ជាថ្មីម្តងទៀត នាយករដ្ឋមន្ត្រីវៀតណាម បានស្នើឲ្យរដ្ឋាភិបាលកម្ពុជា ធានាសិទ្ធិស្របច្បាប់ដល់អនិកជនវៀតណាមដែលកំពុងរស់នៅកម្ពុជា ខណៈដែលសមត្ថកិច្ចកម្ពុជារកឃើញថា ជនជាតិវៀតណាមរាប់ម៉ឺននាក់កំពុងកាន់កាប់ឯកសាររដ្ឋបាលខ្មែរដោយខុសច្បាប់។
ការទាមទារជាថ្មីទៀតនេះ ធ្វើឡើងនៅពេលលោកនាយករដ្ឋមន្ត្រី ហ៊ុន សែន ទៅធ្វើទស្សនកិច្ចនៅប្រទេសវៀតណាមពីថ្ងៃទី២០ដល់ទី២១ខែធ្នូនេះ។
ក្នុងសេចក្ដីថ្លែងការណ៍រួម នាយករដ្ឋមន្រ្តីវៀតណាម ង្វៀន សួនហ្វុក ស្នើឲ្យរដ្ឋាភិបាលកម្ពុជា «បន្តចាត់វិធានការសមស្របនានាក្នុងការធានាសិទ្ធិស្របច្បាប់ដល់អនិកជនវៀតណាម ដែលកំពុងរស់នៅប្រទេសកម្ពុជា ដោយស្មើភាព ដូចជនបរទេសដទៃទៀតដែលរស់នៅកម្ពុជាស្របច្បាប់ ដោយថា ដើម្បីពង្រឹងនិងពង្រីកមិត្តភាពរវាងប្រទេសទាំងពីរ»។
កាលពីថ្ងៃទី១៩ ខែសីហា ឆ្នាំ២០១៦ អគ្គនាយក នៃអគ្គនាយកដ្ឋានអន្តោប្រវេសន៍កម្ពុជាឲ្យដឹងថា ជនជាតិវៀតណាមចំនួន ៧៦ ៣៩៨នាក់ បានកាន់កាប់ឯកសាររដ្ឋបាលមិនប្រក្រតី ក្នុងនោះមាន សៀវភៅស្នាក់នៅ សៀវភៅគ្រួសារ សំបុត្រកំណើតខ្មែរ ប័ណ្ណបោះឆ្នោតខែ្មរ សំបុត្រអាពាហ៍ពិពាហ៍ អត្តសញ្ញាណប័ណ្ណសញ្ជាតិខែ្មរ លិខិតឆ្លងដែនខ្មែរ ប័ណ្ណមន្ត្រីរាជការ និងឯកសារដទៃទៀត។
អគ្គនាយក នៃអគ្គនាយកដ្ឋានអន្តោប្រវេសន៍ លោក សុខ ផល បានឲ្យដឹងថា ចាប់ពីឆ្នាំ២០០២ មកដល់ឆ្នាំ២០១៦ ចំនួនជនបរទេសអន្តោប្រវេសន៍នៅកម្ពុជា មានការកើនឡើងជាលំដាប់។ លោកថា ជនអន្តោប្រវេសន៍ដែលរស់នៅច្រើនជាងគេ គឺមាននៅរាជធានីភ្នំពេញ ខេត្តកណ្ដាល កំពង់ឆ្នាំង និងខេត្តព្រៃវែង៕