ថៅកែ​រោងចក្រ​​មាន​វិវាទ​ការងារ​ជាមួយ​កម្មករ​ចោទ​សហជីព​ថា ញុះញង់​ឲ្យ​មាន​កូដកម្ម

ថៅ​​កែ​​រោង​ចក្រមួយនៅ​ក្នុង​តាខ្មៅ បាន​ប្តឹង​​សហជីព​ស៊ីខាវឌូ​ទៅក្រសួង​​ការងារ​​ ដោយ​​ចោទ​សហជីព​ថា​នេះ ញុះញង់​​ឲ្យ​​កម្មករ​តវ៉ា​​បិទ​​ផ្លូវ ខណៈក្រុមកម្មករនៅតែបន្តតវ៉ាដេកយាមមុខរោងចក្រដើម្បីរង់ចាំដំណោះស្រាយវិវាទការងារ។

ក្នុង​លិខិត​ចុះថ្ងៃទី​១៥​ ខែមករា ផ្ញើ​ទៅ​​​រដ្ឋមន្រ្តី​ក្រសួង​ការងារ លោក អ៊ិត សំហេង ដែលវីអូឌីទើបទទួលបាននៅថ្ងៃនេះ អ្នកស្រី  ឆា ក្បុងហ៊ី ថៅកែ​រោងចក្រ​រោងចក្រ​ហ្គាវ័ន្ត បាន​ចោទ​សហជីព​ស៊ីខៅឌូ​ថា បាន​ញុះញង់​កម្មករ​ឲ្យ​ធ្វើ​កូដ​កម្ម។

ថៅ​កែជាជន​ជាតិ​កូរ៉េខាង​ត្បូង​រូប​នេះ បញ្ជាក់ប្រាប់​លោក អ៊ិត សំហេង ថា វិវាទការងារនៅរោងចក្រនោះ ក្រុមហ៊ុនបានព្យាយាមដោះ​ស្រាយ​តាម​ផ្លូវ​ច្បាប់ ប៉ុន្តែ ​កម្មករនៅ​តែមិនគោ​រពតាម​ការ​បញ្ជា​ឲ្យចូល​ធ្វើការ​វិញ​របស់​ក្រុមប្រឹក្សា​អាជ្ញាកណ្ដាល និងថា តុលាការ​ខេត្តកណ្តាលក៏បាន​ចេញដីកា​សម្រេច​រក្សា​ការពារ​នៅថ្ងៃទី​២៧ ខែធ្នូ ឆ្នាំ​២០១៧ ដោយ​បញ្ជាឲ្យ​កម្មករ​និយោជិត​ទាំងអស់ចូល​ធ្វើការ​វិញ​ផងដែរ។

ក្នុង​លិខិត​ដដែលនោះ អ្នកស្រី  ឆា​ ក្បុងហ៊ី បាន​ចោទ​ថា សហជីព​ស៊ីខៅឌូមិនគោរព​ទៅ​តាមដី​ការក្សា​ការពាររបស់​សាលាដំបូង​ខេត្តកណ្ដាល ដោយ​​បន្ត​ញុះញង់​ដឹក​នាំកម្មករ​ឲ្យ​បិទទ្វារ​ច្រក​ចេញ-ចូល​រោងចក្រ​ទាំងមុខ និង​ក្រោយ ​ហើយ​មិន​ឲ្យ​ក្រុមហ៊ុន​ដឹក​ទំនិញ​ចូល។

វិអូឌីមិនសុំការឆ្លើយបំភ្លឺពីអ្នកនាំពាក្យក្រសួងការងារ លោក ហេង សួរ បានទេជុំវិញបញ្ហាបណ្តឹងនេះ។

ប្រធានសភាពការងារកម្ពុជា លោក អាត់ ធន់ ដែល​គ្រប​ដណ្ដប់​លើ​សហជីព​ស៊ីខៅឌូ បានច្រានចោលការ​ចោទ​ប្រកាន់​ពី​សមណាក់​ថៅកែរោងចក្រ​នេះ ហើយ​ថា រាល់ការតវ៉ាណាមួយរបស់ក្រុមកម្មករ កើត​ឡើង​ដោយសារតែពួកគេពុំ​ទទួល​បាន​ដំណោះស្រាយជុំ​វិញ​វិវាទការងារ។

