អាមេរិកបានសម្រេចហាមឃាត់ជនជាតិខ្លួនមិនឲ្យធ្វើដំណើរទៅកូរ៉េខាងជើង បន្ទាប់ពីការស្លាប់និស្សិតរបស់ខ្លួនម្នាក់ ដែលត្រូវបានរបបក្រុងព្យុងយ៉ាងចាប់ឃុំខ្លួន អំឡុងធ្វើដំណើរទេសចរណ៍ទៅកាន់រដ្ឋឯកោមួយនេះ។
AFP បានចុះផ្សាយថា ទីភ្នាក់ងារទេសចរណ៍ទាំងអស់ដែលរៀបចំដំណើរកម្សាន្តទៅកាន់កូរ៉េខាងជើង បាននិយាយកាលពីថ្ងៃម្សិលមិញថា ពួកគេទទួលបានការជូនដំណឹងអំពីការផ្លាស់ប្ដូរនេះ។
ការពិតទៅ ការព្រមានយ៉ាងតឹងរឹងចំពោះការធ្វើដំណើរទៅកូរ៉េខាងជើង ត្រូវបានប្រកាសរួចមកហើយ ប៉ុន្តែ ក្រុងវ៉ាស៊ីងតោនរឹតបន្តឹងវិធានការបន្ថែមទៀត បន្ទាប់ពីការស្លាប់របស់និស្សិតអាមេរិកឈ្មោះ Otto Warmbier កាលពីខែមិថុនាកន្លងមកនេះ។
និស្សិតសាកលវិទ្យាល័យ Virginia វ័យ ២២ឆ្នាំរូបនេះ ត្រូវបានរបបក្រុងព្យុងយ៉ាងចាប់ដាក់គុកជាង ១ឆ្នាំ ក្រោមការចោទថា បានលួចផ្ទាំងឃោសនាពីសណ្ឋាគារមួយនៅកូរ៉េខាងជើង ហើយក្រោយមក ត្រូវបានបញ្ជូនទៅឲ្យអាមេរិកវិញទាំងមានជំងឺយ៉ាងចម្លែករហូតដល់បាត់បង់ជីវិត៕
