អតីតមេដឹកនាំបក្សប្រឆាំង លោក សម រង្ស៊ី បានលើកឡើងថា មានតែពលរដ្ឋកម្ពុជាតែប៉ុណ្ណោះអាចបញ្ចប់ជីវិតនយោបាយរបស់លោកបាន បន្ទាប់ពីសំណើវិសោធនកម្មច្បាប់គណបក្សនយោបាយជាលើកទីពីរ ត្រូវបានគេមើលឃើញថា ជាការប៉ុនប៉ងជាថ្មីម្ដងទៀតពីសំណាក់គណបក្សកាន់អំណាច ដើម្បីបិទផ្លូវនយោបាយអតីតមេបក្សប្រឆាំងរូបនេះ។
នៅលើទំព័រហ្វេសប៊ុកផ្លូវការរបស់លោកកាលពីថ្ងៃម្សិលមិញនេះ លោក សម រង្ស៊ី ដែលកំពុងរស់នៅនិរទេសខ្លួនឯងនៅបរទេសនោះ បានរៀបរាប់យ៉ាងខ្លីថា មានតែប្រជារាស្ត្រខ្មែរទេ ដែលអាចបញ្ចប់ជីវិតនយោបាយរបស់លោកបាន។
អតីតមេដឹកនាំបក្សសង្គ្រោះជាតិរូបនេះ បានលើកឡើងដូច្នេះ បន្ទាប់ពីក្រុមសមាជិកព្រឹទ្ធសភាមកពីគណបក្សប្រជាជនកម្ពុជា កាលពីថ្ងៃទី១៨ ខែកក្កដានេះ បានអនុម័តយល់ព្រមទាំងស្រុង ដោយគ្មានកែប្រែ ទៅលើសំណើវិសោធនកម្មច្បាប់ស្ដីពីគណបក្សនយោបាយ ក្រោយពីក្រុមតំណាងបក្សកាន់អំណាចបានអនុម័តយល់ព្រមរួចមក។
សំណើវិសោធនកម្មច្បាប់នេះ ត្រូវបានគេចាត់ទុកជាការប៉ុនប៉ងពីសំណាក់គណបក្សកាន់អំណាច ដើម្បីរាំងខ្ទប់ជីវិតនយោបាយរបស់លោក សម រង្ស៊ី ដែលជាគូប្រជែងនយោបាយធំបំផុតនឹងលោកនាយករដ្ឋមន្ត្រី ហ៊ុន សែន៕