មនុស្សដល់ទៅ ៥៩នាក់ ត្រូវបានសមត្ថកិច្ចចាប់ខ្លួននៅក្នុងប្រតិបត្តិការបង្ក្រាបគ្រឿងញៀននៅទូទាំងប្រទេស កាលពីថ្ងៃម្សិលមិញនេះ។ នេះដោយយោងតាមតួលេខរបស់នគរបាល ដែលត្រូវបានផ្សព្វផ្សាយនៅលើវេបសាយនគរបាលជាតិ។
របាយការណ៍នគរបាលជាតិ បានឲ្យដឹងថា បទល្មើសគ្រឿងញៀន ២៥ករណី ត្រូវបានសមត្ថកិច្ចបង្ក្រាបបានត្រឹមមួយថ្ងៃម្សិលមិញនេះ ដោយឃាត់ខ្លួនមនុស្សដល់ទៅ ៥៩នាក់ ក្នុង ៣៩នាក់ មានជាប់ពាក់ព័ន្ធនឹងការជួញដូរគ្រឿងញៀន។
បទល្មើសគ្រឿងញៀន កើតឡើងរៀងរាល់ថ្ងៃ ដោយឃាត់ខ្លួនមនុស្សបានជាង ៧០០០នាក់ នៅក្នុងប្រតិបត្តិការបង្ក្រាបគ្រឿងញៀនចាប់ពីថ្ងៃទី០១ ខែមករា រហូតដល់ត្រឹមថ្ងៃម្សិលមិញនេះ៕