លោកនាយករដ្ឋមន្ត្រីហ៊ុន សែន ថ្លែងបែបចំអកទៅអតីតមន្ត្រីបក្សប្រឆាំងមួយចំនួនដែលកំពុងជាប់ឃុំថា មិនអនុញាតឲ្យមានសេរីភាពនោះទេដោយថា អតីតមេដឹកនាំបក្សនេះដើរបំផុសបំផុលរឿងមិនល្អនៅក្រៅប្រទេស។
ក្នុងជំនួបសំណេះសំណាលជាមួយកម្មករកាលពីម្សិលមិញ លោក ហ៊ុន សែន បានថ្លែងទំនងជាចំអកទៅអតីតមន្ត្រីបក្សសង្គ្រោះជាតិរួមមានលោក កឹម សុខា លោក អ៊ំ សំអាន លោក មាជ សុវណ្ណារ៉ា និងមន្ត្រីបក្សនេះមួយចំនួនទៀតថា លោកមិនអនុញ្ញាតឲ្យអ្នកទាំងនោះនៅក្រៅឃុំទេ។
លោកថ្លែងថា«អ្នកជាប់គុកនៅភ្នំពេញ ដែលសុំលើកលែងទោស ក៏ត្រូវតែជាប់គុកបន្ថែមដែរ គ្មានលើកឲ្យឯងទេ មេចង្រៃវាធ្វើសកម្មភាពបែបហ្នឹង សុំបន្តជាប់គុកបន្តទៀតទៅ ឯងដោះលែង ហុង សុខហួរ មួយ គេថាសម្ពាធអន្តរជាតិ…បើកាលណានៅតែបន្តធុនហ្នឹង…មិនលើកលែងទោសឲ្យអ្នកណាទេ ហើយមិនបាច់ បញ្ជូលក្នុងការលើកលែងទោសទេ ព្រោះអ្នកខ្លះសាលក្រមមិនទាន់ចូលជាស្ថាពរ នៅក្តីនៅឡើយ ទុកវានៅហ្នឹង ព្រោះមេវាប្រហើនពេក»។
លោកមេធាវី សុក សំអឿន បានពន្យល់តាមនីតិវិធីច្បាប់ជាទូទៅថា ច្បាប់ចែងថា មិនឲ្យបុគ្គលគ្រប់រូបជ្រៀតជ្រែកកិច្ចការតុលាការនោះទេ ប៉ុន្តែលោកថា ច្បាប់មិនបានចែងដាក់ទោសអ្នកដែលជ្រៀតជ្រែកកិច្ចការរបស់តុលាការនោះឡើយ។ប៉ុន្តែលោកយល់ថា ប្រសាសន៍របស់លោក ហ៊ុន សែន អាចធ្វើឲ្យសាធារណៈជនមានការភ័ន្តច្រឡំលើស្ថាប័នតុលាការថា មិនមានភាពឯករាជ្យ។
លោកថ្លែងថា«ការនិយាយបែបហ្នឹង អាចធ្វើឲ្យអ្នកស្តាប់គេយល់ប្រឡំថា តុលាការយើងវាអត់ឯករាជ្យភាព មតិសាធារណៈជនគេគិតថាចឹង ដល់ពេលតុលាការសម្រេចទៅតាម ឧប្បមាថា តុលាការសម្រេចផ្ទុយពីហ្នឹងវាអត់អីទេ តុលាការសម្រេចតាមវាទៅជា នាំគ្នាគិតថា តុលាការកាត់ក្តីតាមអ្នកនយបាយ វាទៅជាចឹងវិញ»។
មាត្រា១២៨ថ្មី និង១២៩ថ្មី នៃរដ្ឋធម្មនុញ្ញ បានចែងថា អំណាចតុលាការជាអំណាចឯករាជ្យ ហើយចៅក្រមត្រូវបំពេញភារកិច្ចរបស់ខ្លួន ដោយគោរពច្បាប់យ៉ាងម៉ឺងម៉ាត់ និងស្របតាមសម្បជញ្ញៈរបស់ខ្លួន។
សាលាដំបូងរាជធានីភ្នំពេញ កាលពីថ្ងៃទី២០ ខែកក្កដា ឆ្នាំ២០១៥ បានកាត់ទោស លោក មាជ សុវណ្ណរ៉ា ដាក់ពន្ធនាគាររយៈពេល២០ឆ្នាំពីបទដឹកនាំកុបកម្មនិងចូលរួមចលនាកុបកម្ម បន្ទាប់ពីការតវ៉ាឲ្យបើកទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤។
ក្រៅពីលោក មាជ សុវណ្ណរ៉ា ចៅក្រមសាលាដំបូងរាជធានីភ្នំពេញក៏បានសម្រេចផ្តន្ទាទោសសកម្មជនទាំង១១នាក់របស់គណបក្សសង្គ្រោះជាតិឲ្យជាប់ពន្ធនាគារម្នាក់ៗពី៧ទៅ២០ឆ្នាំក្នុងសំណុំរឿងដូចគ្នានេះដែរ។
ក្រោយមកទៀត សាលាដំបូងរាជធានីភ្នំពេញ កាលពីថ្ងៃទី១០ ខែតុលា ឆ្នាំ២០១៦ បានសម្រេចផ្តន្ទាទោស លោក អ៊ុំ សំអាន ដាក់ពន្ធនាគារ២ឆ្នាំ៦ខែ និងពិន័យជាប្រាក់៤លានរៀល ដោយចោទពីបទបទញុះញង់ឲ្យប្រព្រឹត្តបទឧក្រិដ្ឋជាអាទិ៍ បង្កភាពវឹកវរធ្ងន់ធ្ងរដល់សន្តិសុខ សង្គម និងញុះញង់ឲ្យមានការរើសអើង ក្រោយពីអតីតតំណាងរាស្ត្ររូបនេះ និយាយថា ការបោះបង្គោលព្រំដែន តាមសន្ធិសញ្ញាបំពេញបន្ថែម ឆ្នាំ២០០៥ ធ្វើឲ្យកម្ពុជាបាត់ដីខ្លះទៀតទៅវៀតណាម។
ចំណែក លោក កឹម សុខា កំពុងស្ថិតនៅក្រោមការឃុំខ្លួនអស់រយៈពេលជាង ៦ខែមកហើយ ចាប់តាំងពីលោកត្រូវបានសមត្ថកិច្ចចាប់ខ្លួនកាលពីដើមខែកញ្ញាឆ្នាំមុន ក្រោមការចោទប្រកាន់ពីរដ្ឋាភិបាលថា «ក្បត់ជាតិ» និង «ឃុបឃិត» ជាមួយបរទេស ប៉ុនប៉ងផ្ដួលរំលំរដ្ឋាភិបាលស្របច្បាប់ ប៉ុន្តែ គណបក្សប្រឆាំងតែងតែច្រានចោលការចោទប្រកាន់នេះ៕