ក្រុមមេធាវីការពារក្តី លោក កឹម សុខា ទទូចឲ្យដំណើរការសវនាការសុំនៅក្រៅឃុំនៅសាលាឧទ្ធរណ៍សប្តាហ៍ក្រោយនេះ ត្រូវមានវត្តមានកូនក្តីរបស់ខ្លួន ដើម្បីមានលទ្ធភាពគ្រប់គ្រាន់ក្នុងការដេញដោលហេតុផលតាមផ្លូវច្បាប់ បើទោះជាមានការបារម្ភពីសុវត្ថិភាពនៃការដឹកជញ្ជូនក៏ដោយ។
មេធាវីសំ សុគង់ ថ្លែងថា រូបលោក និង មេធាវីផ្សេងទៀតដែលកំពុងបំពេញការងារការពារក្តីឲ្យលោកកឹម សុខា ត្រូវការចាំបាច់ឲ្យកូនក្តី មានវត្តមាននៅក្នុងពេលសវនាការ ដើម្បីងាយស្រួលក្នុងការសាកសួរអង្គហេតុ និង អង្គច្បាប់ក្នុងបន្ទាប់សវនាការ។ លោក សំ សុគង់លើកឡើងទៀតថា សមត្ថកិច្ចអាចមានលទ្ធភាពក្នុងការការពារសុវត្ថិភាព ជូនកូនក្តីរបស់លោក ក្នុងការដឹកជញ្ជូនពីពន្ធនាគារត្រពាំផ្លុងក្នុងខេត្តត្បូងឃ្មុំទៅសាលាឧទ្ធរណ៍។
លោកថ្លែងថា«ទាក់ទងនឹងបញ្ហាសន្តិសុខ បញ្ហាសុវត្ថិភាព ខ្ញុំគិតថា វាជាសមត្ថកិច្ចក៏ដូចជាតួនាទីរបស់អជ្ញាធរ ហើយខ្ញុំគិតថា អាជ្ញាធរមានសមត្ថភាពគ្រប់គ្រាន់ក្នុងការសម្របសម្រួលក៏ដូចជាជួយសម្រួលនូវចរាចរណ៍ សន្តិសុខ សុវត្ថិភាពជូនឯកឧត្តម កឹម សុខា ប៉ុន្តែយើងត្រូវតែគិតអំពីគោលការណ៍សិទ្ធិមនុស្សក៏ដូចជាសិទ្ធិជនត្រូវចោទដែលកំពុងជាប់ឃុំឃាំង»។
លោក មេធាវី សំ សុគង់ បន្តថា ក្រុមមេធាវីនឹងសុំឲ្យសភាស៊ើបសួរសាលាឧទ្ធរណ៍ពិនិត្យអំពីដីកាសម្រេចឡើងវិញ និងសុំឲ្យមានការដោះលែង លោក កឹម សុខា ចាប់ពីថ្ងៃសវនាការខាងមុខនេះតទៅ។
អគ្គនាយកពន្ធនាគារ នៃក្រសួងមហាផ្ទៃ លោក ចាន់ គីមសេង ដែលបានផ្ញើរលិខិតទៅសាលាឧទ្ធរណ៍កាលពីដើមសប្តាហ៍នេះ ឲ្យតុលាការពិចារណាពីការដឹកជញ្ជូនលោកកឹម សុខា ដោយលោកថា មានការបារម្ភពីបញ្ហាសន្តិសុខ សុវត្ថិភាព។
លោក ចាន់ គីមសេង ថ្លែងបញ្ជាក់ប្រាប់វីអូឌីយ៉ាងខ្លីនៅថ្ងៃនេះថា លោកបារម្ភមានបញ្ហាអ្វីមួយកើតឡើងនៅតាមផ្លូវ។ លោកថ្លែងថា«ខ្ញុំបារម្ភតែរឿងដឹកជញ្ជូន មកហ្នឹងក្រែងលោមានបញ្ហាអីតាមផ្លូវ។ អត់អីទេអាហ្នឹង! ទុកឲ្យខ្ញុំចាត់ចែងតាមដំណើរ»។
ចំណែកអ្នកនាំពាក្យសាលាឧទ្ធរណ៍ លោក ទូច ថារិទ្ធិ មានប្រសាសន៍ថា រហូតដល់ថ្ងៃសុក្រនេះ សាលាឧទ្ធរណ៍នៅមិនទាន់សម្រេចយ៉ាងណា ចំពោះករណីនាំខ្លួនលោក កឹម សុខា ចូលរួមសវនាការនៅសប្តាហ៍ក្រោយនេះនៅឡើយទេ។
អ្នកជំនាញច្បាប់ លោកមេធាវី សុក សំអឿន មានប្រសាសន៍ថា ករណីនេះគឺគ្រាន់តែជាការបារម្ភតែប៉ុណ្ណោះ ហើយលោកពន្យល់ប្រាប់ពីនីតិវិធីនៃការលើកពេលសវនាការថា អាចមានមូលហេតុច្រើនយ៉ាង ហើយចំណុចខ្លះក៏ច្បាប់ក៏អត់កំណត់ដែរ។
លោកថ្លែងថា«ជួនកាលអត់គ្រប់កូរុមចៅក្រមដោយសារចៅក្រមឈឺ ជួនកាលករណីប្រធានសក្តិ ព្យុះបាក់អាគារក៏ថាបាន… ។ កន្លងមកកុំថាឡើយករណីធំដុំអញ្ចឹង ករណីខ្លះខាងគុកអត់ដឹកមកក៏មាន បើអត់ដឹកមកលើកទៀត»។
លោកសុក សំអឿន បន្ថែមថា ករណីចាំបាច់ជនត្រូវចោទក៏អាចដឹកជញ្ជូនតាមផ្លូវអាកាសក៏បាន ដោយលោកបញ្ជាក់ថា មិនអាចផ្លាស់ប្តូរទីកន្លែងសវនាការបានទេ។
សូមបញ្ជាក់ថា សភាស៊ើបសួរសាលាឧទ្ធរណ៍ នៅព្រឹកថ្ងៃទី២៦ ខែកញ្ញា ខាងមុខនេះ នឹងបើកសវនាការបណ្តឹងរបស់ក្រុមមេធាវី ដែលប្តឹងប្រឆាំងដីការបស់ចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួន លោក កឹម សុខា ប្រធានគណបក្សសង្គ្រោះជាតិ បណ្តោះអាសន្ន។
លោក កឹម សុខា ត្រូវបានសមត្ថកិច្ចចាប់ខ្លួនតាមការបញ្ជារបស់លោកនាយករដ្ឋមន្ត្រីហ៊ុន សែន កាលពីរំលងអធ្រាត្រថ្ងៃទី២ ឈានចូលថ្ងៃទី០៣ ខែកញ្ញា ដោយចោទពីបទក្បត់ជាតិ។