ប្រធានាធិបតីអាមេរិក លោក ដូណាល់ ត្រាំ បាននិយាយថា ការដកកងទ័ពអាមេរិកចេញពីអាហ្វហ្កានីស្ថាន នឹងផ្ដល់ឱកាសដល់ពួកភេរវករ។ នេះដោយសារយោងតាមការចុះផ្សាយរបស់សារព័ត៌មាន BBC។
សារព័ត៌មាននេះបានដកស្រង់សម្ដីលោក ដូណាល់ ត្រាំ ដែលបាននិយាយថា លោកសម្រេចឲ្យកងទ័ពអាមេរិកបន្តនៅក្នុងប្រទេសអាហ្វហ្កានីស្ថាន និងប្រយុទ្ធនៅទីនោះ ដោយថា ដើម្បីបញ្ចៀសកំហុសដូចកើតឡើងនៅប្រទេសអ៊ីរ៉ាក់។
លោក ត្រាំ បាននិយាយថា លោកចង់ផ្លាស់ប្ដូរពីវិធីសាស្ត្រផ្អែកលើពេលវេលានៅអាហ្វហ្កានីស្ថាន ទៅវិធីសាស្ត្រមួយដែលផ្អែកលើស្ថានការណ៍ជាក់ស្ដែង ដោយលោកបន្ថែមថា លោកនឹងមិនដាក់ចេញកាលបរិច្ឆេទចុងក្រោយទេ។
ទោះជាយ៉ាងណា ប្រធានាធិបតីអាមេរិករូបនេះ បានព្រមានថា វាមិនមែនជា “ក្រដាសស៊ែកទទេ”សម្រាប់អាហ្វហ្កានីស្ថាននោះឡើយ។
លោកថ្លែងថា អាមេរិកនឹងធ្វើការជាមួយរដ្ឋាភិបាលអាហ្វហ្កានីស្ថាន ដរាបណាអាមេរិកមើលឃើញពីការប្ដេជ្ញាចិត្ត និងការរីកចម្រើន។
បើតាម BBC លោក ត្រាំ ក៏បានព្រមានប្រទេសប៉ាគីស្ថានផងដែរថា អាមេរិកនឹងមិនអធ្យាស្រ័យតទៅទៀតនោះឡើយដល់ប្រទេសនេះ ដែលផ្ដល់ជម្រកដល់ពួកជ្រុលនិយម ដោយលោកថា ប៉ាគីស្ថានបានខាតបង់ច្រើន ប្រសិនបើប៉ាគីស្ថានមិនឈរនៅខាងអាមេរិកនោះ៕