អតីតមេដឹកនាំបក្សប្រឆាំង លោក សម រង្ស៊ី បានប្ដេជ្ញាបង្កើតចលនាសង្គ្រោះជាតិឲ្យបាន បើទោះបីជាលោក កឹម សុខា បានអះអាងពីការជំទាស់របស់លោកម្ដងហើយម្ដងទៀតក្ដី។
អតីតមេដឹកនាំគណបក្សសង្គ្រោះជាតិ លោក សម រង្ស៊ី ដែលកំពុងរស់នៅនិរទេសខ្លួនឯងនៅឯបរទេសដើម្បីគេចពីបណ្ដឹងនានានៅតុលាការកម្ពុជានោះ បានប្រកាសឲ្យដឹងកាលពីថ្ងៃទី១៤ ខែមករានេះ អំពីការផ្ដួចផ្ដើមបង្កើតនូវ «ចលនាសង្គ្រោះជាតិ» បន្ទាប់ពីគណបក្សប្រឆាំងដ៏ធំមួយនេះ ត្រូវបានរំលាយចោលកាលពីពាក់កណ្ដាលខែវិច្ឆិកាឆ្នាំមុន។
ប៉ុន្តែ ទាំងមេធាវី និងកូនស្រីរបស់លោក កឹម សុខា បានអះអាងជាបន្តបន្ទាប់ថា លោក កឹម សុខា ដែលកំពុងជាប់ឃុំនៅក្នុងពន្ធនាគារត្រពាំងផ្លុងនោះ បានសម្រេចចិត្តមិនចូលរួម និងមិនគាំទ្រចលនាដែលផ្ដួចផ្ដើមឡើងដោយលោក សម រង្ស៊ី នោះទេ។
ក្រៅពីនៅតែបន្តទាមទារយកមកវិញនូវគណបក្សសង្គ្រោះជាតិ ដែលទទួលបានការគាំទ្រពីប្រជាពលរដ្ឋជាង ៣លានសំឡេង នៅក្នុងការបោះឆ្នោតជាតិកាលពីឆ្នាំ២០១៣នោះ កូនស្រីលោក កឹម សុខា គឺកញ្ញា កឹម សម្មាធីតា បានអះអាងលើគណនីហ្វេសប៊ុករបស់នាងថា ឪពុករបស់នាងសម្រេចដោយឈរលើឆន្ទៈផ្ទាល់ខ្លួន ដោយមិនខ្លាចបញ្ហាសុវត្ថិភាពនោះឡើយ។
ទោះជាយ៉ាងណា លោក លោក សម រង្ស៊ី បានសរសេរនៅលើហ្វេសប៊ុករបស់លោកកាលពីម្សិលមិញថា ក្នុងឋានៈលោកជាបិតាស្ថាបនិកគណបក្សសង្គ្រោះជាតិ លោកត្រូវតែការពារគណបក្សនេះ មិនឲ្យស្លាប់បន្តិចម្តងៗ ដោយសារតែថ្នាក់ដឹកនាំបច្ចុប្បន្នជាប់គាំង មិនអាចធ្វើអ្វីបាននោះទេ។ លោកថា ចំណែកបិតាស្ថាបនិកមួយរូបទៀត គឺលោក កឹម សុខា ត្រូវលោក ហ៊ុន សែន ចាប់យកទៅឃុំឃាំងធ្វើជាចំណាប់ខ្មាំង។
លោករៀបរាប់ថា៖ «ដាច់ខាតត្រូវតែបង្កើតចលនាសង្គ្រោះជាតិ ដើម្បីឲ្យគណបក្សសង្គ្រោះជាតិមានសន្ទុះឡើងវិញ ហើយយើងត្រូវត្រួសត្រាយផ្លូវឲ្យគណបក្សសង្គ្រោះជាតិ ដណ្តើមយកជ័យជម្នះផ្តាច់ព្រាត់លើអំណាចផ្តាច់ការ ក្នុងគោលបំណងសង្គ្រោះជាតិយើង»។
អ្នកវិភាគនយោបាយលោកបណ្ឌិត មាស នី ព្រមានថា អតីតគណបក្សប្រឆាំង នឹងដើរដល់ចំនុចបែកបាក់ផ្ទៃក្នុង បើមេដឹកនាំអតីតបក្សប្រឆាំង មិនយកយន្តការដែលមានស្រាប់មកធ្វើសេចក្តីសម្រេចចិត្តតាមសំឡេងភាគច្រើននោះ។
លោកថា៖ «ទាំងក្រុមលោក កឹម សុខា ទាំងក្រុមលោក សម រង្ស៊ី នេះ អ្នកខ្លះទំនងជាមានចរិតបុគ្គលនិយម ឬហៅថា សម រង្ស៊ី និយម កឹម សុខា និយម ។ កាលណាយើងមានចរិតបែបហ្នឹងខ្លាំងពេក ធ្វើឲ្យយើងរកផ្លូវសង្រួម [សម្របសម្រួល] សម្រាប់ជាតិមួយអត់ឃើញថា…»។
ក្រុមមេដឹកនាំអតីតបក្សប្រឆាំង បានឈានទៅដល់ការខ្វែងគំនិតគ្នា បន្ទាប់ពីលោក សម រង្ស៊ី ប្រកាសឲ្យដឹងអំពីការផ្ដួចផ្ដើមបង្កើតចលនាសង្គ្រោះជាតិ កាលពីថ្ងៃទី១៤ ខែមករាកន្លងមកនេះ។
ចលនាថ្មីនេះ ត្រូវបានផ្ដួចផ្ដើមឡើង ក្រោយពីគណបក្សសង្គ្រោះជាតិ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន ទៅតាមបណ្ដឹងរបស់រដ្ឋាភិបាល បន្ទាប់ពីលោក កឹម សុខា ត្រូវបានចាប់ដាក់ឃុំក្រោមការចោទប្រកាន់ថា «ក្បត់ជាតិ» កាលពីដើមខែកញ្ញាឆ្នាំមុន៕