្តីនេះផងដែរ ប៉ុន្តែ មិនទទួលបានដំណោះស្រាយនោះទេ។

លោកបន្ថែមថា៖ «ពេលឡើងមកតវ៉ាហ្នឹង យើងខាតពេលវេលាធ្វើការងាររកស៊ី ខាតសោហ៊ុយធ្វើដំណើរឡើងចុះ ខាតច្រើន សរុបជារួមដែលយើងចាញ់បោកគេហ្នឹង យើងខាតអស់ៗពីខ្លួនរលីង ដីធ្លីផ្ទះសម្បែងត្រូវគេរឹបអូសយក។ សម្រាប់គ្រួសារបងប្អូនខ្ញុំផ្ទះហ្នឹង ពួកគាត់ ៧ ទៅ ៨គ្រួសារដែលរងគ្រោះ»។

ក្រុមពលរដ្ឋ​ដែល​អះ​អាង​ថា​បាន​ចាញ់​បោក​នោះ បាន​ទាមទារទៅរដ្ឋាភិបាល ឲ្យ​ស្រាវជ្រាវចាប់ប្រធានក្រុមហ៊ុន និងអ្នកពាក់ព័ន្ធមកដោះស្រាយសង់ប្រាក់ពួកគេវិញ ដោយថា ប្រសិនបើរដ្ឋាភិបាលមានឆន្ទៈក្នុងការចាប់ គឺជនឆបោកទាំងនោះមិនអាចរត់រួចឡើយ។

ជាជនពិការជើងខាងស្តាំមកខេត្តឧត្តមានជ័យដែលអះអាងថា បានចាញ់បោកលុយអស់ជាង ៣ម៉ឺនដុល្លា លោក វន វឹង និយាយថា ប្រសិនបើ​លោកនាយករដ្ឋមន្ត្រី ហ៊ុន សែន ចេញមុខជួយអន្តរាគមន៍ ពួកគាត់នឹងទទួលបានយុត្តិធម៌។

លោកបន្ថែមថា៖ «ចង់ឲ្យសម្តេចមានចំណាត់ការទៅលើក្រុមហ៊ុនហ្នឹង និងដៃជើងមួយចំនួន។ ពួកយើងខ្ញុំចង់បានតែសំណងមកវិញទេ មានលុយដើម លុយជំងឺចិត្តដែលខាតបង់ការរកស៊ីអស់រយៈពេលពេល ៤ ទៅ ៥ឆ្នាំ ហើយចំណែកច្បាប់ត្រូវដាក់ទោសទណ្ឌទៅ​លើ​ជនប្រព្រឹត្តិកុំឲ្យរកស៊ីអញ្ចឹងទៀត»។

អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា មួយរយៈចុងក្រោយនេះ លោកមិនបានតាមដានរឿងនេះទេ ដោយបង្វែឲ្យសួរទៅអ្នកនាំពាក្យអគ្គស្នងការនគរបាលជាតិវិញ ប៉ុន្តែ លោកថា សមត្ថកិច្ចកំពុងធ្វើការលើរឿងនេះ។

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ មានប្រសាសន៍ថា បើតាមរបាយការណ៍ គឺមិនមែនមានតែ ក្រុមហ៊ុន (EBC) មួយទេ ដែលមករកស៊ីបោកប្រាស់ពលរដ្ឋនោះ គឺមានក្រុមហ៊ុនផ្សេងៗទៀត។

លោក សន ជ័យ បន្តថា បញ្ហានេះកើតឡើងដោយសារការធ្វេសប្រហែលរបស់អាជ្ញាធរពាក់ព័ន្ធក្នុងការត្រួតពិនិត្យ និងគ្រប់គ្រងទៅលើដំណើររកស៊ីរបស់ក្រុមហ៊ុនទាំងនោះ។

លោកបន្ថែមថា៖ «ដោយសារតែអាជ្ញាធររដ្ឋគ្រប់គ្រងធ្វេសប្រហែលហើយដែលនាំឲ្យប្រជាពលរដ្ឋហ្នឹងបោះទុនទៅ ធ្វើឲ្យក្រុមហ៊ុន​ហ្នឹងបោក។ អញ្ចឹង​រឿងទប់ស្កាត់ ខ្ញុំយល់ថា ក្រុមហ៊ុនដែលរកស៊ីប្រភេទហ្នឹង ត្រូវតែមានការពិនិត្យឲ្យច្បាស់លាស់ពេលដែលពួកគេដាក់ពាក្យសុំប្រតិបត្តិការក្រុមហ៊ុន ដោយពិនិត្យទៅលើនីតិវិធី ឬក៏របៀបនៃប្រតិបត្តិការ ឬរកស៊ីនៅកម្ពុជាហ្នឹង។ អញ្ចឹងបើយើងពិនិត្យមើលទៅការរកស៊ីហ្នឹង ទំនងជាមិនមានប្រយោជន៍ដល់ប្រជាពលរដ្ឋទេ ត្រូវតែគិតតាំងពីដំបូងដែលពួកគេសុំប្រតិ្ត បត្តិការមកម៉្លេះ»។

កាលពីឆ្នាំ២០១៧ ក្រសួងមហាផ្ទៃ ក្រសួងយុត្តិធម៌ រួមទាំងស្ថាប័នពាក់ព័ន្ធផ្សេងទៀត បានធ្វើសន្និសិទសារព័ត៌មានមួយ ដោយបង្ហាញមុខមេខ្លោងមួយចំនួនមាន ឈ្មោះ លោក ស៊ាន តាន់ ជាក្រុមហ៊ុនអ៊ីប៉ីស៊ី (EBC) ឈ្មោះ ហួត សុវណ្ណ ជាប្រធានអង្គការមូលនិធិអភិវឌ្ឍន៍អាស៊ីអាគ្នេយ៍ ឈ្មោះ ជីហ្គោ សាលី ជាប្រធានសមាគមប្រឹក្សាយោបល់វិនិយោគ និងបក្សពួកផ្សេងទៀត។

ក្រោយសន្និសីទនោះ សមត្ថកិច្ចបានចាប់ខ្លួនមនុស្ស ២នាក់ បញ្ជូនទៅតុលាការ ដោយសង្ស័យថា ជាប់ពាក់ព័ន្ធជាមួយក្រុមហ៊ុន អ៊ីប៉ីស៊ី (EBC) ក្នុងករណីរឿងឆបោកប្រាក់ពលរដ្ឋនេះ។

កាលណោះ ក្រសួងមហាផ្ទៃឲ្យដឹងថា ក្រសួងទទួលបានពាក្យបណ្តឹងពីពលរដ្ឋប្រមាណ ៧ ៤៣០បណ្តឹង ក្នុងចំណោមជនរងគ្រោះ ៥ម៉ឺននាក់ និងទឹកប្រាក់ជាង ៦០លានដុល្លារ ប៉ុន្តែ កាលណោះ មន្រ្តីក្រសួងមហាផ្ទៃថា ទិន្នន័យពិតប្រាកដអាចមានច្រើនជាងនេះ៕

សរសេរមកកាន់ លោក ឃុត សុគន្ធ តាមរយៈ sokun@vodhotnews.com

Loading...

ចាប់អារម្មណ៍នឹងព័ត៌មានប្រភេទនេះ? ចុះឈ្មោះដើម្បីទទួលបានព័ត៌មានថ្មីៗ

Fields marked with an * are required