ផ្លូវលំមួយខ្សែប្រវែងប្រហែលជាង១០គីឡូម៉ែត្រស្ថិតនៅភូមិសែនអភិវឌ្ឍន៍១ -២ និងភូមិ អូធំមានការខូចខាតស្ទើរទាំងស្រុង មានកន្លែងខ្លះតម្រូវឲ្យធ្វើដំណើរវាងខាងក្រោមផ្លូវលំដែលធ្វើឲ្យប៉ពាល់ដល់ប្រជាពលរដ្ឋនៅតំបន់នោះរាប់រយគ្រួសារ។ ការនេះបានធ្វើឲ្យគ្រួសារខ្លះ បានចាកចេញមកនៅឯភូមិចាស់
វិញ។
អ្នកស្រី ញ៉េប ខា បានមានប្រសាសន៍ថា “ រូបខ្ញុំសូម្បីសម្រាលកូនគឺត្រូវសម្រាលនៅផ្ទះ មិនបានទៅ មណ្ឌលសុខភាពទេ ព្រោះបើទៅមណ្ឌលសុខភាពចម្ងាយជិត ៣០គីឡូម៉ែត្រ ហើយផ្លូវក៏ពិបាកខ្លាំង ដែលអាចនឹងគ្រោះថ្នាក់តាមផ្លូវ ”។ អ្នកស្រីបន្តថា ការនេះមិនមែនតែអ្នកស្រីម្នាក់ទេ សូម្បីតែប្រជាពលរដ្ឋដទៃទៀតក៏ ព្រួយបារម្ភខ្លាំងដូចគ្នាដែរ ពេលមានជម្ងឺឈឺស្កាត់ ពិសេសនៅពេលយប់ព្រលប់។
លោក ចឹក ជន អនុភូមិ សែនអភិវឌ្ឍន៌១ បានថ្លែងថា លោកបានលើកនិងសរសេរបញ្ហានេះដាក់ចូល
ក្នុងផែនការវិនិយោគឃុំ សង្កាត់រួចហើយ ប៉ុន្តែមិនទាន់មានការឆ្លើយតបយ៉ាងណានៅឡើយទេ។ លោកបានបន្តដោយទទួលស្គាល់នូវការលំបាកនិងក្តីបារម្ភរបស់ប្រជាពលរដ្ឋយ៉ាងដូច្នេះថា “ ពេលមានភ្លៀងធ្លាក់ម្តងៗ ចំពេលប្រជុំប្រចាំខែសូម្បីខ្ញុំក៏ត្រូវអូសម៉ូតូបែកញើសទាំងព្រឹកដូចគ្នាដែរ ”៕
ដោយពលរដ្ឋអ្នកសារព័ត៌មានខេត្តកំពង់ធំ ជាម វឿន
