សមាជិកសហជីពមួយរូបបម្រើការងារនៅក្រុមហ៊ុនកាស៊ីណូ ហ្គ្រែន ដាយអឺម៉ន ស៊ីធី ក្នុងក្រុងប៉ោយប៉ែត ត្រូវបានក្រុមហ៊ុនព្យួរការងារ ក្រោយពីរាយការណ៍លក្ខខណ្ឌការងារក្នុងក្រុមហ៊ុនប្រាប់អ្នកសារព័ត៌មានវីអូឌីកាលពីសប្តាហ៍មុន។
សមាជិកសហជីពមូលដ្ឋានដែលជាសមាជិកសម្ព័ន្ធសហជីពចលនាកម្មករកម្ពុជា លោក អ៊ុំ ឆាយយ៉ា កាលពីថ្ងៃទី១៤កុម្ភៈ បានប្រាប់សារព័ត៌មានវីអូឌីជុំវិញបញ្ហាលក្ខខណ្ឌការងារមួយចំនួនក្នុងក្រុមហ៊ុនកាស៊ីណូឋ ហ្គ្រែន ដាយអឺម៉ន ស៊ីធី ដែលសហជីពចោទថា កំពុងអនុវត្តលក្ខខណ្ឌការងារផ្ទុយពីច្បាប់។
ប្រធានសហភាពចលនាកម្មករកម្ពុជា លោក ប៉ាវ ស៊ីណា បានសរសេរលើទំព័រហ្វេសប៊ុករបស់លោកកាលពីថ្ងៃម្សិលមិញថា សហជីព ១រូប គឺលោក អ៊ុំ ឆាយយ៉ា បម្រើការងារនៅកាស៊ីណូហ្គ្រែន ត្រូវបានក្រុមហ៊ុនព្យួរការងារហើយកាលពីម្សិលមិញនេះ។
លោក ប៉ាវ ស៊ីណា បន្តថា ករណីក្រុមហ៊ុនព្យួរការងារសហជីពនេះ គឺធ្វើឡើងទាំងកម្រោល និងខុសច្បាប់ស្តីពីការងារ ហើយថា បច្ចុប្បន្នក្រុមហ៊ុននេះ កំពុងស្ថិតក្នុងបណ្តឹងរបស់សហជីពពាក់ព័ន្ធរឿងមិនអនុវត្តច្បាប់ការងារនេះផងដែរ។
វីអូឌីមិនទាន់អាចសុំការឆ្លើយតបពីម្ចាស់ក្រុមហ៊ុន កាស៊ីណូហ្គ្រែន ដាយអឺម៉ន ស៊ីធី បានទេជុំវិញការព្យួរការងារមន្រ្តីសហជីពនេះ។
ប្រធានមន្ទីរការងារខេត្តបន្ទាយមានជ័យ លោក រស់ សារុំ មានប្រសាសន៍ថា ប្រសិនបើក្រុមហ៊ុននោះរំលោភសិទ្ធិ ឬរំលោភច្បាប់ការ សហជីព ឬកម្មករ និយោជិតត្រូវដាក់ពាក្យបណ្ដឹងទៅមន្រ្តីការងារ ឬក្រសួងការងារ មិនត្រូវរាយការណ៍ប្រាប់សារព័ត៌មានបែបនេះទេ ដោយលោកថា ការធ្វើបែបនោះ វាអាចប៉ះពាល់សិទ្ធិរបស់ក្រុមហ៊ុន។
