មីយ៉ាន់ម៉ាស្នើសុំពេលបន្ថែម​សម្រាប់ដោះស្រាយវិបត្តិ​ជនជាតិភាគតិចរ៉ូហ៊ីងយ៉ា​

រដ្ឋលេខាធិការក្រសួងការពារជាតិរបស់មីយ៉ាន់ម៉ានៅថ្ងៃចន្ទនេះ បានស្នើទៅរដ្ឋាភិបាលនានានៅលើពិភពលោក ទុកពេលសមស្របមួយសម្រាប់ឲ្យប្រទេសនេះ ដោះស្រាយវិបត្តិពាក់ព័ន្ធជនជាតិភាគតិចរ៉ូហ៊ីងយ៉ា និង បញ្ហាក្រុមឧទ្ទាមផ្តាច់ខ្លួន។​

ក្នុងវេទិកាសន្តិសុខក្នុងតំបន់​ ដែលរៀបចំឡើងនៅប្រទេសសិង្ហបុរី លោក​ Rear Admiral Myint Nwe ថ្លែងថា លោកបានដឹងទាំងអស់អំពីរបាយការណ៍នានា ដែលនិយាយពីស្ថានភាពជនជាតិភាគតិចរ៉ូហ៊ីងយ៉ា កន្លែងពួកគេរស់នៅ និង បញ្ហាប្រឈម​។​ នេះបើតាមទីភ្នាក់ងារព័ត៌មាន ​AFP។​

តាំងពីខែតុលាឆ្នាំ​២០១៦មក យោធាមីយ៉ាន់ម៉ា បានបើកការវាយប្រហារលើ​ជនជាតិ​ភាគតិចរ៉ូហ៊ីងយ៉ា នៅភាគខាងជើង និង ភាគខាងលិច ដែលចោទថា ធ្វើសកម្មភាពផ្តាច់ខ្លួន ហើយបានបើកការវាយប្រហារលើប៉ុស្តិ៍នគរបាល។​

ចាប់តាំងពីមានការផ្ទុះហិង្សាមក ជនជាតិរ៉ូហ៊ីងយ៉ាជាង ៦៦០០០នាក់ បានរត់គេចចេញទៅប្រទេសជិតខាងគឺប្រទេសប៉ង់ក្លាដេស ដោយបញ្ជាក់ថា ពួកគេប្រឈមមុខការរំលោភបំពានផ្លូវភេទ ការសម្លាប់ និង ការធ្វើទារុណកម្មពីសំណាក់យោធាមីយ៉ាន់ម៉ា៕