អង្គការលើកលែងទោសអន្តរជាតិ ហៅស្ថានភាពសិទ្ធិមនុស្សនៅកម្ពុជាខណៈការបោះឆ្នោតកាន់តែខិតជិតចូលមកដល់នោះថា កាន់តែអាក្រក់ឡើង។
របាយការណ៍របស់អង្គការលើកលែងទោសអន្តរជាតិប្រចាំឆ្នាំ២០១៦ ដែលទើបចេញផ្សាយថ្មីៗនេះ បានឲ្យដឹងថា អាជ្ញាធរកម្ពុជាកំពុងធ្វើទុកបុកម្នេញ ទៅលើអង្គការសង្គមស៊ីវិល បិទមាត់អ្នកវិភាគ មន្ត្រីសិទ្ធិមនុស្ស និងបក្សប្រឆាំង តាមរយៈការប្រើប្រាស់ប្រព័ន្ធច្បាប់ និងកម្លាំងសន្តិសុខខុសច្បាប់។ អង្គការនេះបន្តថាវិធានការរបស់រដ្ឋាភិបាលកម្ពុជាទៅលើការបញ្ចេញមតិ និងសេរីភាពនៃការជួបជុំ គឺកាន់តែត្រូវបានរារាំងខ្លាំងឡើងខណៈការបោះឆ្នោតឆ្នាំ២០១៧និង២០១៨កាន់តែខិតជិតចូលមកដល់នោះ។
អ្នកនាំពាក្យក្រសួងមហាផ្ទៃលោក ខៀវ សុភ័គ មានប្រសាសន៍ថា ការលើកឡើងនេះគ្រាន់តែជាការដែលមើលឃើញកម្ពុជាពីខាងក្រៅប៉ុណ្ណោះ តែលោកថាការបញ្ចេញមតិនៅកម្ពុជាគឺនៅតែមាននិងនៅតែទូលំទូលាយ។ ចំពោះការលើកឡើងថារដ្ឋាភិបាលកំពុងរារាំងសិទ្ធិសេរីភាពនៃការជួបជុំនោះ ត្រូវបានលោក ខៀវ សុភ័គ ថាធ្វើឡើងដើម្បីថែរក្សាសន្តិសុខ និងសណ្តាប់ធ្នាប់សាធារណៈ។
លោកថា៖ «កន្លងមកយើងឃើញដែរ! ប្រើវិធានហ្នឹងគឺដើម្បីស្អី ដើម្បីថែរក្សាសន្តិភាព ដែលពិបាករកណាស់ព្រោះអង្គការសិទ្ធិមនុស្សស្អីវាមិនដែលរកឲ្យយើងទេ កាលយើងនៅក្នុងគុកអត់ជញ្ជាំង វាគ្មានអង្គការសិទ្ធិមនុស្សអីរកសន្តិភាពឲ្យយើងទេមានតែយើងខ្លួនឯងហ្នឹង ខ្មែរនិងខ្មែរជជែកគ្នាបានសន្តិភាពដូចរាល់ថ្ងៃដែលយើងខំថែរក្សាហ្នឹង សន្តិភាព និងស្ថេរភាពហ្នឹងវាសំខាន់ណាស់!»។
អ្នកប្រឹក្សាឯករាជ្យផ្នែកអភិបាលកិច្ច លោក សួន ប៊ុនស័ក្កិ យល់ថារបាយការណ៍របស់អង្គការលើកលែងទោសអន្តរជាតិនេះគឺអាចឆ្លុះបញ្ចាំងពីការពិតបានច្រើន។ លោកបន្ថែមថាតាមរយៈវិធានការរបស់រដ្ឋាភិបាលទៅលើអ្នកដែលមិនស្ថិតនៅខាងខ្លួន កាលពីកន្លងទៅវាអាចជះឥទ្ធិពលមិនល្អដល់ការបោះឆ្នោតខាងមុខ។
លោកថា៖ «ខ្ញុំសង្កេតឃើញថាអាជ្ញាធររដ្ឋយើង ធ្វើការបង្ក្រាបទៅលើការជួបជុំគ្នាដើម្បីបញ្ចេញមតិ ជាច្រើនលើកច្រើនសារដែរ ដូច្នេះមើលទៅសិទ្ធិសេរីភាពនៃការបញ្ចេញមតិមិនសូវជាមានការប្រសើរដែរទេ ខ្ញុំគិតថាអ្វីដែលជាការលើកឡើងរបស់របាយការណ៍ហ្នឹងគឺថា វាដូចជាសមស្របទៅនឹងសភាពការជាក់ស្តែងនៅកម្ពុជា»។
ស្នងការនគរបាលរាជធានី លោក ជួន សុវណ្ណ បានអះអាងក្នុងរបាយការណ៍ចុះថ្ងៃទី៩ មករា ឆ្នាំ២០១៧ ដោយឲ្យសមត្ថកិច្ចត្រៀមពង្រឹងវិធានការគ្រប់គ្រងនិងក្តាប់ព័ត៌មានពីនិន្នាការប្រឆាំងនានានៅរាជធានីភ្នំពេញ ដើម្បីត្រៀមបង្ក្រាប កុំឲ្យមានចលនានេះចេញមកប្រឆាំងនិងរដ្ឋាភិបាល រួមទាំងបដិវត្តន៍ព័ណ៌និងការញុះញង់ផ្សេងៗផងដែរ ដើម្បីរក្សាសន្តិសុខដល់លទ្ធផលនៃការបោះឆ្នោតនាពេលខាងមុខនេះ ដែលការលើកឡើងនេះធ្វើឲ្យបក្សប្រឆាំង និងអ្នកវិភាគមួយចំនួនបានចាត់ទុកថាជាការបំបាក់ស្មារតី និងបំពានរដ្ឋធម្មនុញ្ញ។
ការវិវត្តន៍ចុងក្រោយនៃនយោបាយកម្ពុជា គឺអនុម័តច្បាប់ស្តីពីបក្សនយោបាយដែលចម្រូងចម្រាស បានធ្វើឲ្យមតិជាតិ និងអន្តរជាតិមួយចំនួនយល់ថា កម្ពុជាកំពុងដើរខុសពីគន្លងប្រជាធិបតេយ្យ ហើយបក្សប្រជាជនកម្ពុជាកំពុងតែត្រៀមដឹកនាំប្រទេសតែម្នាក់ឯងនាថ្ងៃអនាគត៕