ប្រមុខមូលនិធិរូបិយវត្ថុអន្តរជាតិ IMF អ្នកស្រី គ្រីស្ទៀន ឡាហ្កាដ បានថ្លែងនៅថ្ងៃនេះថា អ្នកស្រីទទួលបានការបញ្ជាក់ឡើងវិញ បន្ទាប់ពីជំនួបជាលើកដំបូងរបស់អ្នកស្រីជាមួយក្រុមសមាជិកនៃរដ្ឋបាលថ្មីរបស់ប្រធានាធិបតីអាមេរិក លោក ដូណាល់ ត្រាំ ដែលបង្កើតកម្មវិធីសេដ្ឋកិច្ចថ្មីរបស់អាមេរិក បានបង្កឲ្យមានមន្ទិលសង្ស័យនៅទូទាំងពិភពលោក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
អ្នកស្រី ឡាហ្កាដ បានបង្ហាញនូវជំនួបពិភាក្សាវិជ្ជមានមួយចំនួនជាមួយរដ្ឋមន្ត្រីរតនាគារអាមេរិក លោក ស្ទីវិន នុឈិន (Steven Mnuchin)។
ប្រមុខស្ថាប័ន IMF រូបនេះ ប្រាប់ទូរទស្សន៍អាល្លឺម៉ង់ថា អ្នកស្រីបានជួបប្រជុំជាមួយច្រើនលើកជាមួយក្រុមមន្ត្រីនៃរដ្ឋបាលលោក ត្រាំ ដោយផ្ដោតទៅលើវិស័យសេដ្ឋកិច្ច និងហិរញ្ញវត្ថុ ដែលអ្នកស្រីព្យាយាមស្វែងរកការបញ្ជាក់ឲ្យបានច្បាស់ពីខាងរដ្ឋាភិបាលអាមេរិក។
អ្នកស្រីបន្ថែមថា លោក នុឈិន បានបញ្ជាក់យ៉ាងច្បាស់អំពីបំណងរបស់លោកក្នុងការធ្វើការងារជាមួយស្ថាប័ន IMF ដោយផ្អែកលើគោលការណ៍ពហុភាគី។
កាលពីថ្ងៃម្សិលមិញនេះ លោក នុឈិន បានអំពាវនាវទៅស្ថាប័ន IMF ឲ្យផ្ដល់ការវិភាគច្បាស់លាស់អំពីគោលនយោបាយប្ដូរប្រាក់ នៅតាមបណ្ដាប្រទេសជាសមាជិក។
ស្ថាប័ន IMF ត្រួតពិនិត្យលើគោលនយោបាយរូបិយប័ណ្ណ និងគោលនយោបាយសេដ្ឋកិច្ចដទៃទៀត នៅក្នុងប្រទេសជាសមាជិកចំនួន ១៨៩ ហើយស្ថាប័ននេះ បានសម្រេចថា ប្រទេសជាសមាជិកនានា ត្រូវតែបញ្ចៀសក្លែងបន្លំអត្រាប្ដូរប្រាក់ ដើម្បីទទួលបានផលប្រយោជន៍មិនត្រឹមត្រូវ៕