ផ្ទុយ​ទៅ​វិញ លោក អាត់ ធន់ ចោទ​ថៅកែ​រោងចក្រ​នេះ​ថា ​មិន​គោរ​ព​ច្បាប់​ការងារ ដោយ​មិនបើក​ប្រាក់ឈ្នួលឲ្យកម្មករ ហើយថា ករណីកម្មករតវ៉ាបិទផ្លូវដោយសារតែថៅកែនៅជំពាក់ប្រាក់ឈ្នួល និងប្រាក់អត្ថប្រយោជន៍ផ្សេងៗរបស់​កម្មករ។

លោកបន្ថែមថា «ខាងក្រសួងក៏ដោះស្រាយបញ្ហានៅរោងចក្រហ្គាវ័ន្ត ហើយសហជីពស៊ីខាវឌូក៏ដោះស្រាយនៅរោងចក្រហ្គាវ័ន្ត អញ្ចឹងយើងបានដឹងច្បាស់ហើយឥរិយាបថរបស់ថៅកែរោងចក្រហ្គាវ័ន្ត ព្រោះគាត់ជាអ្នកបង្កររឿង ដោយមិនបើកលុយឲ្យកម្មករ អញ្ចឹងពេលកម្មករធ្វើការតវ៉ា មិនមានអ្នកណាទៅញុះញង់ទេ។ អញ្ចឹងការប្តឹងរបស់គាត់គ្រាន់តែវិធីសាស្រ្តរបស់ថៅកែដោយគាត់ មិនបានមើលពីកំហុសរបស់ខ្លួនទេ។ អញ្ចឹងខ្ញុំគិតថា ក្រសួងការងារគាត់ដឹងខ្លួនឯងហើយ​ថា តើគាត់ត្រូវធ្វើម៉េចដើម្បីឲ្យថៅកែហ្នឹង បើកលុយឲ្យកម្មករទាន់ពេល វាជារឿងត្រឹមត្រូវ មិនមែនត្រូវទទួលបណ្តឹងហើយចាត់ការតាមបណ្តឹងរបស់ក្រុមហ៊ុនអញ្ចឹងទេ»។

កម្មករផ្នែកដេរអ្នកស្រី ថូ ណៃ យៀប អះអាងថា កម្មករតវ៉ាឈានទៅដល់ការបិទផ្លូវនោះ ដោយសារតែមិនមានដំណោះស្រាយ​ជុំ​វិញ​វិវាទការងារ ដោយថា ថៅកែរោងចក្រនោះបានបើកប្រាក់ឈ្នួលឲ្យកម្មករ​​មិនទៀងទាត់ កាត់លុយកម្មករខុសកិច្ចសន្យា និងបញ្ឈប់កម្មករខុសច្បាប់ការងារជាដើម។ កម្មករ​រូប​នេះ​បន្ថែម​ថា រហូតមកដល់ថ្ងៃទី២៣ ខែ​មករានេះ ក្រុមកម្មករនៅតែបន្តតវ៉ាដេកយាមមុខ​រោងចក្រនៅឡើយទេ។

អ្នកស្រីបន្ថែមថា៖ «ការតវ៉ាទាមទារនោះ គឺពួកខ្ញុំធ្វើការទាមទារអត្ថប្រយោជន៍របស់ខ្លួន អត់បានធ្វើ​តាម​ការញុះញង់របស់អ្នកណា ឬ​សហជីពណានោះទេ ព្រោះអាជ្ញាធរថ្នាក់មូលដ្ឋានមិនបានជួយដោះស្រាយមានប្រសិទ្ធិភាពនោះទេ។ ខ្ញុំឲ្យសូន្យចំពោះការដោះ​ស្រាយរបស់គាត់ ព្រោះគាត់អត់បានយកចិត្តទុកដាក់ជាមួយកម្មករនៅក្រោមការគ្រប់គ្រងរបស់គាត់ទេ»។

កាលពីថ្ងៃទី១៨ ខែមករា ក្រុមកម្មករ​ជាង ១​ពាន់​នាក់​នៅ​រោងចក្រ​ហ្វឺស ហ្គាវ័ន្ត និង​ហ្គាវ័ន្ត បានដាក់លិខិតសុំអន្តរាគមន៍ពី លោក​នាយករដ្ឋមន្រ្តី ហ៊ុន សែន ឲ្យដោះស្រាយវិវាទការងារ ដោយថា ថៅកែជាជនជាតិកូរ៉េ អ្នកស្រី ឆា ក្បុងហ៊ី មិនបានបង់ថ្លៃសេវាគាំពារសុខភាព ប.ស.ស. ជូនកម្មករ បញ្ឈប់កម្មករខុសច្បាប់ការងារ និងគេចវេសមិនចង់ទូទាត់ប្រាក់អតីតភាពការងារ ជូនកម្មករជាដើម៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