សហព័ន្ធសហជីពជាង២០បានដាក់ញត្តិរួមគ្នាជំរុញឲ្យប្រមុខរដ្ឋាភិបាលកែសម្រួលសេចក្តីព្រាងច្បាប់ស្តីពីសហជីពដ៏ចម្រោងចម្រាសបន្ថែមទៀតដែលពួកគេថាដើម្បីឲ្យច្បាប់នោះធានាដល់សេរីភាពលើកកម្ពស់សិទ្ធិការងារក្នុងវិស័យកាត់ដេរនៅកម្ពុជា។
ការបន្តជំរុញរបស់ក្រុមសហជីពនេះធ្វើឡើងចំពេលដែលរដ្ឋសភាបញ្ជូនសេចក្តីព្រាងច្បាប់នោះទៅទីស្តីការគណៈរដ្ឋមន្ត្រីវិញ ក្រោយពីមានការតវ៉ាដ៏ចម្រូងសចម្រាសមួយរបស់សហជីពនៅមន្ទីរដ្ឋសភាពេលសេចក្តីព្រាងច្បាប់នោះធ្លាក់ដល់ដៃអ្នកតំណាងរាស្ត្រ។
ប្រាប់អ្នកសារព័ត៌មាននៅមុខទីស្តីការគណៈរដ្ឋមន្ត្រីក្រោយពីដាក់ញត្តិនាព្រឹកថ្ងៃទី២២ខែមីនានេះប្រធានសហភាពការងារកម្ពុជាលោក អាត់ ធន់ អះអាងថាសេចក្តីព្រាងច្បាប់ចុងក្រោយនោះលោកថារដ្ឋសភាបានកែសម្រួលបានត្រឹម២០ភាគរយប៉ុណ្ណោះ។
លោក អាត់ ធន់ ឲ្យដឹងទៀតថាការកែសម្រួលបានតិចតួចរបស់រដ្ឋសភានេះលោកថាធ្វើឲ្យសេចក្តីព្រាងច្បាប់នេះនៅតែជាឧបសគ្គដល់សេរីភាពធ្វើសកម្មភាពលើកកម្ពស់សិទ្ធិការងារ។
បើតាមលោក អាត់ ធន់ ខ្លឹមសារដែលនៅជាបញ្ហាប្រឈមនៅឡើយនោះ មានមាត្រា៦ មាត្រា១៣-១៤-១៩ និង២៤ ដែលលោកថាតម្រូវឲ្យមានសមាជិកសហជីពចាប់ពី៥០បូក១ឡើងទៅទើបអាចធ្វើការតស៊ូមតិបាន។ ភាគីពាក់ព័ន្ធរួមទាំងថៅកែផងអាចស្នើសុំឲ្យរំលាយសហជីពបាន ការបង្កការលំបាកពេលសហជីពសុំចុះបញ្ជីការ និងការត្រួតពិនិត្យហិរញ្ញវត្ថុ សហជីពជាដើម។
លោក អាត់ ធន់ អះអាងទៀតថាបើរដ្ឋាភិបាលមិនពិចារណាលើសំណើរបស់សហជីពនេះទេ លោកថាច្បាប់នោះមិនបានជួយជំរុញលក្ខខណ្ខការងារទេ តែលោកថាច្បាប់នោះបានបង្កភាពងាយស្រួលដល់ភាគីម្ខាងទៀតឲ្យបន្តរំលោភសិទ្ធិកម្មករ។
លោកបន្តថា៖ “ព្រោះខ្ញុំដឹងថានិយោជកហ្នឹងខូចមែនទែន ហើយនិយោជកហ្នឹងគឺចង់ឲ្យច្បាប់ហ្នឹងមានឥទ្ធិពលដើម្បីឲ្យសហជីពហ្នឹងចុះខ្សោយអញ្ចឹងគេពូកែបញ្ចុះបញ្ចូលរដ្ឋាភិបាលបញ្ចុះបញ្ចូលមន្ត្រីមួយចំនួនអញ្ចឹងយើងអត់មានឱកាសធ្វើអញ្ចឹង អញ្ចឹងហើយបានជាយើងចង់ជួបប្រមុខរាជរដ្ឋាភិបាលចង់ពន្យល់នូវអ្វីដែលជាចំនុចដែលយើងបារម្ភហ្នឹង”។
ប្រធានសហព័ន្ធសហជីពចលនាកម្មករលោក ប៉ាវ ស៊ីណា ដែលបានចូលរួមដាក់ញត្តិដែរអះអាងថាបើច្បាប់សហជីពមិនបានជួយលើកទឹកចិត្តដល់អ្នកធ្វើការលើកកម្ពស់សិទ្ធិការងារទេ លោកថាអ្នកដែលរងគ្រោះមុនគេគឺកម្មករក្នុងវិស័យកាត់ដេរ ខណៈដែលប្រព័ន្ធច្បាប់មិនអាចចាត់វិធានការទៅលើក្រុមហ៊ុនខិលខូចបាននោះ។
