អាជ្ញាធរថៃបានប្រកាសប្រាប់ប្រជាជនថៃនៅតាមដងទន្លេមេគង្គឲ្យប្រុងប្រយ័ត្នចំពោះទឹកជំនន់ ខណៈអាជ្ញាធរកំពុងតាមដានស្ថានភាពទឹកជំនន់និងប្រុងប្រៀបសម្រាប់ស្ថានភាពអាសន្ន។
កាសែតបាងកកប៉ុស្តិ៍ ដែលបានផ្អែកតាមអាជ្ញាធរធនធានទឹកនោះ បានផ្សាយថាកម្ពស់ទឹកទន្លេមេគង្គនៅខេត្តណងខាយ ស្ថិតនៅភាគឦសានប្រទេសថៃ បានកើនឡើងយ៉ាងលឿន កាលពីថ្ងៃអាទិត្យម្សិលមិញ ក្នុងកម្រិត ៧សង់ទីម៉ែត្រ ក្នុងមួយម៉ោង។
អាជ្ញាធរធនធានទឹកខេត្តណងខាយ បាននិយាយថាកម្រិតទឹកដែលមានកម្ពស់១១.០៥ម៉ែត្រ កាលពីថ្ងៃត្រង់ថ្ងៃអាទិត្យម្សិលមិញនោះបានបន្តកើនឡើង ដោយសារកម្រិតទឹកហូរពីភាគខាងជើងប្រទេសថៃ។
អាជ្ញាធរខេត្តនេះនិយាយថា កម្រិតទឹកនេះជន់លិចសហគមន៍ហៃសុខ នៅទីរួមខេត្តណងខាយ ហើយទឹកទន្លេបន្តកើនឡើង ហើយអាចឡើងដល់១២ម៉ែត្រនាពេលឆាប់ៗ៕