ទីភ្នាក់ងារសម្ងាត់អាមេរិក បាននិយាយនៅថ្ងៃនេះថា ខ្លួនកំពុងតែប្រឈមមុខនឹងបញ្ហាកង្វះខាតថវិកាសម្រាប់ចំណាយលើប្រាក់ថែមម៉ោងដល់ភ្នាក់ងារ ខណៈដែលទីភ្នាក់ងារនេះប្រឈមមុខនឹងការចំណាយទៅលើការការពារប្រធានាធិបតី ក្រុមគ្រួសារដ៏ធំ និងផ្ទះសម្បែងជាច្រើនកន្លែងរបស់លោក ត្រាំ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានផ្សាយបន្តថា ប្រមុខទីភ្នាក់ងារសម្ងាត់ លោក Randolph Alles បាននិយាយថា ភ្នាក់ងារ ១១០០នាក់ នឹងទទួលបានប្រាក់ខែ និងប្រាក់ថែមម៉ោងលើសលប់នៅក្នុងឆ្នាំនេះ ដោយសារតែបន្ទុកការងារដ៏លើសលប់។
ដោយសារតែមេដឹកនាំពិភពលោក ១៥០រូបគ្រោងចូលរួមប្រជុំមហាសន្និបាតអង្គការសហប្រជាជាតិ នៅទីក្រុងញូវយ៉ក នៅខែក្រោយនេះ តម្រូវការភ្នាក់ងារសម្ងាត់ កាន់តែមានកម្រិតខ្ពស់។
លោក ត្រាំ បានធ្វើដំណើរទៅកាន់គេហដ្ឋានរបស់លោកនៅរដ្ឋផ្លរីដា ញូវជឺស៊ី និងវីជីនៀ ស្ទើរតែរៀងរាល់ចុងសប្ដាហ៍។
ទីភ្នាក់ងារសម្ងាត់ក៏បានផ្ដល់ការការពារដល់កូនៗរបស់ប្រធានាធិបតីអំឡុងពេលពួកគេធ្វើដំណើរសម្រាប់ជំនួញ និងដំណើរលម្ហែកម្សាន្តរបស់ពួកគេផងដែរ។
ជារួម មនុស្ស ៤២នាក់ នៅក្នុងរដ្ឋបាលរបស់លោក ដូណាល់ ត្រាំ ទទួលបានការការពារពីទីភ្នាក់ងារសម្ងាត់ ក្នុងនោះមានទាំងសមាជិកក្រុមគ្រួសារ ១៨រូបផងដែរ។
លោក Alles បានប្រាប់កាសែតអាមេរិកថា ប្រធានាធិបតីមានគ្រួសារដ៏ធំ ហើយភារកិច្ចរបស់លោក ត្រូវបានច្បាប់តម្រូវឲ្យផ្ដល់ការការពារ។
លោក Alles ដែលគ្រោងស្វែងរកថវិកាបន្ថែមទៀតពីសភានោះ បានប្រាប់ថា លោកកំពុងតែចរចាជាមួយក្រុមសមាជិកសភាសំខាន់ៗ ដើម្បីបង្កើនការចំណាយលើប្រាក់ខែ និងផ្ដល់ប្រាក់ថែមដល់ភ្នាក់ងារសម្ងាត់ ម៉ោងចន្លោះពី ១៦ម៉ឺន ទៅជាង ១៨ម៉ឺនដុល្លារក្នុងមួយឆ្នាំ សម្រាប់អាណត្តិលោក ត្រាំ៕