ប្រតិបត្តិការស្វែងរក និងជួយសង្គ្រោះ កំពុងដំណើរការទៅដើម្បីស្វែងរកនាវិកអាមេរិក ១០រូប បន្ទាប់ពីនាវាអាមេរិកមួយគ្រឿង និងនាវាដឹកប្រេងមួយគ្រឿង បានបុកគ្នានៅក្នុងដែនទឹកសិង្ហបុរី កាលពីព្រឹកថ្ងៃចន្ទម្សិលមិញនេះ។ នេះដោយយោងតាមការចុះផ្សាយរបស់សារព័ត៌មាន Channel News Asia។
នាវាពិឃាត John S McCain ដែលបំពាក់ទៅដោយគ្រាប់មីស៊ីលនោះ បានបុកគ្នាជាមួយនាវាដឹកប្រេង Alnic MC នៅភាគខាងកើតក្នុងដែនទឹកសិង្ហបុរី នៅម៉ោង ៥ព្រឹកថ្ងៃម្សិលមិញនេះ។ នាវាចម្បាំងមួយនេះ កំពុងស្ថិតដំណើរឆ្ពោះទៅកំពង់ផែមួយរបស់សិង្ហបុរី។
កងទ័ពជើងទឹកអាមេរិក បានប្រកាសថា នាវិក ៥រូប បានរងរបួស ដោយនាវិក ៤រូប ត្រូវបានដឹកតាមឧទ្ធម្ភាគចក្រទៅមន្ទីរពេទ្យនៅសិង្ហបុរី ដោយរបួសនោះមិនប៉ះពាល់ដល់អាយុជីវិតនោះឡើយ ខណៈនាវិកម្នាក់ទៀត ត្រូវការការព្យាបាលបន្ថែម។
ចំណែកអាជ្ញាធរកំពង់ផែ និងដែនទឹកសិង្ហបុរី បានប្រកាសថា គ្មានសមាជិកនាវិកណាម្នាក់នៅលើនាវាទឹកប្រេងនោះ បានរងរបួសនោះទេ។
រដ្ឋមន្ត្រីការពារជាតិសិង្ហបុរី លោក Ng Eng Hen បានបញ្ជាក់នៅលើហ្វេសប៊ុករបស់លោកថា ការបុកគ្នារបស់នាវាទាំងពីរ បានកើតឡើងនៅក្នុងដែនទឹកសិង្ហបុរី៕
