កងទ័ពជើងទឹកអាមេរិក បានប្រកាសនូវការស៊ើបអង្កេតទ្រង់ទ្រាយធំនៅថ្ងៃនេះ បន្ទាប់ពីនាវាចម្បាំងរបស់ខ្លួនបានបុកគ្នាជាមួយនឹងនាវាដឹកប្រេងមួយគ្រឿង ដែលបណ្ដាលឲ្យបាត់ខ្លួននាវិក ១០រូប និង ៥នាក់ទៀតរងរបួស។ នេះដោយយោងតាមការចុះផ្សាយរបស់សារព័ត៌មាន Channel News Asia។
ប្រមុខប្រតិបត្តិការកងទ័ពជើងទឹក លោកឧត្ដមនាវី John Richardson បានបញ្ជាទៅក្រុមមេបញ្ជាការ ឲ្យកំណត់ពេលវេលា ១ ឬក៏ ២ថ្ងៃនៅក្នុងមួយសប្ដាហ៍ សម្រាប់ក្រុមបុគ្គលិកទាំងអស់ធ្វើការរួមគ្នា បន្ទាប់ពីនាវាពិឃាត John McCain បានបុកគ្នាជាមួយនឹងនាវាដឹកប្រេងនៅក្នុងដែនទឹកសិង្ហបុរី។
លោក Richardson បានរៀបរាប់ថា គ្មានសញ្ញាណាមួយបញ្ជាក់ថា ការបុកគ្នានោះជាចេតនា ឬក៏ជាលទ្ធផលនៃការវាយប្រហារ ឬឈ្លានពាននោះឡើយ។ ប៉ុន្តែ លោកបន្តថា ការត្រួតពិនិត្យនឹងពិចារណាលើលទ្ធភាពទាំងអស់។
លោក Richardson មិនបានសម្រេចថា មានការលូកលាន់ ឬការវាយប្រហារតាមប្រព័ន្ធអ៊ីនថឹណិតនៅពីក្រោយការបុកគ្នានេះឡើយ ប៉ុន្តែ បាននិយាយថា លោកមិនចង់ធ្វើបុរេវិនិច្ឆ័យទៅលើការស៊ើបអង្កេតនោះឡើយ។
ចំណែកឯរដ្ឋមន្ត្រីការពារជាតិអាមេរិក លោក James Mattis ដែលកំពុងស្ថិតក្នុងដំណើរបំពេញទស្សនកិច្ចនៅហ្សង់ដង់នោះ បាននិយាយថា ការស៊ើបអង្កេតទ្រង់ទ្រាយធំរបស់លោក Richardson នឹងពិនិត្យមើលលើគ្រោះថ្នាក់ឧបទ្ទវហេតុពាក់ព័ន្ធទាំងអស់នៅលើសមុទ្រ។ លោកបន្តថា លោក Richardson នឹងពិនិត្យមើលលើគ្រប់កត្តាទាំងអស់ មិនមែនគ្រាន់តែកត្តាមួយនោះឡើយ៕
