លោក ស ខេង រដ្ឋមន្ត្រីក្រសួងមហាផ្ទៃ បដិសេធសំណើរបស់គណបក្សសង្គ្រោះជាតិដែលបានស្នើកាលពីថ្ងៃទី២៧ តុលា ២០១៦ ឲ្យលុបបំបាត់កម្លាំងសន្តិសុខខណ្ឌ។
លិខិតឆ្លើយតបរបស់ក្រសួងមហាផ្ទៃចុះថ្ងៃទី១៧ វិច្ឆិកា ២០១៦នេះបំភ្លឺថា ក្រុមសន្តិសុខនោះ គឺជាការងារសហការរបស់ក្រសួងមានសមត្ថកិច្ចជាមួយក្រសួងពាក់ព័ន្ធនិងប្រជាពលរដ្ឋដោយថា មន្ត្រីនគរបាលមានចំនួនតិច ដូច្នេះត្រូវការកម្លាំងចូលរួមពីប្រជាពលរដ្ឋ ដែលហៅថា «ប្រជាការពារ» ហើយមិនមែនជាកម្លាំងខុសច្បាប់សំរាប់បង្ក្រាបការជួបជុំធ្វើបាតុកម្មឬកូដកម្មដោយសន្តិវិធីនោះទេ។
លិខិតបន្តបំភ្លឺថា ការប៉ះទង្គិចជាមួយគណបក្សសង្គ្រោះជាតិកន្លងមក គឺដោយសារគណបក្សនេះធ្វើសកម្មភាពអាណាធិបតេយ្យបំពានច្បាប់។ ចំណែកករណីថ្ងៃ២០ តុលា ២០១៦ ក្នុងទិវាសិទ្ធិលំនៅដ្ឋានពិភពលោក ដែលបណ្តាលឲ្យសមាជិកអង្គការលីកាដូម្នាក់រងរបួសនោះ ក្រសួងថា គឺមកពីបាតុករមិនគោរពតាមតម្រាយផ្លូវដែលបានកំណត់។
លោក ស ខេង បញ្ជាក់បន្ថែមក្នុងលិខិតថា មិនមែនជាការខុសច្បាប់នោះទេ ក្នុងលក្ខខណ្ឌដែលពុំមានច្បាប់ហាមឃាត់។ ក្រសួងមហាផ្ទៃចាត់ទុកការចោទប្រកាន់របស់គណបក្សសង្គ្រោះជាតិថា គ្មានមូលដ្ឋាន និងថានឹងពិនិត្យផ្លូវច្បាប់ទាក់ទងនឹងការរៀបចំកម្លាំងសន្តិសុខ របស់គណបក្សនេះ និងធ្វើសេចក្តីណែនាំដើម្បីឲ្យអនុវត្តបានត្រឹមត្រូវតាមបទដ្ឋានគតិយុត្ត។
VOD នៅមិនទាន់ទទួលបានការឆ្លើយតបវិញពីគណបក្សសង្គ្រោះជាតិនៅឡើយទេ បន្ទាប់ពីការផ្សាយលិខិតឆ្លើយតបនេះកាលពីល្ងាចថ្ងៃទី២១ វិច្ឆិកា ២០១៦នេះ លើហ្វេសប៊ុករបស់លោកស្រី មួរ សុខហួរ៕