ក្រសួងអប់រំកម្ពុជា បានឲ្យដឹងថា មនុស្សរាប់រយនាក់ បានចូលរួមក្នុងព្រឹត្តិការណ៍រត់ Baton Run នៅព្រឹកថ្ងៃនេះ ជាផ្នែកមួយឆ្ពោះទៅកាន់ការប្រកួតកីឡាថ្នាក់តំបន់ ដែលគ្រោងរៀបចំធ្វើឡើងនៅប្រទេសម៉ាឡេស៊ី ក្នុងឆ្នាំនេះ។
នៅលើទំព័រហ្វេសប៊ុករបស់ខ្លួន ក្រសួងអប់រំ យុវជន និងកីឡា បានឲ្យដឹងថា ព្រឹត្តិការណ៍រត់ Baton Run ត្រូវបានរៀបចំធ្វើឡើង នៅព្រឹកថ្ងៃនេះ ដោយចេញដំណើរពីមុខស្ថានទូតម៉ាឡេស៊ី ឆ្ពោះទៅកាន់ពហុកីឡដ្ឋានជាតិអូឡាំពិក។
វីដេអូដែលផ្សាយផ្ទាល់លើទំព័រហ្វេសប៊ុករបស់ក្រសួងអប់រំ បានបង្ហាញរដ្ឋមន្ត្រីអប់រំ លោក ហង់ ជួនណារ៉ុង មន្ត្រីអប់រំជាច្រើននាក់ទៀត ព្រមទាំងមហាជនរាប់រយនាក់ទៀតស្ថិតក្នុងសម្លៀកបំពាក់កីឡា រត់ក្នុងល្បឿនយឺតៗ ចេញពីមុខស្ថានទូតម៉ាឡេស៊ី នៅលើមហាវិថីព្រះនរោត្ដម។
ក្រសួងបញ្ជាក់ថា ព្រឹត្តិការណ៍នេះ ត្រូវបានរៀបចំឡើងដើម្បីឆ្ពោះទៅកាន់ការប្រកួតកីឡាស៊ីហ្គេមលើកទី ២៩ និងកីឡាស៊ីប៉ារ៉ាហ្គេមលើកទី ៩ ដែលនឹងរៀបចំធ្វើឡើងនៅប្រទេសម៉ាឡេស៊ី ក្នុងឆ្នាំនេះ៕
