សេចក្ដីរាយការណ៍មួយបានឱ្យដឹងថាសហរដ្ឋអាមេរិកនិងរុស្ស៊ីបានព្រមព្រៀងគ្នាជាផ្លូវការដាក់ប្រទេសស៊ីរីឱ្យស្ថិតនៅក្នុងលក្ខខណ្ខគ្មានអំពើហិង្សាដោយសង្រ្គាមឬបទឈប់បាញ់គ្នាដោយចាប់ផ្ដើមអនុវត្តនៅពាក់កណ្ដាល អាធ្រាត្រថ្ងៃទី២៧កុម្ភៈ។
តាមបណ្ដាញផ្សាយព័ត៌មាន BBC កិច្ចព្រមព្រៀងនេះធ្វើឡើងបន្ទាប់ពីប្រធានាធិបតីអាមេរិក បារ៉ាក់ អូមាបា បាន សន្ទនាគា្នជាមួយសមភាគីរុស្ស៊ីលោក Vladimir Putin កាលពីថ្ងៃម្សិលមិញដោយពួកគេបានសន្យាឱ្យមានបទឈប់បាញ់គ្នារវាងកងទ័ពរដ្ឋាភិបាលរបស់ប្រធានាធិបតី អាល់ អាសាដ និងពួកឧទ្ទាមរបស់ប្រទេសអ្នកតស៊ូដើម្បីសេរីភាព។
ប៉ុន្តែប្រភពរបស់ BBC បានឱ្យដឹងថាទោះជាមានកិច្ចព្រមព្រៀងនេះក៏ដោយតែសង្រ្គាមប្រឆាំងពួកសកម្មប្រយុទ្ធរដ្ឋឥស្លាមនៅតែបន្ត។
កាលពីថ្ងៃទី១២កុម្ភៈក្រុមប្រទេសមហាអំណាចដែលបានជួបប្រជុំគ្នានៅប្រទេសអាល្លឺម៉ង់បានព្រមព្រៀងឱ្យមានយុទ្ធសន្តិភាពនៅស៊ីរីគឺឱ្យចូលជាធរមាននៅក្នុងសប្ដាហ៍នេះ។
កាលពីថ្ងៃអាទិត្យការវាយប្រយុទ្ធគ្នាធំមួយបានកើតឡើងរវាងកងទ័ពរដ្ឋាភិបាលនិងពួកឧទ្ទាមដោយសម្លាប់មនុស្ស១៤០នាក់។
ប្រទេសស៊ីរីដែលបានធ្លាក់ចូលក្នុងភ្នក់ភ្លើងសង្រ្គាមតាំងពីឆ្នាំ២០១១បានបណ្ដាលឱ្យមនុស្សស្លាប់ជាង២៥ម៉ឺននាក់និងជនភៀសខ្លួន១១លាននាក់បាត់បង់ទីជម្រកនិងភៀសខ្លួនទៅនៅជំរុំរបស់អង្គការសហប្រជាជាតិ៕
ប្រភពៈ BBC