ប្រធានាធិបតីជាប់ឆ្នោត លោក ដូណាល់ ត្រាំ បានថ្លែងនៅថ្ងៃនេះថា លោកនឹងសម្រេចដកខ្លួនចេញពីកិច្ចព្រមព្រៀងពាណិជ្ជកម្ម TPP នៅថ្ងៃដំបូងដែលលោកចូលកាន់តំណែង ឲ្យស្របទៅនឹងការសន្យារបស់លោកអំឡុងឃោសនាបោះឆ្នោត។ នេះដោយយោងតាមការផ្សាយរបស់ Channel News Asia។
យុទ្ធនាការឃោសនាបោះឆ្នោតរបស់មហាសេដ្ឋីរូបនេះបានទាក់ចិត្តក្រុមអ្នកបោះឆ្នោតអាមេរិកថ្នាក់កណ្ដាល ដែលតែងតែខឹងសម្បារដោយសារតែយល់ថា ពួកគេត្រូវគេបោះបង់ចោលជាច្រើនឆ្នាំមកហើយ ដោយសារតែសកលភាវូបនីយកម្ម។ លោក ត្រាំ បានប្ដេជ្ញាការពារការងារសម្រាប់ពលរដ្ឋអាមេរិក ប្រឆាំងនឹងតម្លៃពលកម្មថោកៗនៅតាមបណ្ដាប្រទេសនានា ដូចជា ចិន និងម៉ិកស៊ិក ជាដើម។
កិច្ចព្រមព្រៀងពាណិជ្ជកម្មនានា ដូចជា TPP និងកិច្ចព្រមព្រៀងពាណិជ្ជកម្មសេរីអាមេរិកខាងជើងឆ្នាំ១៩៩៣ បានក្លាយជាប្រធានបទនៅក្នុងការប្រកួតប្រជែងដណ្ដើមតំណែងសេតវិមាន ហើយមនុស្សជាច្រើនមើលឃើញថា ជ័យជម្នះរបស់លោក ត្រាំ គឺជាការមោឃភាពចោលនូវចំណងពាណិជ្ជកម្មទាំងនោះ៕