ព័ត៌មានថ្មីបំផុតដែលយើងទទួលបានគឺថា នាវាពិឃាតអាមេរិកមួយគ្រឿង បានធ្វើដំណើរទៅកៀកនឹងប្រជុំកោះ ដែលក្រុងប៉េកាំងអះអាងថាជាម្ចាស់ នៅក្នុងសមុទ្រចិនខាងត្បូង កាលពីថ្ងៃម្សិលមិញ ចំពេលដែលភាពតានតឹងបន្តកើតមាននៅដែនទឹកមានជម្លោះនេះ។
ព័ត៌មានស្ដីពីដំណើរនាវាពិឃាតអាមេរិកនេះ ត្រូវបានផ្សព្វផ្សាយដោយមន្ទីរបញ្ចកោណអាមេរិក ហើយចុះផ្សាយដោយទីភ្នាក់ងារព័ត៌មាន AFP។
បើតាម AFP អ្នកនាំពាក្យមន្ទីរបញ្ចកោណ លោក Gary Ross បានថ្លែងថា នាវាពិឃាតឈ្មោះ Decatur បានបើកបរទៅកៀកនឹងប្រជុំកោះប៉ារ៉ាសែល ហើយបានធ្វើការដោះដូរនៅទីនោះ ដោយគ្មាននាវាអម និងគ្មានឧបទ្ទវហេតុអ្វីនោះឡើយ។
នេះគឺជាប្រតិបត្តិការលើកទី ៣ នៅសមុទ្រចិនខាងត្បូង ដែលធ្វើឡើងដោយអាមេរិកនៅឆ្នាំនេះ ក្រោមសមយុទ្ធឈ្មោះថា “សេរីភាពនាវាចរណ៍” ដែលអាមេរិកបញ្ជាក់ម្ដងហើយម្ដងទៀតថា ខ្លួនមិនអើពើទៅនឹងការអះអាងជាម្ចាស់ផ្ដាច់មុខពីសំណាក់ប្រទេសចិននោះឡើយ។
ប៉ុន្តែ ក្រសួងការពារជាតិចិន បាននិយាយថា ការល្បាតដោយនាវាពិឃាតអាមេរិកនៅសមុទ្រចិនខាងត្បូងនេះ គឺជាសកម្មភាពខុសច្បាប់ និងជាទង្វើ “បង្កហេតុ” ហើយចិនបានតវ៉ាទៅអាមេរិក។
ការតវ៉ានេះ ត្រូវបានចុះផ្សាយដោយទីភ្នាក់ងារព័ត៌មាន Reuters ដែលមើលឃើញប្រតិកម្មពីភាគីចិន នៅលើគេហទំព័ររបស់ក្រសួងការពារចិន នៅថ្ងៃនេះ៕