ទីភ្នាក់ងារព័ត៌មាន AFP បានផ្សាយថាជើងហោះហើរជិត៤០០ត្រូវបានពន្យារ ដោយសារតែព្យុះទីហ្វុងដ៏ខ្លាំងក្លាមួយ កំពុងបោកបក់ទៅលើទីក្រុងតូក្យូនៅថ្ងៃនេះ។
ទីភ្នាក់ងារឧតុនិយមជប៉ុនបាននិយាយថា ព្យុះទីហ្វុង Mindulle ត្រូវបានគេព្យាករទុកថានឹងបោកបក់ទៅលើប្រទេសជប៉ុននៅវេលាថ្ងៃត្រង់ក្នុងថ្ងៃនេះ ក្នុងល្បឿន២៥គីឡូម៉ែត្រក្នុងមួយម៉ោង។
ភ្លាមៗនៅព្រឹកថ្ងៃចន្ទនេះ ពុំទាន់មានរបាយការណ៍ស្ដីពីមហន្តរាយធំដុំនៅឡើយទេ ខណៈដែលព្យុះនេះបានបោកបក់ដល់កោះ Miyake ជាទីដែលមានប្រជាជនជប៉ុនរស់នៅប្រហែល២៦០០នាក់។
AFP បានដកស្រង់សម្ដីក្រុមហ៊ុនអាកាសចរណ៍ជប៉ុនដែលបាននិយាយថា ខ្លួនបានលុបចោលជើងហោះហើរក្នុងស្រុក១៤៥រហូតដល់រសៀលថ្ងៃនេះ ដោយធ្វើឲ្យប៉ះពាល់ដល់អតិថិជនជាង២ម៉ឺន៦ពាន់នាក់ ខណៈក្រុមហ៊ុនអាកាសចរណ៍ All Nippon Airways បានលុបចោលជើងហោះហើរក្នុងស្រុក៩៦ ប៉ះពាល់អ្នកដំណើរជាង២ម៉ឺន ១ពាន់នាក់៕