អ្នកឃ្លាំមើលកិច្ចការបោះឆ្នោត បានឲ្យដឹងថា សង្គមស៊ីវិលបានដាក់អនុសាសន៍ជាង ២០ចំណុច ទៅគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. ដោយថា ដើម្បីឲ្យស្ថាប័នកំពូលនេះ ធ្វើកំណែទម្រង់លើសេចក្តីព្រាងបទបញ្ជា និងនីតិវិធីសម្រាប់ការបោះឆ្នោតថ្នាក់ជាតិក្នុងឆ្នាំ២០១៨ ឲ្យមានភាពល្អប្រសើរជាងអាណត្តិមុន។
ការលើកឡើងនេះ ធ្វើឡើងចំពេលដែល គ.ជ.ប. នៅថ្ងៃនេះ បានយកអនុសាសន៍របស់សង្គមស៊ីវិល និងគណបក្សនយោបាយចំនួន ១០ស្ថាប័ន ដើម្បីបើកកិច្ចប្រជុំពិគ្រោះយោបល់លើសេចក្តីព្រាងបទបញ្ជា និងនីតិវិធី សម្រាប់ការបោះឆ្នោតជ្រើសតំាងតំណាងរាស្ត្រនីតិកាលទី៦ នៅឆ្នាំនេះ។ ស្ថាប័នទំាងនោះ រួមមាន ក្រុមប្រឹក្សាធម្មនុញ្ញ ព្រឹទ្ធសភា ក្រសួមហាផ្ទៃ ស្ថានទូតជប៉ុន គណបក្សនយោបាយ សង្គមស៊ីវិល និងសមាគមអរុណរះជាដើម។
នាយកប្រតិបត្តិអង្គការណិចហ្វិច សំ គន្ធាមី បានថ្លែងប្រាប់អ្នកសារព័ត៌មាននៅថ្ងៃនេះថា អង្គការរបស់លោក និងសង្គមស៊ីវិល រួមទំាងគណបក្សនយោបាយមួយចំនួនទៀត បានដាក់អនុសាសន៍ជាង ២០ ទៅ គ.ជ.ប. រួមមាន ការកំណត់ធនធានថវិការបស់គណបក្សនយោបាយ សំណើរបោះពុម្ពសន្លឹកឆ្នោតបន្ថែម កំណត់អ្នកសង្កេតការចល័តទូទំាងប្រទេស ការរាប់សន្លឹកឆ្នោត ឲ្យមានវត្តមានមន្ត្រីសង្គមស៊ីវិលចូលរួម និងបើកបង្អួច ឬទ្វាបន្ទប់បោះឆ្នោត ដើម្បីឲ្យពលរដ្ឋបានសង្កេតលើដំណើរការបោះឆ្នោត និងរាប់សន្លឹកឆ្នោតទំាងអស់គ្នាប្រកបដោយតម្លាភាព។
ករណីនេះ លោក គន្ធាមី មានជំនឿថា បើ គ.ជ.ប. សម្រេចទទួលយកអនុសាសន៍ពីភាគីពាក់ព័ន្ធមែន នឹងធ្វើឲ្យការបោះឆ្នោតថ្នាក់ជាតិឆ្នាំ២០១៨នេះ មានភាពល្អប្រសើរជាងការបោះឆ្នោតថ្នាក់ជាតិឆ្នាំ២០១៣។
លោកយល់ថា៖ «បើ គ.ជ.ប. ទទួលយករាល់សំណើរទំាងភាគីពាក់ព័ន្ធទាំងអស់ ទាំងគណបក្សនយោបាយនេះ បទបញ្ជា នីតិវិធីនេះ ប្រសើរជាងឆ្នាំ២០១៣ បើប្រៀបធៀបការបោះឆ្នោតសកលដូចគ្នា»។
ប្រធាន គ.ជ.ប. លោក ស៊ិក ប៊ុនហុក បានថ្លែងថា សេចក្តីព្រាងបទបញ្ជា និងនីតិវិធី ដែលភាគីពាក់ព័ន្ធចំនួន ១០ស្ថាប័ន ដាក់ជាអនុសាសន៍ទៅ គ.ជ.ប. នោះ ត្រូវបាន គ.ជ.ប. យកមកពិគ្រោះយោបល់ផ្ទាល់បន្ថែមទៀតនៅក្នុងកិច្ចប្រជុំក្នុងថ្ងៃនេះ មុននឹង គ.ជ.ប. អនុម័តដាក់ឲ្យប្រើប្រាស់ជាផ្លូវការ។ ប៉ុន្តែ លោកថា រាល់ការសម្រេច គ.ជ.ប. ធ្វើឡើងតាមច្បាប់ ដើម្បីឲ្យភាគីពាក់ព័ន្ធទទួលយកបានទំាងអស់គ្នា។
លោកថ្លែងថា៖ «យើងមិនចោលនូវអនុសាសន៍របស់ភាគីពាក់ព័ន្ធរបស់យើងទេ។ យើងយកមកថ្លឹងថ្លែងនូវទិដ្ឋភាពច្បាប់…ចំណុចណាដែលយើងអនុវត្តកើត គឺយើងធ្វើដូចលើកមុនចឹង គឺយើងតែងតែយកអនុសាសន៍ពីភាគីពាក់ព័ន្ធទាំងអស់យកមកចំរាញ់ ស្អីដែលមានភាពជឿនលឿន គឺ គ.ជ.ប. មិនដែលបដិសេធទេ គឺទទួលយកទំាងអស់ ឲ្យតែឈានទៅរកតម្លាភាព ឈានទៅរកយុត្តិធម៌បំផុត សម្រាប់ការបោះឆ្នោតរបស់យើង»។
ប្រធាន គ.ជ.ប. រូបនេះ បានបញ្ជាក់ថា សេចក្តីព្រាងបទបញ្ជា និងនីតិវិធីនៃការបោះឆ្នោតជ្រើសតំាងតំណាងរាស្ត្រនីតិកាលទី៦ ត្រូវបានរៀបចំដោយផ្អែកលើខ្លឹមសារសម្រង់នៃបទបញ្ជា និងនីតិវិធីសម្រាប់ការបោះឆ្នោតឃុំ-សង្កាត់អាណត្តិទី៤ កាលពីឆ្នាំមុន។
ប៉ុន្តែ លោកថា ត្រូវយកមកកែសម្រួលខ្លឹមសារឲ្យស្របតាមច្បាប់ស្តីពី ការបោះឆ្នោតជ្រើសតំាងតំណាងរាស្ត្រ ដែលរដ្ឋសភាអនុម័ត កាលពីថ្ងៃទី១៩ ខែមីនា ឆ្នាំ២០១៥ ដើម្បីឲ្យបទបញ្ជា និងនីតិវិធីបោះឆ្នោតថ្នាក់ជាតិឆ្នាំ២០១៨នេះ មានភាពល្អប្រសើរជាមុនផងដែរ។
តាមប្រតិទិន ការបោះឆ្នោតជ្រើសតាំងតំណាងរាស្ត្រនីតិកាលទី៦ នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨នេះ៕