មន្ត្រីនគរបាលចរាចរណ៍ផ្លូវគោកនៃអធិការដ្ឋានស្រុកស្រែអំបិល ខេត្តកោះកុង បានផាកពិន័យលោក នាយករដ្ឋមន្ត្រីហ៊ុន សែន និងបុរសម្នាក់ទៀតក្នុងអំពើល្មើសចរាចរណ៍ជិះម៉ូតូមិនបានពាក់មួយកសុវត្ថិភាព និងគ្មានផ្លាកលេខ។
ក្នុងបង្កាន់ដៃ ផាកពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោកចុះថ្ងៃទី១៨ ខែមិថុនា ឆ្នាំ២០១៦ លោក ស៊ុន ណែម បានពិន័យលោក នាយករដ្ឋមន្ត្រីចំនួន១៥០០០រៀល និងបានឲ្យលោកបង់ប្រាក់ពិន័យនេះនៅក្នុងរាជធានីភ្នំពេញ។
លោកនាយករដ្ឋមន្ត្រី ហ៊ុន សែន ក្នុងដំណើរទៅគោរវិញ្ញាណក្ខន្ធលោក សាយ ភូថង មន្ត្រីជាន់ខ្ពស់គណបក្សប្រជាជនកម្ពុជា ក្នុងខេត្តត្រាតប្រទេសថៃ និងបានឆ្លងកាត់ស្ពានស្រែអំបិល ខេត្តកោះកុងនៅថ្ងៃទី១៨ ខែមិថុនា លោកបានជួប និងចុះជិះម៉ូតូជាមួយបុរសម្នាក់ដែលលោកថាជាអ្នករត់ម៉ូតូឌុប។ នៅពេលនោះលោក នាយករដ្ឋមន្ត្រី ជាអ្នកបើកម៉ូតូ ចំណែកម្ចាស់ម៉ូតូជាអ្នកជិះពីក្រោយ ហើយអ្នកទាំងពីរមិនបានពាក់មួកសុវត្ថិភាពនោះទេ រីឯម៉ូតូទៀតសោតក៏គ្មានផ្លាកលេខដែរ។
ជាការឆ្លើយតបនឹងការផាកពិន័យនេះ លោកនាយករដ្ឋមន្ត្រីនៅល្ងាចថ្ងៃទី២២ ខែមិថុនា បានសរសេរលើទំព័រហ្វេសប៊ុកលោកថាលោកនឹងបង់ប្រាក់ផាកពិន័យនេះ និងថាលោកក៏បង់ប្រាក់ផាកពិន័យជំនួសម្ចាស់ម៉ូតូផងដែរ។
លោកសរសេរទៀតថា ៖ “ខ្ញុំបានដឹងជាមុនហើយថា បើទោះបីខ្ញុំសុំអភ័យទោសជាសាធារណៈហើយក៏ដោយ ក៏នគរបាលនៅតែផាកពិន័យខ្ញុំដដែល ព្រោះខ្ញុំបានសាងនូវកំហុសរួចស្រេចទៅហើយ…ខ្ញុំទទួលបង់ពិន័យសំរាប់ខ្លួនឯងផង និងសំរាប់ប្អូនម្ចាស់ម៉ូតូផង បើទោះបីជាម៉ូតូអត់ផ្លាកលេខជាកំហុសរបស់ម្ចាស់ម៉ូតូក៏ដោយ ដើម្បីសម្រាលនូវការលំបាករបស់គាត់ និងទុកលទ្ធភាពឱ្យគាត់ទៅធ្វើផ្លាកលេខ”។
លោកនាយករដ្ឋមន្ត្រីហ៊ុន សែន បញ្ជាក់ថា អភ័យឯកសិទ្ធិសភា ឬនាយករដ្ឋមន្ត្រីរបស់លោក មិនអាចជួយលោកឲ្យរួចផុតពីការផាកពិន័យពីមន្ត្រីនគរបាលចរាចរណ៍បានទេ។ លោកនាយករដ្ឋមន្ត្រី ក៏អំពាវនាវសុំកុំឲ្យអ្នកគាំទ្ររូបលោកថ្នាំងថ្នាក់នឹងមន្ត្រីនគរបាលចរាចរណ៍ដែលពិន័យរូបលោក ហើយលោកថាមន្ត្រីរូបនោះគួរតែត្រូវបានលើកទឹកចិត្ត និងយកគំរូតាមក្នុងការអនុវត្តច្បាប់។
គួរបញ្ជាក់ថា កាលពីថ្ងៃទី២០ ខែមិថុនា ក្នុងពិធីចែកសញ្ញាបត្រឲ្យសិស្សសាលាភូមិន្ទរដ្ឋបាល លោកនាយករដ្ឋមន្ត្រីបានថ្លែងសុំទោសជាសាធារណៈចំពោះការដែលលោកជិះម៉ូតូដោយមិនបានពាក់មួកសុវត្ថិភាពនេះផងដែរ។ លោកក៏បានបានអះអាងថា បើសិនជាមានការផាកពិន័យលោកសុខចិត្តទទួលយកការផាកពិន័យនោះពីមន្ត្រីនគរបាលចរាចរណ៍៕
