លោកនាយករដ្ឋមន្ត្រី ហ៊ុន សែន បានបង្ហើបឲ្យដឹងថា សមាជិក គ.ជ.ប ថ្មី នឹងមានសមាជិកភាព ចេញពីបក្សនយោបាយពីរ និងចេញពីមន្ត្រីសង្គមស៊ីវិលម្នាក់។
អនុប្រធាន គ.ជ.ប. លោក គួយ ប៊ុនរឿន និងសមាជិក គ.ជ.ប. លោក រ៉ុង ឈុន និងលោកស្រី តែ ម៉ានីរ៉ុង ខាងកូតាគណបក្សសង្គ្រោះជាតិ បានដាក់ពាក្យលាលែងពីតំណែង កាលពីដើមសប្តាហ៍នេះ ដោយថា ពួកគេ មិនអាចបន្តក្បត់ឧត្តមគតិ មនសិការ និងជាប់ឈ្មោះអាក្រក់ក្នុងប្រវត្តិសាស្ត្រកម្ពុជា។
លោក ហ៊ុន សែន នៅព្រឹកថ្ងៃទី២២វិច្ឆិកា ក្នុងជំនួបជាមួយកម្មករ បានឲ្យដឹងថា បន្ទាប់ពីសមាជិក គ.ជ.ប ខាងកូតាគណបក្សសង្គ្រោះជាតិ បានលាលែងពីតំណែងនោះ សមាជិកថ្មី ដែលមកពីគណបក្ស ហ្វ៊ុន ស៊ិនប៉ិច គណបក្សសញ្ជាតិកម្ពុជា និងសង្គមស៊ីវិលម្នាក់ទៀត នឹងចូលមកជំនួសតំណែងទាំង៣ នៅពេលខាងមុខ។
លោមានប្រសាសន៍បន្ថែមថា៖ «សភាបោះឆ្នោតពេញតើ! មានទៅខុសអី! អ្នកឯងចង់ព្រាត់ប្រាស់ទៅណាព្រាត់ប្រាស់ទៅ! គេបោះឆ្នោតនៅតែបោះឆ្នោត។ ២៥ខែកុម្ភៈ បោះឆ្នោតព្រឹទ្ធិសភា ២៩កក្កដាបោះឆ្នោតរដ្ឋសភា។ ទោះបី ប្រទេសណាមកសង្កេតការណ៍ អត់សង្កេតការណ៍ វាអត់ទាំងមានតម្រូវការទេ។ មិនមែនទាល់តែអ្នកឯងមកសង្កេតការណ៍ បានបោះឆ្នោតស្របច្បាប់ឯណា! ហើយនៅរដ្ឋធម្មនុញ្ញកម្ពុជាឬនៅលើពិភពលោក អត់មានតម្រូវទៅស៊ីញ៉េពីប្រធានធិបតីប្រទេសផ្សេង ទើបស្របច្បាប់ទេ ហើយក៏អត់មានតម្រូវការទៅស៊ីញ៉េពីអគ្គលេខាធិការអង្គការសហប្រជាជាតិ បានស្របច្បាប់ដែរ» ។
អ្នកនាំពាក្យរដ្ឋសភាកម្ពុជា លោក ឡេង ប៉េងឡុង បានបញ្ជាក់ប្រាប់វីអូឌីកាលពីថ្ងៃអង្គារ៍ម្សិលមិញថា គណៈកម្មាធិការអចិន្ត្រៃយ៍នៃរដ្ឋសភា កំពុងត្រៀមជ្រើសរើសសមាជិក គ.ជ.ប.ថ្មី សម្រាប់ជំនួសអ្នកទំាងបីរូបនោះ មិនឲ្យផុតពីកន្លះខែនោះទេ។
លោកមានប្រសាសន៍ថា៖ «យើងកំពុងធ្វើ យើងកំពុងដំណើរការជ្រើសរើសអ្នកជំនួស[សមាជិក គ.ជ.ប បីរូប] បើតាមច្បាប់ប្រហែល១៥ថ្ងៃ»។
នាយកប្រតិបត្តិអង្គការឃ្លាំមើលការបោះឆ្នោតមួយហៅកាត់ថានិចហ្វិច លោក សំ គន្ធាមី ថាបើទោះបីក្បាលម៉ាស៊ីនថ្មី មើលទៅហាក់មានភាពរកាំរកូសច្រើន តែក្នុងកាលៈទេសៈដែលលែងមានបក្សប្រឆាំងនេះ សមាភាពនេះ អាចជាជំហរមួយដែលអាចផ្តល់ទំនុកចិត្តបាន តែទោះជាយ៉ាងណាលោកថា សង្គមស៊ីវិលនឹងបន្តការតាមដានបន្ថែមទៀតលើករណីនេះ។
លោកថា៖ «អកុសលគណបក្សសង្គ្រោះជាតិជួបគ្រោះត្រូវរំលាយហើយអញ្ចឹងវាមានតែគណបក្សផ្សេងៗដែលមកចូលរួមហ្នឹងឲ្យបានចម្រុះគ្នាទៅ ដើម្បីឲ្យមានគំនិតរៀងៗខ្លួនទៅកុំឲ្យតែមានគំនិតតែមួយក្រុមដែលមកតែបក្សខ្លួនឯងពេកក៏វាមិនកើតដែរ។ ដើម្បីបម្រើផលប្រយោជន៍របស់ប្រជាពលរដ្ឋ និងការរៀបចំការបោះឆ្នោតដែលល្អប្រសើរ»។
គ.ជ.ប. បានប្រកាសកាលពីថ្ងៃទី១៨ ខែវិច្ឆិកាថា អាសនៈសភាចំនួន៥៥ របស់បក្សប្រឆាំង នឹងត្រូវបែងចែកទៅគណបក្សចំនួន៦ ដែលពុំទទួលបានអាសនៈសភា នៅក្នុងការបោះឆ្នោតជាតិកាលពីឆ្នាំ២០១៣កន្លងមក។
ករណីនេះ សហរដ្ឋអាមេរិក ចក្រភពអង់គ្លេស និងសហភាពអឺរ៉ុប បានព្រមានដាក់ទណ្ឌកម្មសេដ្ឋកិច្ចលើប្រទេសកម្ពុជា ដោយថា ប្រទេសនេះបានឃ្លាតចាកពីគន្លងប្រជាធិបតេយ្យ ក្រោយពីបង្ក្រាបទៅលើបក្សប្រឆាំង៕