លោកបន្ថែមថា៖ «កម្មករនិយោជិតស្ថិតនៅក្រោមច្បាប់ស្តីពីការងារទាំងអស់ បើសិនជាក្រុមហ៊ុនធ្វើអ្វីដែលមិនបានត្រឹមត្រូវ ត្រូវលើកសំណើរទៅក្រុមហ៊ុនសុំឲ្យកែលម្អ។ ប្រសិនបើក្រុមហ៊ុន ឬនិយោជកនោះមិនព្រមកែលម្អ សហជីព ឬកម្មករនោះ ត្រូវធ្វើពាក្យបណ្តឹងមួយមកមន្ទីរការងារ ដើម្បីធ្វើការសម្របសម្រួល និងធ្វើការផ្សះផ្សារ។ ប្រសិនបើមន្ទីរការងារសម្របសម្រួសមិនបានទេ យើងនឹងបញ្ជូនទៅក្រុមប្រឹក្សាអជ្ញាកណ្តាល ហើយក្រុមប្រឹក្សាដោះស្រាយមិនបាន ភាគីទាំងពីរអាចប្តឹងទៅតុលាការបន្តទៀត មិនដើរទៅបរហារកេរ្តិ៍ក្រុមហ៊ុនគេបានទេ»។
ប្រធានកម្មវិធីចងក្រងនៅមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) អ្នកស្រី ឆន សុខា មានប្រសាសន៍ថា សហជីព ឬកម្មករ មានសិទ្ធិរាយការណ៍ទៅគ្រប់ភាគីពាក់ព័ន្ធនូវបញ្ហាលក្ខខណ្ឌការងាររបស់ពួកគេ ប្រសិនក្រុមហ៊ុននោះអនុវត្តផ្ទុយច្បាប់ការងារ។ ប៉ុន្តែ អ្នកស្រីថា កម្មករ ឬសហជីពមិនអាចរាយការណ៍ព័ត៌មានសម្ងាត់របស់ក្រុមហ៊ុនបានឡើយ។
កាលពីថ្ងៃទី១៤កុម្ភៈ សមាជិកសហជីពចលនាកម្មករកម្ពុជាប្រចាំក្រុមហ៊ុន កាស៊ីណូហ្គ្រែន ដាយអឺម៉ន ស៊ីធី លោក អ៊ុំ ឆាយយ៉ា ប្រាប់វីអូឌីថា៖ «ក្រុមហ៊ុនអនុវត្តការងារច្រើនម៉ោងរហូតដល់១២ម៉ោង ទី២ថ្ងៃឈប់សម្រាក ការឈប់សម្រាក របស់បុគ្គលិកអត់ធ្វើតាមច្បាប់ទេ១ខែគាត់ឈប់បានតែ២ថ្ងៃទេ ហើយការដាក់ទោសពិន័យបុគ្គលិកហ្នឹងអត់ អនុវត្តតាមច្បាប់ទេ គឺធ្វើតាមតែអំពើចិត្តរបស់ថៅកែដូចថាថៅកែមិនពេញចិត្តរឿងអីមួយចង់ដកចោលដកចោល និងមួយទៀតធ្វើការលួចម៉ោងពេក ដូចថាវាលោតម៉ោងលឿនពេក ធ្វើឲ្យបុគ្គលិកពីបាកធ្វើការងារ»។
កាលពីថ្ងៃទី១២កុម្ភៈ សហជីពបានចោទក្រុមហ៊ុនកាស៊ីណូ ២ នៅក្រុងប៉ោយប៉ែត គឺក្រុមហ៊ុនកាស៊ីណូហ្គ្រែន ដាយអឺម៉ន ស៊ីធី និងក្រុមហ៊ុន កាស៊ីណូ DNA Star អនុវត្តលក្ខខណ្ឌការងារផ្ទុយពីច្បាប់ការងារ។
កាលនោះ សហជីពបាន ស្នើទៅមន្ទីរការងារខេត្តបន្ទាយមានជ័យ ឲ្យចុះពិនិត្យមើលអំពីស្ថានភាពលក្ខខណ្ឌការងារនៅក្រុមហ៊ុនកាស៊ីណូទាំងពីរនោះ និងបណ្តាក្រុមហ៊ុនផ្សេងៗទៀត ដែលកំពុងដំណើរការក្នុងខេត្តនេះ ឲ្យអនុវត្តច្បាប់បានត្រឹមត្រូវ៕
