តុលាការកំពូលឥណ្ឌា បានសម្រេចថា ប្រពៃណីលែងលះប្រពន្ធដ៏ឆាប់រហ័សនៅក្នុងវប្បធម៌ឥស្លាម មិនត្រឹមត្រូវស្របតាមរដ្ឋធម្មនុញ្ញនោះឡើយ ដែលការសម្រេចបែបនេះ គូសបញ្ជាក់ពីជោគជ័យសម្រាប់ក្រុមសកម្មជនការពារសិទ្ធិស្ត្រីនៅក្នុងសង្គមឥណ្ឌា។
យោងតាមការចុះផ្សាយរបស់សារព័ត៌មាន BBC បានឲ្យដឹងថា នៅក្នុងសាលក្រមមួយដែលមានសំឡេងគាំទ្រ ៣ ទល់នឹងសំឡេងជំទាស់ ២ តុលារការកំពូលបានហៅប្រពៃណីលែងលះប្រពន្ធថា មិនមែនជាវប្បធម៌ឥស្លាមនោះឡើយ។
ឥណ្ឌាគឺជាប្រទេសមួយក្នុងចំណោមប្រទេសមួយចំនួនទៀត ដែលបុរសមូស្លីមម្នាក់អាចលែងលះប្រពន្ធរបស់ខ្លួនបានក្នុងរយៈពេលត្រឹមតែប៉ុន្មាននាទីប៉ុណ្ណោះ តាមរយៈការនិយាយពាក្យ តាឡាក់ ៣ដង។ ពាក្យតាឡាក់នេះ បកប្រែថា លែងលះ។
សេចក្ដីសម្រេចរបស់តុលាការកំពូលនេះ បានកើតឡើងស្របទៅនឹងការជំទាស់ទៅនឹងប្រពៃណីត្រីតាឡាក់ ដែលមានន័យថា ការនិយាយពាក្យនេះបីដង ដើម្បីលែងលះប្រពន្ធ។
ករណីទាំងនេះបានកើតឡើងបន្ទាប់ពីស្ត្រីមូស្លីម ៥នាក់ បានដាក់ពាក្យបណ្ដឹង ក្រោយពីប្ដីរបស់ពួកគេបានជ្រើសរើសប្រពៃណីបែបនេះសម្រាប់លែងលះពីពួកគេ និងបន្ទាប់ពីមានបណ្ដឹងពីក្រុមសកម្មជនការពារសិទ្ធិស្ត្រី។
ក្រុមសកម្មជនការពារសិទ្ធិស្ត្រី បានសាទរចំពោះសេចក្ដីសម្រេចបែបនេះរបស់តុលាការ ដោយចាត់ទុកជាជ័យជម្នោះជាប្រវត្តិសាស្ត្រ៕