រាជទាយាទជប៉ុន Naruhito បានឈានដល់ព្រះជន្ម ៥៧ឆ្នាំហើយនៅថ្ងៃនេះ ដោយទ្រង់ថ្លែងថា ទ្រង់បានត្រៀមខ្លួនរួចរាល់ហើយដើម្បីបន្តតំណែងពីព្រះបិតាទ្រង់ ដែលអាចនឹងដាក់រាជ្យសម្បត្តិនាឆាប់ៗនៅឆ្នាំក្រោយនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានផ្សាយបន្តថា រាជទាយាទ Naruhito នឹងក្លាយជាព្រះចៅអធិរាជមួយអង្គ ដែលនឹងចែករំលែកភាពឈឺចាប់ និងភាពរីករាយជាមួយប្រជាជនជប៉ុន។
គណៈកម្មការមួយរបស់រដ្ឋាភិបាលជប៉ុន កំពុងតែជជែកគ្នាអំពីវិធីសម្រាប់ព្រះចៅអធិរាជ Akihito អាចដាក់រាជ្យសម្បត្តិ បន្ទាប់ពីទ្រង់បានលើកឡើងពីបញ្ហានេះ កាលពីខែសីហាឆ្នាំមុន។
ព្រះចៅអធិរាជ Akihito ព្រះជន្ម ៨៣ឆ្នាំ កំពុងប្រឈមនឹងវ័យជរា ដោយត្រូវទទួលយកការវះកាត់បេះដូង និងព្យាបាលជំងឺមហារីកក្រពះ។
ការដាក់រាជ្យសម្បត្តិចុងក្រោយបំផុតរបស់ព្រះចៅអធិរាជជប៉ុន កើតឡើងនៅឆ្នាំ១៨១៧ ប៉ុន្តែ ច្បាប់ប្រទេសជប៉ុនសព្វថ្ងៃនេះ មិនអនុញ្ញាតឲ្យព្រះចៅអធិរាជដាក់រាជ្យសម្បត្តិនោះឡើយ។
កាលពីខែមករាកន្លងមកនេះ ប្រព័ន្ធផ្សព្វផ្សាយជប៉ុនបានផ្សាយថា រដ្ឋាភិបាលជប៉ុនកំពុងតែពិចារណាអំពីវិធីដែលនឹងអនុញ្ញាតឲ្យព្រះចៅអធិរាជ Akihito ដាក់រាជ្យសម្បត្តិ និងអនុញ្ញាតឲ្យរាជទាយាទ Naruhito ឡើងសោរាជ្យសម្បត្តិបន្ត នៅថ្ងៃទី១ ខែមករា ឆ្នាំ២០១៩ខាងមុខ៕