ចិនបានបណ្តេញអតីតប្រធានបក្សនៅក្នុងខេត្តភាគខាងជើងគឺខេត្ត Gansu ចេញពីគណបក្សកុម្មុយនីស្ត ដោយចោទថា ជាប់ពាក់ព័ន្ធការទទួលសំណូក និង ការពាក់ព័ន្ធជាមួយក្រុមឆ្វេងនិយម។
នៅក្នុងសេចក្តីប្រកាសក្នុងគេហទំព័រគណៈកម្មាធិការកណ្តាលសម្រាប់ត្រួតពិនិត្យគោលការផ្ទៃក្នុង បានលើកឡើងថា លោក Wang Sanyun គឺជាបុគ្គលដែលត្រូវបានតែងតាំងជាប្រធានបក្សនៅក្នុងខេត្ត Gansu កាលពីឆ្នាំ២០១១ ហើយជាអ្នកដែលសកម្មក្នុងការអនុវត្តតាមផែនការបក្ស ប៉ុន្តែមានការស្រាវជ្រាវរកឃើញថា ជាប់ពាក់ព័ន្ធការទទួលសំណូកជាអំណោយ ជាការដោះដូរជាមួយការដំឡើងតំណែង។ ករណីនេះ បញ្ជូនទៅរដ្ឋអាជ្ញាបន្ត។នេះបើតាមទីភ្នាក់ងារព័ត៌មានរ៉យទ័រ។
ក្រោមការដឹកនាំរបស់លោក ស៊ី ជីនពីង ដែលបានឡើងកាន់តំណែងកាលពីឆ្នាំ២០១២លោកមានការរឹតបន្តឹងខ្លាំងលើការប្រព្រឹត្តអំពើពុករលួយ គឺមានការអនុវត្តច្បាប់តឹងរឹងចាប់ពីថ្នាក់ដឹកនាំជាន់ខ្ពស់ក្នុងជួរបក្ស រហូតដល់ដល់មន្ត្រីថ្នាក់ក្រោម។