លោកថា៖ “អ្វីដែលសំខាន់សម្រាប់វិស័យការងារយើងឃើញថាភាគីនិយោជកគឺគេពិតជាមានឥទ្ទិពលជាងហើយ បើទោះបីយើងពិនិត្យឃើញថាកម្មករនោះមិនបានប្រព្រឹត្តិខុសក៏ដោយ ប៉ុន្តែសំខាន់បើនិយោជកប្តឹងគឺសម្ពាធពីតុលាការហ្នឹងតែងតែដាក់កំហិតមកលើកម្មករហ្នឹងទៅជាអ្នកខុសទៅវិញ។ ដូច្នេះសម្រាប់ខ្ញុំ ខ្ញុំអត់មានជំនឿទៅលើប្រព័ន្ធតុលាការអាជ្ញាគតិទេ។ ហើយក៏សង្ឃឹមថារដ្ឋាភិបាលនឹងបង្កើតតុលាការងារមួយដែលមានលក្ខណៈឯករាជ្យតម្លាភាពហើយស្ថាប័ននោះគួរតែរាប់បញ្ចូលទាំងភាគីតំណាងកម្មករផងដែរដើម្បីឲ្យវាមានតម្លាភាពបាទ”។
យ៉ាងណាក៏ដោយអនុរដ្ឋលេខាធិការនិងជាទីប្រឹក្សាគណៈរដ្ឋមន្ត្រីទទួលបន្ទុកពាក្យបណ្តឹងលោក សេង សាវន ដែលចេញមកទទួលញត្តិបានការពាររដ្ឋាភិបាលថាប្រមុខរដ្ឋាភិបាលតែងយកចិត្តទុក្ខដាក់រាល់កង្វល់របស់ពលរដ្ឋទូទៅនិងធានាថាលោកនឹងបញ្ជូនញត្តិនេះដល់ដៃនាយករដ្ឋមន្ត្រី។
លោកថា៖ “ចំពោះរដ្ឋាភិបាលអស់លោកដឹងស្រាប់ហើយសម្តេចលោកបើកចិត្តទូលាយណាស់លោកមិនដែលគាបសង្កត់សហជីពឬបងប្អូនកម្មករឬអ្វីទាំងអស់ហ្នឹងនិយាយរួមទៅជាពលរដ្ឋខ្មែរទាំងអស់គ្នា ស្រឡាញ់ខ្មែរទាំងអស់គ្នា”។
បើតាមញត្តិរបស់សហជីពសេចក្តីព្រាងច្បាប់ចុងក្រោយនេះនៅតែមិនទាន់មានលក្ខខណ្ខល្អប្រសើរនិងអនុលោមតាមអនុសញ្ញាអន្តរជាតិខាងការងារនៅឡើយទេ។
ក្នុងញត្តិនោះឲ្យដឹងទៀតថាច្បាប់នោះមិនបានធ្វើឲ្យប្រសើរដល់ទំនាក់ទំនងវិជ្ជាជីវៈទេ តែផ្ទុយទៅវិញពួកគេថាច្បាប់នោះបានបន្ថយនូវសិទ្ធិដែលបានផ្តល់ដោយច្បាប់ស្តីពីការងារនិងសិទ្ធិចងក្រងសហជីពស្របតាមរដ្ឋធម្មនុញ្ញនិងអនុសញ្ញារបស់អង្គការ ILO។
ញត្តិបញ្ជាក់ទៀតថាខ្លឹមសារខ្លះក្នុងសេចក្តីព្រាងច្បាប់នោះបានផ្តល់ឱកាសឲ្យនិយោជកឬសមាគមនិយោជកបដិសេធមិនចរចាជាមួយសហជីពដោយស្របច្បាប់ បង្ករឲ្យមានវិវាទច្រើនទៅថ្ងៃខាងមុខនៅពេលដែលច្បាប់នេះត្រូវបានរដ្ឋសភាអនុម័ត ឲ្យប្រើប្រាស់។
តំណាងភាគីរោងចក្រធ្លាប់អះអាងថាបច្ចុប្បន្ននេះរោងចក្រសហគ្រាសមួយមានសហជីពពី២ទៅ៣និងអាចច្រើនជាងនេះបង្កឲ្យមានវិវាទការងារជាញឹកញាប់ដែលពួកគេថាធ្វើឲ្យប៉ះពាលដល់សង្វាក់ផលិតកម្មនិងបង្កការលំបាកដល់ការប្រកួតប្រជែង ជាមួយប្រទេសជិតខាង៕