ប្រទេសម៉ិកស៊ិក បានថ្កោលទោសទៅលើសេចក្ដីណែនាំថ្មីមួយ ដែលចេញដោយសហរដ្ឋអាមេរិក សម្រាប់ចាប់បញ្ជូនជនអន្តោប្រវេសន៍ខុសច្បាប់ចេញពីដឹកដីអាមេរិក។ នេះដោយយោងតាមការចុះផ្សាយរបស់សារព័ត៌មាន BBC។
ស្ថិតក្រោមផែនការថ្មីដែលទើបតែបញ្ចេញដោយរដ្ឋបាលលោក ដូណាល់ ត្រាំ កាលពីថ្ងៃម្សិលមិញនោះ មនុស្សស្ទើរតែទាំងអស់ដែលស្នាក់នៅលើទឹកដីអាមេរិកដោយខុសច្បាប់នោះ នឹងប្រឈមមុខនឹងការបណ្ដេញចេញពីអាមេរិក។
រដ្ឋមន្ត្រីការបរទេសម៉ិកស៊ិក លោក ល្វីស វីដេហ្ការ៉ាយ បាននិយាយថា ប្រទេសរបស់លោកមិនអាចទទួលយកបានទេចំពោះសេចក្ដីសម្រេចចិត្តអត្តនោម័តដែលធ្វើឡើងដោយរដ្ឋាភិបាលអាមេរិកតែម្ខាងនោះ។
ជម្លោះនេះ បានកើតឡើងខណៈដែលមន្ត្រីជាន់ខ្ពស់អាមេរិក ២រូប កំពុងរៀបចំចេញដំណើរទៅទស្សនកិច្ចប្រទេសម៉ិកស៊ិក។
សេតវិមានអាមេរិក បាននិយាយថា រដ្ឋមន្ត្រីកាបរទេសអាមេរិក លោក Rex Tillerson និងរដ្ឋមន្ត្រីសន្តិសុខជាតិ លោក John Kelly នឹងជជែកជាមួយក្រុមមន្ត្រីម៉ិកស៊ិក និងអនុវត្តសេចក្ដីណែនាំថ្មីនេះ។
ផែនការថ្មីរបស់រដ្ឋបាលលោក ត្រាំ រួមមានការអនុវត្តតាមច្បាប់ស្ដីពីសញ្ជាតិ និងអន្តោប្រវេសន៍របស់អាមេរិក ដែលនឹងអនុញ្ញាតឲ្យអាជ្ញាធរអាមេរិកចាប់បញ្ជូនជនអន្តោប្រវេសន៍ខុសច្បាប់ត្រឡប់ទៅប្រទេសម៉ិកស៊ិក ដោយមិនខ្វល់ថា ជនអន្តោប្រវេសន៍នោះមានប្រភពមកពីណានោះឡើយ។
គេមិនច្បាស់ថា តើអាមេរិកមានអំណាចបង្ខំឲ្យប្រទេសម៉ិកស៊ិកទទួលយកជនបរទេស ឬយ៉ាងណានោះទេ។
ប៉ុន្តែ លោក វីដេហ្ការ៉ាយ បានថ្លែងនៅថ្ងៃនេះថា ប្រទេសលោកនឹងមិនទទួលយកនោះឡើយ ដោយថា វាមិនស្ថិតក្នុងផលប្រយោជន៍របស់ប្រទេសម៉ិកស៊ិកនោះឡើយ៕
