បញ្ញត្តិករអ៊ិនធឺណិតចិនបានចាប់ផ្ដើមយុទ្ធនាការថ្មីមួយបោសសម្អាតលើពាក្យពេចន៍នានានៅលើបណ្ដាវេបសាយនានា ដើម្បីទប់ស្កាត់អ្វីដែលចិនចាត់ទុកជា «អត្ថបទបង្កគ្រោះថ្នាក់» និងជំរុញឲ្យបង្ហាញតែពាក្យពេចន៍ទាំងឡាយដែលចិនគិតថា «មានប្រយោជន៍និងមានចេតនាល្អ»។
នៅក្នុងសេចក្ដីប្រកាសព័ត៌មាននៅល្ងាចថ្ងៃអង្គារម្សិលមិញ រដ្ឋបាលអ៊ិនធឺណិតចិនបាននិយាយថាការបង្ក្រាបទៅលើពាក្យពេចន៍ទាំងឡាយត្រូវបានធ្វើឡើងដើម្បីចាត់ការបញ្ហាចម្បងៗ។
ទីភ្នាក់ងារព័ត៌មានរ៉យទ័របានរាយការណ៍ថារដ្ឋាភិបាលចិនបានអនុវត្តរួចមកហើយនូវការគ្រប់គ្រងយ៉ាងទូលំទូលាយលើប្រព័ន្ធអ៊ិនធឺណិតនិងព្យាយាមរៀបចំគោលនយោបាយប្រព័ន្ធអ៊ិនធឺណិតដាក់ចូលក្នុងច្បាប់។
អនុប្រធានបញ្ញត្តិករអ៊ិនធឺណិតចិន លោក Ren Xianliang បាននិយាយថាពួកគេចង់អនុវត្តនូវការបោសសម្អាតទ្រង់ទ្រាយធំមួយចំពោះការប្រើពាក្យពេចន៍របស់អ្នកប្រើប្រាស់អ៊ិនធឺណិតនិងធ្វើឲ្យមានភាពងាយស្រួលសម្រាប់ប្រជាជនរាយការណ៍ពីអត្ថបទឬពាក្យពេចន៍ខុសច្បាប់ឬគ្រោះថ្នាក់មួយចំនួន។
ក្រុមមន្ត្រីនិយាយថាការរឹតបន្តឹងលើប្រព័ន្ធអ៊ិនធឺណិតនេះក្នុងនោះមានទាំងវេបសាយ Google និង Facebook ផងដែរនោះគឺជារឿងចាំបាច់ ដើម្បីធានាសុវត្ថិភាពនៅចំពោះមុខការគំរាមកំហែងដូចជាអំពើភេវរកម្មជាដើម។
ប៉ុន្តែរដ្ឋាភិបាលនិងក្រុមហ៊ុនបរទេសបានចាត់ទុកការរឹតត្បិតនេះគឺជាបញ្ហាពាណិជ្ជកម្មទៅវិញ៕