រដ្ឋាភិបាលបានប្រកាសជំហរថានឹងរក្សាឈ្មោះឆ្នេរអូរឈើទាលឲ្យនៅដដែល ដោយមិនប្តូរឈ្មោះនៅខ្លោងទ្វារច្រកចូលថា “ឆ្នេរសមុទ្រសម្តេចតេជោសែន” ដូចការលើកឡើងលើបណ្តាញសង្គមហ្វេសប៊ុកនោះទេ។
ការប្រកាសជំហរនេះ ធ្វើឡើងបន្ទាប់ពីមានការរិះគន់ជាច្រើនលើបណ្តាញសង្គមហ្វេសប៊ុក នៅពេលគេឃើញហ្វេសប៊ុករបស់រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់លោក ជា សុផារ៉ា បានបង្ហោះរូបភាពឆ្នេរនិងមានសរសេរជាអក្សរថា “ឆេ្នរសមុទ្រខេត្តព្រះសីហនុនឹងចាប់ផើ្តមសាងសង់នៅថ្ងៃទី១៨ ខែមិថុនា ឆ្នាំ២០១៦ និងជាបន្តបនា្ទប់ ដោយមានការចូលរួមពីប្រជាពលរដ្ឋនិងសប្បុរសជនក្នុងប្រទេស“។ ចំណែកក្នុងរូបភាពប្លង់មានសរសេរជាអក្សរថា ខ្លោងទ្វារច្រកចូល “ឆ្នេរសមុទ្រសម្តេចតេជោសែន” ។
រដ្ឋបាលខេត្តព្រះសីហនុ បានចេញសេចក្តីប្រកាសព័ត៌មាននៅថ្ងៃពុធនេះថា រដ្ឋាភិបាល គណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា គណៈកម្មការធិការគ្រប់គ្រង និងអភិវឌ្ឍន៍ឆ្នេរសមុទ្រកម្ពុជាខេត្ត និងរដ្ឋបាលខេត្តព្រះសីហនុ ពុំមានផែនការ កែប្រែឈ្មោះឆ្នេរអូរឈើទាល ទៅឈ្មោះ “ឆ្នេរសមុទ្រសម្តេចតេជោសែន” ដូចការលើកឡើងលើបណ្តាញសង្គមហ្វេសប៊ុកនោះទេ ដោយថាអ្នកលើកឡើងនោះធ្វើដោយមានការយល់ច្រលំ។
យ៉ាងណាក៏ដោយអ្នកលេងហ្វេសប៊ុកដែលមានProfile ឈ្មោះ ហៃ វណ្ណា បានកត់សំគាល់ថា កាលពីថ្ងៃអង្គារម្សិលមិញលោកបានរក្សាទុក(Save)រូបភាពដែលលោក ជា សុផារ៉ា បង្ហោះថា “ខ្លោងច្រកចូលឆ្នេរសមុទ្រសម្តេចតេជោសែន”។ ប៉ុន្តែនៅថ្ងៃពុធនេះលោកសរសេរបង្ហោះលើPageរបស់ខ្លួនថាមិនឃើញរូបភាពនោះទេ៖ “រូបភាពទី១ និង រូបភាពទី២ ដែលលោកបានសេវ(Save)ពីទំព័រហ្វេសប៊ុករបស់លោក ជា សុផារ៉ា តែឥឡូវរូបភាពទី១ខ្ញុំចូលទៅរកម្ដងទៀតតែអត់ឃើញ?ហេតុអ្វី?”។
រីឯកូនប្រុសលោកនាយករដ្ឋមន្ត្រី គឺលោក ហ៊ុន ម៉ានិត បានសរសេរនៅលើហ្វេសប៊ុករបស់លោកជាភាសាអង់គ្លេសដែលមានន័យថា លោកមានការភ្ញាក់ផ្អើលនៅពេលដែលឮមិត្តភ័ក្តិនិយាយថា មានការដូចឈ្មោះ ឆ្នេរអូរឈើទាល។ លោកថា លោកមិនគំាទ្រឲ្យមានការដូរឈ្មោះទេ ដោយលោកថាតំាងពីតូចរហូតដល់បច្ចុប្បន្ននេះ លោកស្គាល់តែឈ្មោះឆ្នេរអូរឈើទាល។
សាស្ត្រាចារ្យនិងអ្នកស្រាវជ្រាវពីការអភិវឌ្ឍសង្គមលោក មាស នី មានប្រសាសន៍ថាការប្តូរជំហររដ្ឋាភិបាល ទំនងជៀសវាងកុំឲ្យមានការរិះគន់ពីប្រជាពលរដ្ឋ អាចធ្វើឲ្យនាយករដ្ឋមន្ត្រីបាត់បង់ប្រជាប្រិយភាព។
កាលពីថ្ងៃទី១៩ ខែវិច្ឆិកា ឆ្នាំ២០១៥ រដ្ឋមន្ត្រីក្រសួងទេសចរណ៍ លោក ថោង ខុន លើកឡើងថារដ្ឋាភិបាលកម្ពុជា សម្រេចយកដីឆ្នេរសាធារណៈមកគ្រប់គ្រង ខណៈមានជនឆ្លៀតឱកាសយកដីតំបន់ឆ្នេរធ្វើជាកម្មសិទ្ធិរបស់ខ្លួន។
មុនមានការសម្រេចបែបនេះតំបន់ឆ្នេរមួយចំនួននៃខេត្តព្រះសីហនុដែលគ្រប់គ្រងដោយឯកជនពុំអនុញ្ញាតឲ្យសាធារណជនទូទៅចូលលំហែបានទេ ទុកសម្រាប់តែអតិថិជនរបស់គេប៉ុណ្ណោះ ហើយឆ្នេរខ្លះទៀតត្រូវគេព័ទ្ធរបងទុកចោល៕