ប្រធានអង្គភាពប្រឆាំងអំពើពុករលួយលោក ឱម យ៉ិនទៀង ប្រកាសថា អង្គភាពនឹងធ្វើកោសលវិច័យសំឡេងខ្សែអាត់ដែលត្រូវគេអះអាងថាជាសំឡេងសារសងគ្នារវាងលោក កឹម សុខា ជាមួយនារីកំណាន់ចិត្ត ដោយលោកថា ក្រោយបានលទ្ធផល អង្គភាពនឹងប្រជុំពិភាក្សាម្ដងទៀតនៅថ្ងៃព្រហស្បតិ៍ដើម្បីសម្រេចថាត្រូវចាត់ការឬមិនចាត់ពាក្យបណ្ដឹងរបស់យុវជនមួយក្រុមប្រឆាំងលោក កឹម សុខា។
ក្នុងកិច្ចប្រជុំពិភាក្សាមួយនៅអង្គភាពប្រឆាំងអំពើរលួយនៅព្រឹកថ្ងៃអង្គារនេះ ដើម្បីវិភាគទៅលើពាក្យបណ្ដឹងរបស់ក្រុមយុវជនដែលប្ដឹងលោក កឹម សុខា ករណីចោទប្រកាន់រឿងអាស្រូវស្នេហា លោក ឱម យ៉ិនទៀង បានមានប្រសាសន៍ថា ខ្សែអាត់សំឡេងដែលត្រូវគេអះអាងថាជាសំឡេងលោក កឹម សុខា នោះគឺជាធាតុផ្សំសំខាន់ជាងគេនៅពាក្យបណ្ដឹងរបស់ក្រុមយុវជន។ លោកបានបញ្ជាទៅនាយកដ្ឋានកោសលវិច័យនៃអង្គភាពនេះឲ្យធ្វើកោសលវិច័យលើសំឡេងខ្សែអាត់ដែលត្រូវបានផ្សព្វផ្សាយតាមបណ្ដាញសង្គម និងសារព័ត៌មាន។
លោក ឱម យ៉ិនទៀង បន្តថា ប្រសិនបើលទ្ធផលបង្ហាញថាសំឡេងនោះពិតជាសំឡេងរបស់លោក កឹម សុខា នោះអង្គភាពនឹងធ្វើការវិភាគទៅលើអត្ថន័យនៃសំឡេងខ្សែអាត់នោះថាមានតម្រុយអំពើពុករលួយឬទេ។ លោកថា អង្គភាពក៏នឹងប្រមូលភស្តុតាងពីប្រភពផ្សេងៗទៀតផងដែរ ដើម្បីប្រជុំសម្រេចនៅថ្ងៃព្រហស្បតិ៍លើពាក្យបណ្ដឹងនោះ។
លោក ឱម យ៉ិនទៀង មានប្រសាសន៍ថា៖ “នាយកដ្ឋានបច្ចេកទេសរបស់យើងខ្ញុំ កោសល្យវិច័យយើងខ្ញុំជាអ្នក គេធ្វើ(កោសល្យវិច័យសំឡេង)ទៀត នាយកដ្ឋានចារកម្មនឹងផ្ដល់ឯកសារចាស់មកឲ្យយើងខ្ញុំថែមទៀត។ យើងខ្ញុំនឹង បានន័យថា នៅភាគបន្តការពិភាក្សានៅឡើយ ហើយថ្ងៃខានស្អែក (ថ្ងៃព្រហស្បតិ៍) អាចជូនថាយើងខ្ញុំទទួលទេ បើយើងខ្ញុំទទួល ទទួលធ្វើត្រឹមណា? យើងខ្ញុំនឹងឆ្លើយជាផ្លូវការទៅម្ចាស់បណ្ដឹងដោយមិនលាក់លៀមជាមួយសារព័ត៌មានទេ ថាយើងខ្ញុំទទួលឬមិនទទួល ហើយបើទទួលយើងខ្ញុំធ្វើអីខ្លះ”។
គួរបញ្ជាក់ថា កាលពីថ្ងៃសុក្រសប្ដាហ៍មុន យុវជនមួយក្រុមមានគ្នាប្រមាណ៣០នាក់ដែលអះអាងថាជានិស្សិតមកពីសាកលវិទ្យាល័យរដ្ឋនិងឯកជន បានដាក់ពាក្យបណ្ដឹងទៅអង្គភាពប្រឆាំងអំពើពុករលួយ ដោយក្រុមយុវជនអះអាងថាពួកគេសង្ស័យថា លោក កឹម សុខា បានផ្ដល់លុយឲ្យស្រីស្នេហ៍ទិញផ្ទះនិងដី ហើយអាចជាប់ពាក់ព័ន្ធអំពើពុករលួយ៕ ដោយលោក អុិត សូធឿត និងកញ្ញា ខាន់ លក្ខិណា
