សាលាឧទ្ធរណ៍នៅថ្ងៃព្រហស្បតិ៍នេះ បានសម្រេចឲ្យបន្តឃុំខ្លួន មន្ត្រីអាដហុក៤រូប នៅពន្ធនាគារដដែល ដោយអះអាងថា បើឲ្យអ្នកការពារសិទ្ធិមនុស្សទាំងនោះនៅក្រៅឃុំ ពួកគេអាចនឹងមិនសហការជាមួយតុលាការ ក្នុងការស្វែងរកពិតលើសំណុំរឿងចោទប្រកាន់។
មន្ត្រីសមាគមអាដហុក មាន លោក នី សុខា លោក ណៃ វ៉ង់ដា លោក យី សុខសាន្ត និងលោកស្រី លឹម មុន្នី ត្រូវសាលាដំបូងរាជធានីភ្នំពេញ បញ្ជាឲ្យឃុំខ្លួនបណ្តោះអាសន្ននៅពន្ធនាគារព្រៃស កាលពីដើមឆ្នាំ២០១៦ ចោទពីបទ សូកប៉ាន់សាក្សី ទាក់ទិននឹងសំណុំរឿងដ៏ចម្រោងចម្រាសមួយ ដែលមជ្ឈដ្ឋានជាតិនិងអន្តរជាតិចាត់ទុកថាជារឿងនយោបាយ។
នៅថ្ងៃទី២៣ខែកុម្ភៈនេះ មន្ត្រីការពារសិទ្ធិមនុស្សទាំង៤រូបនោះ បានចូលការពារបណ្តឹងសុំនៅក្រៅឃុំរបស់ខ្លួន នៅសាលាឧទ្ធរណ៍។
មុនចូលការពារប្ដឹងនៅថ្ងៃនេះ លោក ណៃ វ៉ង់ដា ថ្លែងថា លោកគ្មានសង្ឃឹមបាននៅក្រៅឃុំនៅទេ ហើយបានអំពាវនាវឲ្យប្រជាពលរដ្ឋទៅបោះឆ្នោត៖ «ប្រជាជនទៅបោះឆ្នោត ហើយបោះឆ្នោតឲ្យចំគោលដៅ បានន័យថា បោះឆ្នោតដើម្បីការផ្លាស់ប្ដូរ តាមលក្ខណប្រជាធិតេយ្យ ដើម្បីឲ្យមានការផ្លាស់ប្ដូរជាវិជ្ជមាន នាំគ្នាទៅបោះឆ្នោត សន្លឹកឆ្នោតមួយសន្លឹកៗវាមានសារៈសំខាន់ខ្លាំងណាស់ ទោះបីមានឧបគ្គសធ្ងន់ធ្ងរធំប៉ុណ្ណាក៏ដោយ ត្រូវទៅបោះឆ្នោតទាំងអស់គ្នា»។
ប៉ុន្តែក្រោយពីបើកការសាកសួរដេញដោលរយៈពេលជាង១ម៉ោងមក ប្រធានចៅក្រមក្នុងអង្គជំនុំជម្រះនៃសភាស៊ើបសួរសាលាឧទ្ធរណ៍លោក ភូ ពៅស៊ុន បានច្រានចោល បណ្តឹងសុំនៅក្រៅឃុំនេះ។
លោក ភូ ពៅស៊ុន អះអាងថា ការមិនអនុញ្ញាតឲ្យមន្ត្រីការពារសិទ្ធិមនុស្សទាំងនោះនៅក្រៅឃុំ លោកថាអាចពិបាកដល់ដំណើរការនីតិវិធីរបស់តុលាការនិងថាសំណុំរឿងនោះស្ថិតក្នុងដំណើរការស៊ើបអង្កេតនៅឡើយ។ នេះបើតាមមេធាវីការពារក្ដីឲ្យមន្ត្រីការពារសិទ្ធិមនុស្សទាំង៤រូប។
មុនពេលឆ្មាំនាំទៅពន្ធនាគារវិញមន្ត្រីការពារសិទ្ធិមនុស្សទាំងនោះលើកឡើងថា តុលាការមិនអាចផ្ដល់យុត្តិធម៌ឲ្យពួកគាត់បានទេ។
លោកមេធាវី ឡោ ជុនធី ដែលការពាក្តីឲ្យមន្ត្រីការពារសិទ្ធិមនុស្សអាដហុកចាត់ទុកថា ការសម្រេចនោះថាមិនយុត្តិធម៌សម្រាប់កូនក្តីលោកទេ។
លោកថា «ខ្ញុំយល់ឃើញថា បើតាមផ្លូវច្បាប់យើងអត់អាចលើកសំអាងហេតុជាបទឧក្រិដ្ឋ បទអី ដើម្បីធ្វើការ ឃុំបន្តបានទេ វាប៉ះពាល់ទៅដល់គោលការណ៍សន្មត់ជាទុកមុនថាមានទោស ព្រោះបទឧក្រិដ្ឋ បានន័យថាពី៥ទៅ១០ឆ្នាំ ចឹងវាអាចមានផលពិបាកចំណុចហ្នឹង ខ្លាចពួកយើងមិនចូលទោះបីខ្លួនយើងធានាឲ្យដក password ធានាការចូលខ្លួនយ៉ាងម៉េចក៏ដោយ»។
មន្ត្រីការពារសិទ្ធិមនុស្សទាំង៥រូបនោះត្រូវបានអង្គភាពប្រឆាំងអំពើពុករលួយចាប់ខ្លួនកាលពីចុងខែមេសា ឆ្នាំ២០១៦ ខណៈស្ថានការណ៍នយោបាយកំពុងឡើងកម្តៅ។
មន្ត្រីការពារសិទ្ធិមនុស្សអង្គការអាដហុក៤រូបគឺ លោក នី សុខា លោក យី សុខសាន្ត លោក ណៃ វ៉ងដា និងលោកស្រី លឹម មុនី រួមទាំងមន្ដ្រី គ.ជ.ប ម្នាក់ទៀត លោក នី ចរិយា ត្រូវបានតុលាការសម្រេចឃុំខ្លួន ដោយចោទប្រកាន់ពីបទសូកប៉ាន់សាក្សីពាក់ព័ន្ធនឹងកញ្ញា ខុម ចាន់តារាទី ហៅ “ស្រីមុំ” ដែលត្រូវគេទម្លាយថាមានទំនាក់ទំនងស្នេហាដ៏ចម្រូងចម្រាស់ជាមួយមេដឹកនាំគណបក្សប្រឆាំងលោក កឹម សុខា៕