មន្ត្រីនៃគណៈកម្មាធិការជាតិទន្លេមេគង្គនិងអាជ្ញាធរជលផលរបស់ប្រទេសកម្ពុជានិងឡាវ នឹងពង្រឹងសហប្រតិត្តិការឆ្លងដែន ដើម្បីគ្រប់គ្រងជលផលនៅតាមបណ្តាខេត្តជាប់ព្រំប្រទល់នៃប្រទេសទំាងពីរ។
យោងតាមសេចក្តីប្រកាសព័ត៌មានរបស់គណៈកម្មការទន្លេមេគង្គ (MRC) ពីក្រុងវៀងច័ន្ទ ប្រទេសឡាវ ថ្ងៃទី២៣ ខែមករា ឆ្នាំ២០១៧ ឲ្យដឹងថា ការប្តេជ្ញានេះធ្វើឡើងក្នុងដំណើរទស្សនកិច្ចរួមគ្នាមួយដែលរៀបចំឡើងកាលពីពេលថ្មីៗនេះ ទៅកាន់ទន្លេមេគង្គ និងសេគង្គ។ ទន្លេទំាងពីរនេះ បានភ្ជាប់ខេត្ត ចំប៉ាសាក់ និង អាតាពឺ របស់ឡាវ ជាមួយនឹងខេត្ត ស្ទឹងត្រែង និងក្រចេះ របស់កម្ពុជា។
សេចក្តីប្រកាសព័ត៌មានបន្តថា គម្រោងគ្រប់គ្រងជលផលនៅទន្លេមេគង្គ និងសេគង្គ កំពុងជួយរដ្ឋាភិបាលកម្ពុជា និងឡាវ ដើម្បីធ្វើអោយប្រសើរឡើងនូវជលផល និងអភិរក្សជីវៈចម្រុះ តាមរយៈ កិច្ចពិភាក្សា សហប្រតិបត្តិការឆ្លងដែន និងការអនុវត្តរួមគ្នា។ គម្រោងនេះស្ថិតក្នុងចំណោម គម្រោងទ្វេភាគីចំនួន៥ ដែលផ្តល់មូលនិធិដោយធនាគារពិភពលោក ក្រោមជំនួយបច្ចេកទេសពី MRC។
សេចក្តីប្រកាសព័ត៌មានក៏ឲ្យដឹងដែរថា កម្ពុជា និងឡាវ បានព្រមព្រៀងបង្កើតស្ថាប័នគ្រប់គ្រងជលផលរួមគ្នាមួយនៅដំណាច់ឆ្នាំ ២០១៨។
សូមបញ្ជាក់ថា ទន្លេសេគង្គ ហូរពីប្រទេសវៀតណាម កាត់ប្រទេសឡាវ មុននឹងហូរ ចូលប្រទេសកម្ពុជា ដោយភ្ជាប់ជាមួយទន្លេមេគង្គ។ ទន្លេទំាងពីរនេះ ជាប្រភព ធនធានធម្មជាតិ ដែលប្រជាជនកម្ពុជា និងឡាវ រាប់លាននាក់អាស្រ័យផល សម្រាប់ការរស់នៅ។ ក៏ប៉ុន្តែ ប្រព័ន្ធអេកូឡូស៊ីនៃទន្លេទំាងពីរ កំពុងរងការគំរាម គំហែងពីការកើនឡើងនៃសកម្មភាពនេសាទ ការនេសាទខុសច្បាប់ គ្រោះទឹកជំនន់ និងរំាងស្ងួត និងការអភិវឌ្ឍន៏ហេដ្ឋារចនាសម្ព័ន្ធ រួមទំាងទំនប់វារីអគ្គិសនីផងដែរ៕