ក្រសួងមហាផ្ទៃថា មិនមានសមត្ថកិច្ចចាត់ការលើទំព័រហ្វេសប៊ុក ដែលប្រមាថព្រះ​មហាក្សត្រ

ទំព័រហ្វេសប៊ុក «Hội Người Việt Nam Tại Campuchia សមាគមវៀតណាមនៅកម្ពុជា»​

ក្រសួងមហាផ្ទៃ បាន​អះ​អាង​ថា ខ្លួន​មិនមានសមត្ថកិច្ចឯណា​ទៅ​ចាត់ការលើទំព័រហ្វេសប៊ុកឈ្មោះថា «សមាគម​វៀតណាម​នៅកម្ពុជា» ​ដែល​បង្ហោះប្រមាថដល់ព្រះមហាក្សត្រទេ ដោយ​ថា អ្នក​ប្រើ​ប្រាស់​ទំព័រ​ហ្វេសប៊ុក​នេះ​មិន​ស្ថិត​នៅ​ក្នុង​ប្រទេសកម្ពុជា។

ទំព័រហ្វេសប៊ុក «Hội Người Việt Nam Tại Campuchia សមាគមវៀតណាមនៅកម្ពុជា»​ កាលពីថ្ងៃទី២១ ខែតុលា បានបង្ហោះ​សារ​ថា៖ «លឺ​ថា ស្ដេច សីហមុនី មិន​ចង់​សញ្ញេ[ស៊ីញ៉េ]​រំលាយ​គណបក្ស​ក្បត់​ជាតិ​របស់​ជន​ក្បត់​ជាតិ សម រង្ស៊ី និង កឹម សុខា»។

ដោយ​ភ្ជាប់​មក​ជាមួយ​នូវ​រូបថត​នៃ​ជំនួប​ព្រះ​មហាក្សត្រ​ នរោត្ដម សីហមុនី និង​មេដឹកនាំ​វៀតណាម​ផង​នោះ ទំព័រ​ហ្វេសប៊ុក​ដដែលនេះ បាន​រៀប​រាប់​បន្ត​ថា៖ «បើមិនដូច្នុះទេ យើងទាមទារឲ្យស្តេច សីហមុនី ចុះចេញពីរាជបល្ល័ង្គ ហើយ​មកនៅ​ក្រោម​ឪវាទរបស់សម្តេច ហ៊ុន សែន ដូចស្តេច នរោត្ដម រណរីទ្ធិ [រណឫទ្ធិ]វិញ ដើម្បី​ឲ្យ​ប្រទេស​មាន​សន្តិភាព និង​ការ​អភិវឌ្ឍន៍​»។

ក្រុម​អ្នកប្រើប្រាស់បណ្ដាញសង្គមហ្វេសប៊ុក បានចែកចាយ​​នូវ​សារ​នោះ ដោយ​ជំរុញ​ឲ្យ​អាជ្ញាធរ​មាន​សមត្ថកិច្ច​ចាត់​ការ​តាម​ផ្លូវច្បាប់ចំពោះសមាគមវៀតណាមមួយនេះ។

អ្នកនាំពាក្យក្រសួងមហាផ្ទៃ លោក ខៀវ សុភ័គ បានប្រាប់វីអូឌី​នៅ​ថ្ងៃ​នេះថា ការផ្សព្វផ្សាយបែបនោះ គឺ​ជា​ការ​ប្រមាថ​ដល់ចេស្ដា​ព្រះមហាក្សត្រដែលមិនអាចអត់អន់ទោសបាន។

ប៉ុន្តែ លោកថា ហ្វេសប៊ុកនោះ មិនមែនជាឈ្មោះផ្លូវការ មិនមានការ​ចុះបញ្ជីសមាគមន៍នៅក្នុងក្រសួង ហើយ​មូលដ្ឋាន​នៃ​អ្នកប្រើប្រាស់មិនមែននៅស្រុកខ្មែរដែលពិបាកក្នុងការអនុវត្ត​ច្បាប់។

ទោះបីជាយ៉ាងណា លោក ខៀវ សុភ័គ បាន​ដឹង​បន្តថា ក្រសួងដឹងទាំងអស់រាល់ទំព័រហ្វេសប៊ុក ដែល​មាន​មូលដ្ឋាន​ប្រើ​​ប្រាស់ស្រុកខ្មែរ ដែលមិនរួចផុតពីសំណាញច្បាប់នោះទេ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