កម្ពុជាប្រតិកម្មនឹងសហរដ្ឋអាមេរិក ដែលបានបង្ហាញការព្រួយបារម្ភពីយន្តការពង្រឹងប្រជាធិបតេយ្យ ក្រោយពីតំណាងរាស្ត្របក្សកាន់អំណាច ធ្វើវិសោធនកម្មច្បាប់គណបក្សនយោបាយដ៍ចម្រូងចម្រាស ដោយថាការព្រួយបារម្ភនោះ ជាការជ្រៀតជ្រែកផ្ទៃក្នុងរបស់កម្ពុជា។
សេចក្តីថ្លែងការណ៍ចុះថ្ងៃទី២២កុម្ភៈ ក្រសួងការបរទេសកម្ពុជាបានបង្ហាញការខកចិត្តទៅនឹងការលើកឡើង របស់ស្ថានទូតសហរដ្ឋអាមេរិក ដោយកម្ពុជាអះអាងថា ច្បាប់ដែលបានធ្វើវិសោធនកម្មនេះ អនុវត្តជាទូទៅចំពោះគ្រប់គណបក្សនយោបាយទាំងអស់ ហើយថាវាជាតម្រូវការចាំបាច់ជាមូលដ្ឋាន ដែលប្រទេសកាន់លទ្ធិប្រជាធិបតេយ្យត្រូវគោរពតាម។
រដ្ឋាភិបាលកម្ពុជាក៏បានអំពាវនាវដល់រដ្ឋាភិបាលសហរដ្ឋអាមេរិក ដោយថាត្រូវគោរពគោលការណ៍អន្តរជាតិនៃការមិនជ្រៀតជ្រែកកិច្ចផ្ទៃក្នុង និងគោរពអធិបតេយ្យភាពកម្ពុជា។
តំណាងរាស្ត្របក្សកាន់អំណាច៦៦រូប បានធ្វើវិសោធកម្មច្បាប់ស្តីពីគណបក្សនយោយ កាលពីថ្ងៃចន្ទដោយគ្មានតំណាងរាស្ត្របក្សប្រឆាំង៥៥រូបចូលរួមនោះទេ។
ស្ថានទូតអាមេរិកបានលើកឡើងថា វិសោធនកម្មច្បាប់ស្ដីពីគណបក្សនយោបាយនេះ មានការពិគ្រោះឬពិភាក្សាគ្នាជាសាធារណៈតែបន្តិចបន្តួចប៉ុណ្ណោះ ហើយថាវិសោធនកម្មនេះ «បានផ្ដល់អំណាចយ៉ាងធំដល់រាជរដ្ឋាភិបាលកម្ពុជា ក្នុងការដាក់កំហិតដល់សេរីភាពបញ្ចេញមតិ និងសកម្មភាពស្របច្បាប់នានារបស់គណបក្សនយោបាយ» ហើយនឹងកំណត់លក្ខខណ្ឌមិនច្បាស់លាស់ ដែលអាចឈានទៅរំលាយគណបក្សនយោបាយតែម្ដង។
ក្រៅពីអាមេរិក ក៏មានសហគមន៍ជាតិនិងអន្តរជាតិ រិះគន់ថាច្បាប់ថ្មីនេះបាន «ផ្តល់អំណាចដ៏លើសលប់ដល់រដ្ឋាភិបាលក្នុងការរំលាយគណបក្សណាមួយហើយឈានទៅរករបបឯកបក្ស»៕