ប្រេសិតសិទ្ធិមនុស្សអង្គការសហប្រជាជាតិ បាននិយាយកាលពីថ្ងៃម្សិលមិញថា ភូមានៅតែប្រើប្រាស់តាក់ទិចដដែល ដើម្បីបំបាត់សំឡេងប្រជាជន ដូចគ្នាទៅនឹងអតីតរបបសឹក។ នេះដោយយោងតាមការចុះផ្សាយរបស់ AFP។
ដោយសារតែបញ្ហាសិទ្ធិមនុស្សនៅតែដដែល មន្ត្រីសិទ្ធិមនុស្ស UN បានជំរុញទៅរដ្ឋាភិបាលស៊ីវិលរបស់ភូមា ឲ្យអនុញ្ញាតឲ្យមានការស៊ើបអង្កេតពីអង្គការ UN ទៅលើការចោទថា មានការបោសសម្អាតជនម៉ូស្លីមរ៉ូហ៊ីងយ៉ា។
ជនរ៉ូហ៊ីងយ៉ាជាង ៧ម៉ឺននាក់ ត្រូវបានគេរាយការណ៍ថា បានរត់ទៅប្រទេសបង់ក្លាដែស ចាប់តាំងពីខែតុលាឆ្នាំមុន ដើម្បីគេចចេញពីការបង្ក្រាបដ៏បង្ហូរឈាមពីសំណាក់កងកម្លាំងសន្តិសុខ។ បញ្ហានេះនាំឲ្យមានការកើតឡើងនូវការសម្លាប់មនុស្សយ៉ាងរង្គាល ការរំលោភផ្លូវភេទបូក និងឆក់ប្លន់ដុតបំផ្លាញទ្រព្យសម្បត្តិជនជាតិរ៉ូហ៊ីងយ៉ាងពីសំណាក់កងសន្តិសុខភូមា។
អ្នករាយការណ៍ពិសេសរបស់ UN អ្នកស្រី យ៉ាងហ៊ី លី បានជំរុញឲ្យខ្លាំងក្លាទៅរដ្ឋាភិបាលអ្នកស្រី អ៊ុងសាន ស៊ូជី ឲ្យអនុញ្ញាតឲ្យមានការស៊ើបអង្កេតពីក្រុមមន្ត្រីអន្តរជាតិ ដោយថា ការរំលោភបំពានលើជនជាតិរ៉ូហ៊ីងយ៉ានៅតែត្រូវបានគេរាយការណ៍ថា បន្តកើតមានដដែល៕